Өсвөрийн бөхийн багийн улсын аварга шалгаруулах тэмцээнд Орхоны баг тэргүүн байр эзэллээ

"Эрин зууны бахархал Эрдэнэт" хотын түүхт 50 жилийн ойн хүрээнд зохион байгуулж буй улсын чанартай томоохон тэмцээн уралдаан үргэлжилж байна. Энэ сарын 20,21-ний өдрүүдэд
Өсвөр үеийн үндэсний бөхийн багийн улсын аварга шалгаруулах тэмцээнийг амжилттай зохион байгуулж өндөрлөлөө.

Тэмцээнд Орхон, Архангай, Хөвсгөл, Сэлэнгэ, Баянхонгор, Өвөрхангай, Увс зэрэг долоон аймаг, Баянгол дүүргээс 60 гаруй өсвөрийн бөхчүүд хүчийг үзлээ. Үндэсний спортыг сурталчлан түгээн дэлгэрүүлэх, тус спортоор дамжуулан хүүхэд залууст бие бялдар, зан суртахууны төлөвшил олгох, өсвөр үеийн тамирчдын ур чадварыг дээшлүүлэх, ирээдүйн өндөр цолтой бөхчүүдийн залгамж халааг бэлтгэх нь энэхүү тэмцээний зорилго байв.

Үндэсний бөхийн спортоор хичээллэж буй 15 настай өсвөрийн бөхчүүдийн дунд анхдугаар улсын аваргын багийн тэмцээнийг анх удаа орон нутагтаа зохион байгуулсан нь онцлог байв. Улсын аваргын тэмцээнд өсвөр үедээ амжилт гаргасан түрүү бөхчүүд хүрэлцэн ирсэн нь тэмцээний чансаа, өрсөлдөөнийг нэмэгдүүлжээ.

Анхдугаар тэмцээний зохион байгуулалт, ач холбогдлыг оролцогчид өндрөөр үнэлсэн тул жил бүр уламжлал болгон зохион байгуулахаар боллоо.
Тэмцээнийг аймгийн ИТХ, ЗДТГ, "Эрдэнэт үйлдвэр", аймгийн Биеийн тамир спортын газар, Монголын Үндэсний бөхийн холбоо, Орхон аймгийн Үндэсний бөхийн холбоо, “Баян-Өндөрийн хүчтэн дэвжээ” хамтран зохион байгууллаа.

Багийн дүнгээр Ойдовын Заяа дасгалжуулагчтай Орхон аймгийн баг тэргүүллээ. Хувийн амжилтаар Сэлэнгэ аймгийн өсвөрийн тамирчин Нацагдоржийн Эрхэмбаяр тэргүүн байранд шалгарчээ. Мөн Сэлэнгэ, Увс аймгийн өсвөрийн бөхчүүд шалгарсан амжилтыг үзүүллээ.

Багийн дүнгээр...