“Улаанбурхан өвчнөөс хамтдаа сэргийлье” уриан дор  улсын хэмжээнд өрнөж буй нэмэлт дархлаажуулалт өнгөрсөн сарын 29-нд улс орон даяар эхэлсэн.  Эрүүл мэндийн сайдын тушаалаар улсын хэмжээнд хэрэгжиж буй  улаанбурхан, улаанууд өвчний эсрэг дархлаажуулалтын энэ сарын 10-ныг хүртэл үргэлжилнэ. 

Монгол Улс төдийгүй улс орон даяар улаанбурхны нэмэлт дархлаажуулалтыг хүн амдаа хийж байгаагийн шалтгаан нь дэлхийн 130 гаруй улс оронд 120 мянган халдвар бүртгэгдээд байгаатай холбоотой юм.  Түүнчлэн хөрш зэргэлдээ ОХУ, БНХАУ-д, хил залгаа зарим хотод тус өвчний тохиолдол бүртгэгдээд байна.  Улаанбурхан өвчин нь агаар дуслын замаар халдварладаг учир Монгол Улс урьдчилэн сэргийлэх чиглэлээр авах арга хэмжээг ийн эхлүүлээд байгаа юм.

 Үүнтэй холбоотойгоор өнөөдөр аймгийн ЭМГ-ын холбогдох албан тушаалтнууд иргэд, олон нийтийг нэмэлт вакцинжуулалтадаа идэвхтэй хамрагдахыг уриалж мэдээлэл өглөө. 
Нэмэлт вакцинжуулалтад 10 сартайгаас 8 хүртэлх насны хүүхэд хамрагдана. Есөн  сартай болон 2 настайд нь улаанбурхан, улаануудын эсрэг товлолт вакциныг хийдэг. Гэсэн ч нэмэлт дархлаажуулалтад зайлшгүй хамрагдах шаардлагатайг  мэргэжлийн байгууллаас сануулж байна. 

Учир нь улаанбурхны халдварт бага насны хүүхэд өртөмтгий байдаг, өвчилсөн тохиолдолд уушги гэмтээж амь насанд ч хүрэх аюултайг онцолсон. Толгойноос эхлэлтэй улаан гүвдрүүт тууралт биеэр туурах, халуурах, нүдний салст улайх зэрэг нь улаанбурхны эхний шинж тэмдэг.  Манай улсад 2015,2016 онд улаанбурхан өвчний халдвар гарч эндсэн хүүхдийн 90 хувь нь  0-1 насны хүүхдүүд байсан. 

КОР буюу улаанбурхан өвчин 1930,1940-өөд онд дэлхий дахинд эрчимтэй тархаж хэдэн зуун мянган бага насны хүүхэд амь насаа алдсан түүх бий. Хүний аминд халтай халдварт өвчин учир Монголчууд  КОР-ийг "улаанбурхан" гэж нэрлэж заншжээ. Нэмэлт дархлаажуулатаар хийх вакцин нь Энэтхэг улсад үйлдвэрлэгдсэн бөгөөд уг вакциныг 50,60 жилийн турш Монгол Улс хэрэглэж ирсэн гэх мэдээллийг албаныхан өглөө. 

Дэлхийн олон улс оронд улаанбурхан өвчний халдвар дэгдээд байгаа нь цар тахлын жилүүдэд товлолт дархлаажуулалтын үйл ажиллагаа тасалдсантай холбон тайлбарлаж байна. 
Тиймээс улс орнуудад энэ төрлийн халдварын дэгдэлт эрчимтэй тархаж байгаа гэж үзэж байгаа аж. 

Монгол Улсад сүүлийн таван жилийн тоог харвал...
•    I тунд хамрагдах ёстой хүүхдүүд давхардсан тоогоор 40 мянга орчим
•    II тунд хамрагдах ёстой 60 мянга орчим хүүхэд үлджээ. 

Бага насны хүүхдийг товлолт хугацаанд нь вакцинд хамруулснаар аюултай, нас баралт өндөр тохиолддог улаанбурхан, гахайн хавдар, улаанууд өвчнөөс сэргийлэх боломжтой юм.  Товлолт вакциндаа хамрагдсан ч дахиад хийлгэх шаардлагатайн учир нь нэгдүгээр тун 75 хувь, хоёрдугаар тун 90-аас дээш хувь хамгаалах дархлааг бий болгодог байна. 
Аймгийн хэмжээнд нэмэлт дархлаажуулалтыг ӨЭМТ-үүдээр хийж байгаа бөгөөд амралтын өдрүүдэд 10:00-15:00 цаг хүртэл ажиллана. Орхон аймагт нэмэлт дархлаажуулалтад 19 мянган хүүхэд хамрагдахаас өнөөдрийн байдлаар 3600 хүүхэд хамрагджээ. 

Мэдээллийн төв