Долоон бурхан од, Баян-Өндөр хайрхны тахилгын талаар мэдээлэл өглөө
Зуны тэргүүн сарын шинийн 2,3 буюу энэ сарын 18,19-нд долоон бурхан од, Баян-Өндөр хайрхныг тахих ёслол болно. Энэ талаар өнөөдөр Хутагт ламын Гандан шаддүвлин хийд, Гончигсүмлэн хийдээс мэдээлэл өглөө.
- 2026.05.18-ны 20.00 цагт Хүрэнбулагийн рашааны баруун талд Тэнгэрийн долоон бурхан од,
- 2026.05.19-ны 06:00 цагт Баян-Өндөр хайрханы овоон дээр тахилгын ёслол болох тул иргэд, сүсэгтэн олныг өргөнөөр оролцохыг урьж байна.
Баян-Өндөр хайрханыг орон нутгийн хамгаалалтад авах шийдвэрийг анх 1998 онд тэр үеийн ИТХ-аас гаргаж байв. Төрийн тахилгат уул, овоог тахихын өмнө “Долоон бурхан” одыг тахиж, тэнгэр, бурхнаа аргаддаг уламжлалтай.
Баян-Өндөр хайрхны тахилгын үеэр лам хуврагууд ном хурахаас гадна 8 тахил, 7 эрдэнийг залж, 4 зүг, 8 зовхист сум харван, аргамаг хүлэг сэтэрлэх зан үйл үйлийг хийдэг ёстой.
Дээрхийн гэгээн IX Богдын зарлигийн үргэлжлэлийг баригч Сэра Мэ хийдийн их хувилгаан ЖАВЖЭ ОДСЭР РИНБОЧЭ ДАНЗИН ИШЭ ЖАНЦАН ГЭГЭЭНТЭН тахилгад оролцож, сүсэгтэн олонд ном айлдана.
Баян-Өндөр хайрхан нь өвөр талдаа Эрдэнэт уул, ард талдаа Хүрэнбургастайн нуруу, баруун, зүүн талдаа Их, Бага залуу, Баянцагаан, Даваатын уулсаар хүрээлүүлсэн хангай юм.
Тэнгэрийн долоон бурхан одны тахилгын үеэр 5 цэгээс нийтийн тээвэр иргэдэд үнэ төлбөргүй үйлчилнэ. Тодруулбал, Жаргалант сум, Баянцагаан баг Авто тээврийн төв, Эрдэнэ баг, Хорооллын эцсээс Булаг, Баянбулаг чиглэлд, Хүлэг хүнсний захын автобусны буудлаас 20:00 цагт иргэдэд үйлчлилнэ.
Хутагт ламын Гандан шаддүвлин хийдийн хамба лам Э.Ширнэн, Гончигсүмлэн хийдийн хамба лам А.Гурван-Эрдэнэ нар сүсэгтэн олонд хандаж тахилгын ёслолд ирэхдээ дээл хувцсаа бүрэн гүйцэт өмсөж, идээ, будааныхаа дээжийг өргөн хүндэтгэлтэйгээр оролцохыг уриалав.
Мэдээллийн төв
