Төрийн болон ААНБ-уудын дунд “Иргэн бүр зүрхээ хайрлая” болзолт уралдааныг эхлүүллээ
2022 оны байдлаар Орхон аймагт зүрх судасны тогтолцооны өвчлөл нь хүн амын дундах тэргүүлэх таван өвчлөлийн дөрөвдүгээрт, хүн амын нийт бас баралтын тэргүүлэн шалтгаан болж байна. Улсын хэмжээнд зүрх судасны өвчний улмаас жил бүр 5000-5500 хүн буюу гурван хүний нэг нь нас барж байна гэсэн статистик үзүүлэлт бий.
Энэ оны эхний 9 сарын байдлаар манай аймагт 352 нас баралт бүртгэгджээ. Тиймээс аймгийн ЗДТГ-ын Нийгмийн бодлогын хэлтсээс санаачлан “Иргэн бүр зүрхээ хайрлая” сарын аянг өнөөдрөөс эхлүүлж байна.
Аяны хүрээнд орон нутагт үйл ажиллагаа явуулж байгаа төрийн болон хувийн хэвшийн 66 байгууллагын хөдөлмөрийн аюулгүй байдлын инженер, ажилтан нарт ажлын байран дээр эрсдэлт хүчин зүйлээс хэрхэн урьдчилан сэргийлэх вэ, эрүүл зөв дадал хэвшлийг хэрхэн өдөр тутамд мөрдөх вэ гэхчлэн зөвлөгөө, мэдээлэл өгөх сургалтыг зохион байгууллаа.
Мөн дээрх байгууллагуудын дунд "Ажлын байранд ажиллагсдын эрүүл мэндийг дэмжиж, эрүүл зүрх аяны үйл ажиллагааг үр дүнтэй хэрэгжүүлсэн шилдэг байгууллага, хамт олон шалгаруулах" болзолт уралдааныг зарлаж байна.
Болзолт уралдаанд оролцож буй байгууллагууд ажлын байрны нөхцөл болон ажиллагсдын эрүүл мэндийн байдал, эрсдэлт хүчин зүйлүүдэд үнэлгээ, судалгаа хийсэн байх, ажиллагсдыг урьдчилан сэргийлэх үзлэгт бүрэн хамруулж, эрүүлжүүлэн, үрр дүнг тооцсон байх, ажлын байранд ажиллагсдын эрүүл мэндийг дэмжих орчин бүрдүүлж, амрах орчин, анхны тусламж авах, ус уух, идэвхтэй дасгал хөдөлгөөн хийх боломж нөхцлөөр хангасан байх зэрэг 11 шалгуур үзүүлэлтийг тавьжээ.
Үр дүнд нь аж ахуйн нэгж байгууллагын тоо нэмэгдэж, тэнд ажиллаж буй ажиллагсдын зүрх судасны өвчинд өртөх эрсдэл, буурч, урьдчилан сэргийлэх талаар мэдлэг хандлага нэмэгдэж, ажиллагсдын эрүүл мэндийн байдал сайжирна гэж үзэж байна.
Мэдээллийн төв
.jpg)
