Энэ онд 14 байршилд авто замын засвар, шинэчлэлийн ажил хийхээр төлөвлөсөн. Одоогийн байдлаар авто зам болон цэвэр усны шугам сүлжээний шинэчлэлийн хүрээнд зургаан байршилд замын хөдөлгөөнийг түр хязгаарлан ажил үргэлжилж байна.

Зэст багийн 1-14 дүгээр байрнаас Барилгачдын талбай хүртэлх 580 метр авто замын шинэчлэлийн ажлыг “Даян суварган цохио” ХХК гүйцэтгэж байна. Асфальтбетон хучилтын ажил бүрэн дуусаж, өнөөдөр 18:00 цагт замын хөдөлгөөнийг нээхээр төлөвлөжээ. Мөн 1250 м.кв явган хүний замыг байгалийн чулуун хавтангаар шинэчилж, боржин чулуун хашлага хийсэн.  Авто замын засвар шинэчлэлийн ажлыг  дөрөвдүгээр сарын 18-наас эхлүүлж, энэ  сарын 8-11-ний хооронд замын хөдөлгөөнийг хязгаарлан хучилтын ажлыг гүйцэтгэсэн.

Рашаант багийн 26-р цэцэрлэгийн уулзвараас А1002 зам хүртэлх 280 метр авто замын шинэчлэлийн ажлыг мөн “Даян суварган цохио” ХХК гүйцэтгэж байна. Замын хөдөлгөөнийг тавдугаар сарын 8-12-ны хооронд хязгаарласан бөгөөд өнөө орой хөдөлгөөнийг нээхээр төлөвлөжээ. Боржин чулуун хашлагын ажил бүрэн дууссан бол 980 м.кв явган хүний замыг өнгөт хавтангаар шинэчлэх ажил үргэлжилж байна.

Мөн 6-р бичил хорооллын уулзвараас Их залуу багийн уулзвар хүртэлх А1002 дугаартай улсын чанартай авто замыг дөрвөн эгнээ болгон өргөтгөн шинэчилж байна. Ажлыг “Шилдэг зам” ХХК гүйцэтгэж байгаа бөгөөд тавдугаар сарын 6-20-ны хооронд замын хөдөлгөөнийг хязгаарласан. Өчигдрийн байдлаар 620 метр замд цементээр бэхжүүлсэн суурийн ажил хийгдэж, замын хашлага, явган хүний зам, гэрэлтүүлгийн ажлууд үргэлжилж байна. Ирэх долоо хоногт асфальтан хучилт хийхээр төлөвлөжээ.

Цэвэр усны шугам шинэчлэлийн хүрээнд Ханддоржийн гудамж буюу Орос Элчингээс 5-1-ийн уулзвар хүртэлх 488 метр шугамын ажил үргэлжилж байна. Тус хэсгийн замын хөдөлгөөнийг дөрөвдүгээр сарын 24-нөөс хязгаарласан бөгөөд тавдугаар сарын 24-нд нээхээр төлөвлөсөн байна. Тавдугаар сарын 7-ны байдлаар 300 метр сувгийн ухалт болон шугам угсралтын ажил хийгджээ.

Түүнчлэн ЕСБХБ-ны санхүүжилтээр хэрэгжиж буй “Гамшигт тэсвэртэй Эрдэнэт хот” төслийн хүрээнд найман байршилд цэвэр усны шугам шинэчлэх ажил явагдаж байна. Үүний хүрээнд Уурхайчин аюулгүйн тойргоос Хүүхэлдэйн театр хүртэлх хэсэгт 325 метр шугам угсарч байгаа бөгөөд замын хөдөлгөөнийг дөрөвдүгээр сарын 30-наас хааж, тавдугаар сарын 13-нд нээхээр төлөвлөж байна. Ажлыг “Престиж инженеринг” ХХК гүйцэтгэж байна.

Мөн Баянцагаан багт 1.9 км урт цэвэр усны шугам шинэчлэлийн хүрээнд  1 км шугамын  угсралтын ажлыг гүйцэтгэсэн.   Шугам шинэчлэлийн  ажлын хүрээнд авто зам сэтлэх шаардлагатай болсон тул тавдугаар сарын 9-12-ны өдрийн 00:00 цаг хүртэл замын хөдөлгөөнийг түр хязгаарлаад байна. 

Иргэд Та бүхэн хөрөнгө оруулалт, бүтээн байгуулалтын ажилд хүлээцтэй хандан түр зорчих замаар хөдөлгөөнд анхаарал болгоомжтой оролцоно уу. 

Мэдээллийн төв