Нийтийн тээврийн зарим чиглэлийг сунгана
Нийтийн тээврийн зарим чиглэлд сунгалт хийж өөрчлөлт оруулах болсон талаар өнөөдөр аймгийн Засаг даргын Өргөтгөсөн шуурхай хуралдааны үеэр албаныхан мэдээллээ.
Тодруулбал, “ББ-Од” ХХК-ийн Ч-3 буюу “Дэнж-Баян тал” чиглэлийн маршрутыг сунгаж Ёс заншлын өргөө хүртэл, “Тод од транс” ХХК-ийн Ч2 буюу Шанд чиглэлийн маршрутыг “Эрдэнэт Медикал” эмнэлэг хүртэл сунгаж өөрчлөлт оруулах захирамжийн төсөл боловсруулж байна.
Мөн түүнчлэн ПДУ-д орон нутгийн төсвийн хөрөнгө оруулалтаар 1,1км урттай 6м өргөнтэй авто зам шинээр ашиглалтад орсон. Үүнтэй холбоотойгоор Ч6 буюу “Тосгон – Пирамид – Зээл” чиглэлийн маршрутыг ПДУ-гийн эцсээр тойруулахаар судалгааны ажил хийгдэж гэх мэдээллийг өгөв.
Өнгөрсөн долоо хоногийн Өргөтгөсөн шуурхайн үеэр аймгийн Засаг дарга иргэдийн санал хүсэлтэд үндэслэн зарим чиглэлийг сунгах тооцоо судалгааг танилцуулах, нийтийн тээврийн өнөөгийн үйл ажиллагаанд дүгнэлт хийх, цаашид автобусыг нэмэгдүүлэх хэрэгцээ шаардлага бий эсэхэд судалгаа хийж танилцуулахыг үүрэг болгосон.
Уг үүрэг даалгаврын дагуу энэ сарын 06-нд аймгийн Засаг даргын орлогч, ЗДТГ-ын БОНХОБТХ, ХТГ, АТТ, ХЗА, ЗЦТ-ын холбогдох албан хаагчид хуралдаж, нийтийн тээврийн үйлчилгээ болон сурагчийн автобусны парк шинэчлэлтийг нэмэгдүүлэх судалгаа, тооцооллыг танилцуулж хэлэлцжээ. Ингэхдээ нийтийн тээврийн болон сурагчийн автобусыг 20-иор нэмэгдүүлэх шаардлагатай гэж үзэж 2026 оны төсвийн төсөлд саналаа тусгуулахаар шийдвэрлэжээ.
Өнөөдрийн байдлаар 26 багийн нутаг дэвсгэрийг дайран өнгөрөх 8 чиглэлд 3 аж ахуй нэгж, Хот тохижуулах газрын 32 дунд оврын автобус ажлын өдрүүдэд 7:00-21:00 цаг, амралтын өдрүүдэд 8:00-20:00 цагуудад нийтийн тээврийн үйлчилгээг үзүүлж байна.
Аравдугаар сарын 31-ний өдрийн Өргөтгөсөн шуурхай хурлаас 6 үүрэг даалгавар өгснөөс бүрэн хэрэгжсэн хоёр, хэрэгжиж байгаа дөрөв, үүрэг даалгаврын дундаж хэрэгжилт 66,6 хувьтай байна.
Мэдээллийн төв
