“Эрин зууны бахархал Эрдэнэт хотын 50 жил”, Засаг даргын үйл ажиллагааны хөтөлбөрийн хүрээнд Орхон аймаг, Эрдэнэт хотоос төрөн гарсан спортын алдартнуудынхаа гавьяа амжилтыг алдаршуулж, тэдний нэрэмжит улс, бүсийн хэмжээний тэмцээн уралдааныг орон нутагтаа зохион байгуулсаар байна. 

Эдгээр өдрүүдэд Монголын жүдо бөхийн түүхэнд шинэ хуудас нээсэн, Атланта 1996 олимпын наадмын хүрэл медальт, Ази тивийн анхны аварга, “Зууны манлай жүдоч” МУГТ Доржпаламын Нармандахын нэрэмжит тэмцээнийг 30 дахь жилдээ зохион байгуулж байна.

Гурван арванг дамжсан энэхүү тэмцээн нь  залуу тамирчдын мөрөөдөл эхэлдэг цэг, ирээдүйн олимп, дэлхийн аваргуудын анхны даваа юм.  Энэ тэмцээнээс олон арван тив дэлхий, олимпийн алдартнууд төрөн гарсан билээ. 

Аймгийн Засаг дарга Б.Зоригтбаяр нээлтийн үгэндээ “Эрдэнэт хотын 50 жилийн түүх бол дан ганц Эрдэнэтчүүд бид бүхний бахархал бус  Монгол Улсын иргэн бүрийн бахархалт түүх билээ. Байгуулагдсан цагаасаа эхлэн улс орны эдийн засаг, нийгмийн хөгжилд бодитой хувь нэмэр үзүүлж, боловсрол, эрүүл мэнд, спорт, соёл урлаг, аж үйлдвэрийн томоохон төв болон хөгжиж, шинэ суурьшил, шинэ өнгө төрх, шинэ соёлыг бий болгосон, идэр залуу хот юм.

Бид хотынхоо түүхт 50 жилийн ойг угтаж улс , бүсийн чанартай 30 гаруй урлаг, спортын уралдаан тэмцээнийг жилийн туршид зохион байгуулахаар төлөвлөсөн. Өнөөдөр бид Монголын жүдо бөхийн түүхэнд шинэ хуудас нээсэн эрхэм хүмүүн, Атланта-1996 олимпын наадмын хүрэл медальт, Ази тивийн анхны аварга, Зууны манлай жүдоч МУГТ Доржпаламын Нармандахын нэрэмжит тэмцээнийг 30 дахь жилдээ зохион байгуулж байна.

Жүдо бол зөвхөн хүч чадлын спорт биш, энэ бол бие биенээ хүндэтгэх, өөрийгөө ялан дийлэх урлаг юм. Нармандах тамирчин нь өөрийн хөдөлмөрч чанар, тууштай байдлаараа Монгол хүний тэсвэр хатуужлыг дэлхийд таниулж байсан бол, өнөөдөр түүний нэрэмжит энэ дэвжээнээс дараагийн залгамж халаа төрөн гарч байгаад бид бахархаж байна” гэлээ. 

Энэ жилийн тэмцээн Атланта  1996 оны олимпоос хүрэл медаль авсны 30 жилийн ой, "Эрин зууны бахархал Эрдэнэт" хотын 50 жилийн ой, энэхүү тэмцээнийг тасралтгүй зохион байгуулж ирсний 30 дахь жил гэдгээрээ онцлогтой. 

Атланта 1996 олимпын наадмын хүрэл медальт, Ази тивийн анхны аварга, “Зууны манлай жүдоч” МУГТ Д.Нармандах нь  2003 онд Эрдэнэт хотын спорт цогцолборын Хангарди клуб,  Бат-Орших багшийн гараас  тамирчны замналаа эхэлж, жүдо бөхийн 60 кг-ын жинд барилдан, Монголын жүдо бөхийн түүхэнд шинэ хуудсыг нээсэн юм. 

Мөн Азийн анхны аварга болж, улсын аваргад 8 жил дараалан түрүүлсэн амжилтын эзэн.  Тэмцээний нээлтийн арга хэмжээний үеэр орон нутгийн удирдлагууд Атланта 1996 олимпын наадмын хүрэл медальт, Ази тивийн анхны аварга, “Зууны манлай жүдоч” МУГТ Д.Нармандахын амжилтад  хүндэтгэл үзүүлэн, 30 сая төгрөгийн урамшуулал олголоо. 

Аймгийн Засаг дарга Б.Зоригтбаяр ирэх жилүүдэд  багийн төрлийг нэмж, шилжин явах цомыг 100 сая төгрөгийн хамт дагалдуулан, орон нутагтаа уламжлал болгон зохион байгуулах болсныг дуулгасан билээ. 

Энэ удаагийн тэмцээнд нийслэл, 21 аймгаас 1750 жүдоч оролцож, авхаалж самбаа, хурд хүч, тэсвэр хатуужлаа сорьж байна.  

Мэдээллийн төв