Олон улсын хүүхдийн эрхийг хамгаалах өдөр буюу зургадугаар сарын 1-ний үйл ажиллагааны  талаар ажлын хэсгээс мэдээлэл хийлээ. Ажлын хэсгийн даргаар аймгийн Засаг даргын орлогч Б.Мөнхдалай ажиллаж байна. Энэ жилийн хүүхдийн баярыг “Бүх хайраа хүүхдэдээ”  уриан дор тэмдэглэн өнгөрүүлэхээр бэлтгэл хангаж байна. 

Эрдэнэт хотын 50 жилийн ой угтсан  бүтээн байгуулалтын ажил өнөөдрийн байдлаар  50 гаруй байршилд өрнөж буй. Үүний нэг нь А.Амарын  талбайг гантиг чулуугаар шинэчилж байгаа тул энэ жил хүүхдийн баярын үйл ажиллагааг  “Эрдэнэт цэцэрлэгт”  хүрээлэнд зохион байгуулна. 

Ингэхдээ нэн тэргүүнд хүүхдийн аюулгүй байдлыг  анхаарч, тухайн өдрийн 11:00 цагаас 20:00 цаг хүртэл хүүхэд бүрийн насны онцлогт тохирсон олон төрлийн сонирхолтой арга  хэмжээгээр дүүрэн байх болно гэдгийг ажлын хэсгээс онцоллоо. 

Аймгийн Засаг даргын орлогч Б.Мөнхдалай:Хүүхдийн аюулгүй байдал, орчны тохижилтод анхаарч байна 
-Хөрөнгө оруулалт бүтээн байгуулалтын ажил ид өрнөж байна. 50 жилийн ойгоо угтаад бид А.Амарын талбайгаа иж бүрэн шинэчлэх ажлыг эхлүүлсэн. Мөн ирэх долоо хоногоос Наадмын талбайн их засвар, тохижилтын ажил эхэлнэ. Тиймээс энэ жилийн хүүхдийн баяраа “Эрдэнэт цэнгэлдэх”  хүрээлэнд тэмдэглэн өнгөрүүлнэ. 
Энэ жил бид хүүхдийн аюулгүй байдал, орчны тохижилтод нэлээдгүй анхаарч байна. Тиймээс  Зам талбайн тохижилт, хүүхдийн аюулгүй байдлыг хангах, Худалдаа үйлчилгээ, зохион байгуулалтын  дэд ажлын хэсгийг байгуулан бэлтгэлээ хангаж байна. 

Соёл урлаг, аялал жуулчлал, залуучуудын газрын дарга А.Уранчимэг: Монголдоо хоёрт ордог “Хадгаа”  цирк үнэ төлбөргүй гурван удаа тоглоно 
-Хүүхдийн  баярын нээлтийн тоглолтод улс болон олон улсын тэмцээн уралдаанд амжилттай оролцсон 300 авьяаслаг хүүхэд, багачууд оролцоно. Нээлтийн арга хэмжээ 11:00-12:30  хүртэл үргэлжилнэ. Энэ өдрийн, энэ жилийн гол онцлог өглөөний 11:00 цагаас оройн 20 цаг хүртэл  тасралтгүй урлаг, уран сайхны үзүүлбэртэй байлгахыг зорьж байна. 
 Онцлох үйл ажиллагааны нэг нь Монголын циркийн холбоотой хамтран зохион байгуулах “Хадгаа” циркийн үнэ төлбөргүй тоглолт юм. Тус цирк хүүхэд багачуудад зориулан гурван удаа тоглох бөгөөд нэг удаад 700 орчим хүүхэд үзэх боломжтой. Мөн бага насны хүүхдүүдэд зориулан Хүүхэд залуучуудын театрын хамт олон гурван удаа үнэ төлбөргүй тоглоно. Нэг удаадаа 300 гаруй хүүхэд “Үлгэрч эмээ” зэрэг тоглолт үзэх боломжтой. 

ХГБХХГ-ын даргын албан үүргийг түр орлон гүйцэтгэгч М.Баянзул: Асран хамгаалагч нарын утасны дугаартай   500-1000ш бугуйвч тараана 
-Хүүхэд, гэр бүлийн хөгжил хамгааллын газрын  албан хаагчид, ажилтнууд, Боловсролын  газрын нийгмийн ажилтнууд, Баян-Өндөр сумын хөгжил хамгааллын ажилтнууд, хүүхдийн элч  нар эрсдэлтэй цэгүүдэд хараа хяналт тавьж ажиллана.  Эцэг эх, асран хамгаалагчийн утасны дугаартай 500-100ш бугуйвчийг бага насны хүүхдүүдэд тараана. Мөн асар байршуулж хүүхэд, хамгааллын үйлчилгээг үзүүлнэ. 

Бага насны хүүхэд эцэг, эхээсээ төөрөх асуудал нэлээдгүй гардаг. Тиймээс хараа хяналтаа битгий сулруулаарай эцэг, эхчүүд ээ. Хүүхдүүддээ гар утасны дугаараа цээжлүүлэх, дугаараа бичсэн бугуйвч зүүлгэх, цаасан дээр бичээд халаасанд нь хийж өгөх гэм мэт арга хэмжээг авахыг зөвлөж байна.  Хүүхэд нь төөрсөн бол өөрт ойр байгаа цагдаагийн алба хаагчид  даруй мэдэгдэх, төөрсөн хүүхэд таарвал мөн цагдаад мэдэгдэх, хүүхэд хамгааллын явуулын цэгт хүргэж өгөх гэм мэтээр хамтран ажиллахыг уриалж байна. 

