ЭНЭ САРЫН 15-НД “ДЭЛХИЙН ГЭР БҮЛИЙН ӨДӨР”-ИЙГ ТЭМДЭГЛЭНЭ

Жил бүрийн 5-р сарын 15-нд “Дэлхийн гэр бүлийн өдөр” тохиодог. Манай Улс энэ онд дээрх өдрийг 12 дахь жилдээ тэмдэглэн өнгөрүүлэх гэж байна.

Тэгвэл Орхон аймаг “Дэлхийн гэр бүлийн өдөр”-ийг 5-р сарын 14-нд тэмдэглэх талаар өнөөдөр холбогдох байгууллагуудаас мэдээлэл хийлээ. Тодруулбал, аймгийн ЗДТГ-ын Нийгмийн бодлогын хэлтсээс тухайн өдөр А.Амарын талбайд “Гэр бүлийн үнэ цэнэ өдөрлөг” зохион байгуулна. Тус өдөрлөгийг хамтран зохион байгуулагчаар Гэр бүл, хүүхэд, залуучуудын хөгжлийн газар, “Дэлхийн зөн” ОУБ-ын “Эрдэнэт” орон нутгийн хөгжлийн хөтөлбөр, NBTV телевиз ажиллаж байна.

“Гэр бүлийн үнэ цэнэ өдөрлөг” нь энэ сарын 14-нд буюу ням гарагт А.Амарын талбайд 11-18 цагийн хооронд бүтэн өдрийн турш үргэлжилнэ. Энэ өдрийг аймгийн хэмжээнд “Авто машингүй өдөр” болгох бөгөөд Эрдэнэтчүүд гэр бүлээрээ явган болон унадаг дугуйгаар зорчих боломжтойг зохион байгуулагчид онцоллоо.

Баярын үеэр гэр бүлээрээ оролцох боломжтой олон төрлийн тэмцээн уралдаан А.Амарын талбайд явагдана. Мөн өдөрлөгт оролцогчид зургийн болон АХА тэмцээн, ойрын зайн уралдаан зэрэг олон үйл ажиллагаа гэр бүлүүдийн дунд явагдана. Мөн энэ үеэр сүүлийн хагас жилийн хугацаанд АЗДТГ-ын Нийгмийн бодлогын хэлтэс, “Дэлхийн зөн” ОУБ-ын Эрдэнэт орон нутгийн хөгжлийн хөтөлбөр, NBTV телевиз хамтран хэрэгжүүлсэн “Айл” зорилтот төслийн үр дүнг тайлагнах аж.