Сансар худалдааны төвөөс Жаст Ойлын уулзварыг Авто машингүй бүс болгоно
Олон Улсын Хүүхдийн Эрхийг хамгаалах өдрийг “Бүх хайраа хүүхдэдээ” уриан дор тэмдэглэн өнгөрүүлнэ. Бүтээн байгуулалт, хөрөнгө оруулалтын ажилтай холбоотойгоор энэ жилийн хүүхдийн баярын өдрийг “Эрдэнэт цэцэрлэгт” хүрээлэнд тэмдэглэн өнгөрүүлэхээр бэлтгэл хангаж байна.
Энэ өдөр хүүхэд багачуудын чөлөөтэй, аюулгүй зорчих боломж нөхцөлөөр хангаж тодорхой хэсгийн авто замын хөдөлгөөнийг хязгаарлан “Авто машингүй өдөр” болгодог уламжлалтай.
Энэ жил “Эрдэнэт цэцэрлэгт” хүрээлэнд баярын үйл ажиллагааг зохион байгуулах болсонтой холбоотойгоор тус чиглэлийн А1002 авто зам буюу Сансар худалдааны төвийн баруун талын уулзвараас “Жаст Ойл” колонкийн уулзвар хүртэлх 1,2 км авто замыг “Авто машингүй бүс” болгох зохион байгуулалтыг хийж байна.
Тухайн өдрийн 09:00-20:00 цаг хүртэл дээрх чиглэлд хүүхдүүдэд үнэ төлбөргүй үйлчлэх нийтийн тээврийн автобуснаас өөр тээврийн хэрэгсэл замын хөдөлгөөнд оролцохгүй гэдгийг Замын цагдаагийн тасгаас мэдээлсэн.
Харин дамжин өнгөрч буй тээврийн хэрэгсэл Сансар худалдааны төвөөр баруун гар тийш эргэж, Онцгой байдлын уулзвар, гэр хорооллын бүсээр баруун чиглэлд зорчих хөдөлгөөн зохицуулалтыг хийж байна. Авто машинтай ирсэн иргэд Сансар худалдааны төв, ойр орчмын авто зогсоолд тээврийн хэрэгслээ байршуулах нь зүйтэй юм. Хязгаарлалтын бүс рүү нэвтрэхгүй, шуурхай албаны авто машин зорчих зохицуулалтыг хийж байна.
Иргэдийг автомашинаа Сансар худалдааны төв болон ойр орчмын зогсоолд байршуулж, хүүхдийн аюулгүй орчныг бүрдүүлэхэд хамтран оролцохыг уриаллаа. Энэ өдөр цагдаагийн байгууллагын алба хаагчид бүрэн бүрэлдэхүүнээрээ өндөржүүлсэн бэлэн байдалд ажиллана.
Мэдээллийн төв