Цагдаагийн газрын Замын цагдаагийн тасгийн дарга, хошууч Х.Одбаяр: Сансар худалдааны төвөөс “Жаст Ойл”  колонкийн уулзвар хүртэл  “Авто машингүй бүс” байна
-А1002 авто зам буюу Сансар худалдааны төвийн баруун талын уулзвараас Жаст Ойл колонкийн уулзвар хүртэлх 1,2 км авто замыг  Олон Улсын хүүхдийн хэрхийг хамгаалах өдрөөр  “Авто машингүй бүс” болгох зохион байгуулалтыг хийж байна. Тухайн өдөр өглөөний 09:00-20:00 цаг хүртэл дээрх чиглэлд хүүхдүүдэд үнэ төлбөргүй үйлчлэх нийтийн тээврийн автобуснаас  өөр тээврийн хэрэгсэл замын хөдөлгөөнд оролцохгүй. Үүнтэй холбоотойгоор тус хэсгийн авто замын ажлыг гүйцэтгэж байгаа компани замын тохижилтын ажлаа гүйцэтгэж, хүүхэд багачуудын аюулгүй байдлыг хангаж байна. 

Хүүхдийн баярын өдрөөр бага насны хүүхдүүд унадаг дугуйтай, явганаар замын хөдөлгөөнд оролцдог. Өнөөдрийн байдлаар манай аймагт  39 мянга 700 гаруй тээврийн хэрэгсэл бүртгэлтэй байна.  Тиймээс ганцхан өдөр томчууд бид тээврийн хэрэгслээсээ татгалзаж хүүхдүүдийнхээ аюулгүй зорчих нөхцөлийг нь хангаж өгөхийг уриалж байна. 
Авто машинтай ирсэн иргэд Сансар худалдааны төв, ойр орчмын авто зогсоолд тээврийн хэрэгслээ байршуулах нь зүйтэй.  Хязгаарлалтын бүс рүү нэвтрэхгүй, шуурхай албаны авто машин зорчих зохицуулалтыг хийж байна.  Энэ олон тээврийн хэрэгсэл "Эрдэнэт цэнгэлдэх"  хүрээлэнгийн ойр орчмын авто зогсоолд  тээврийн хэрэгслээ  байршуулна гэвэл хаанаа ч багталцахгүй. Тиймээс аль болох явганаар, унадаг дугуйгаар баярын арга хэмжээнд оролцоорой гэж хэлмээр байна.  Дамжин өнгөрч буй тээврийн хэрэгсэл Сансар худалдааны төвийн баруун гар тийш эргэж, Онцгой байдлын уулзвар, гэр хорооллын бүсээр баруун чиглэлд явах хөдөлгөөн зохицуулалтыг хийж байна. Энэ өдөр цагдаагийн байгууллагын алба хаагчид бүрэн бүрэлдэхүүнээрээ өндөржүүлсэн бэлэн байдалд ажиллана.

БТСГ-ын даргын албан үүргийг түр орлон гүйцэтгэгч, спортын хэлтсийн дарга Э.Лхамсүрэнбаатар: Хүүхдийн баярын өдрөөр гурван төрлийн спортын арга хэмжээг зохион  байгуулна
-Хүүхдийн баярын өдрөөр гурван төрлийн спортын арга хэмжээг зохион  байгуулна. Нээлтийн арга хэмжээ болсны дараа хөлбөмбөгийн талбай дээр даам,   U13-14, U15-16 насныханд зориулсан  3х3 сагсан бөмбөгийн тэмцээн болно. Сагсан бөмбөгийн талбайг шинэчилсэн учраас бэртэж гэмтэх аюулгүй болсон.  Найз нөхдөөрөө баг болж оролцох боломжтой. Тоглолтын хувцсаар жигдрэх нь хамгийн чухал. Мөн хүүхэд бүрийн насны онцлогт тохирсон  хөгжөөнт  буухиа тэмцээнийг  гар бөмбөгийн талбайд зохион байгуулна. Эдгээр нь жил бүрийн хүүхдийн баяраар хамгийн их оролцогчтой, хамгийн их хүсэн хүлээдэг тэмцээн уралдаан  юм. 

“Эрдэнэт цэцэрлэгт”  хүрээлэнгийн дарга М.Энхбат: Унадаг дугуйн 80ш зогсоол шинээр байгуулж байна 
-Олон улсын хүүхдийн эрхийг хамгаалах өдрийг угтан “Эрдэнэт цэнгэлдэх” хүрээлэнгийн орчны тохижилт, иргэдэд зориулсан үйлчилгээний бэлтгэл ажлыг хангаж байна. Хүрээлэнгийн төв хаалганы баруун талд 80 ширхэг унадаг дугуйн зогсоол шинээр байгуулж байна. Мөн гурван байршилд био ариун цэврийн байгууламж суурилуулахаар бэлтгэл хангаж байна. Түүнчлэн Эрдэнэт цэцэрлэгт хүрээлэнгийн хуучин авто зогсоолын талбайг шинэчлэн хучиж, тухайн хэсэгт худалдаа, үйлчилгээний цэгүүдийг төвлөрүүлэн ажиллуулах зохион байгуулалтыг хийнэ. Хүүхдийн баярын өдөр нийт 100 гаруй худалдаа, үйлчилгээний цэг ажиллаж, иргэдэд үйлчилнэ. 

Мэдээллийн төв