“Эрин зууны бахархал Эрдэнэт хотын  50 жил”-ийн ой, аймгийн Засаг даргын үйл ажиллагааны хөтөлбөрийн хүрээнд Орхон аймаг, Эрдэнэт хотоос төрөн гарсан спортын алдартнууддаа хүндэтгэл үзүүлж, тэдний нэрэмжит улсын чанартай тэмцээн уралдааныг орон нутагтаа зохион байгуулсаар байна. Орон нутагтаа  зохион байгуулж буй улс, бүсийн хэмжээний томоохон тэмцээнээр спортын алдартнуудаа алдаршуулах, тухайн спортыг хөгжүүлэх, хүүхэд залуусын спортоор хичээллэх хүсэл сонирхлыг нэмэгдүүлэх гэх мэт олон талын ач холбогдолтойгоос гадна  орон нутгийн аж ахуй эрхлэгчдэд  шууд орлогын эх үүсвэр бий болсон бодит дэмжлэг  үзүүлж байна.

Монгол Улсын гавьяат тамирчин, Олимпын хүрэл медальт Д.Нармандахын  нэрэмжит “Өсвөр үе, залуучууд, насанд хүрэгчдийн олон хотын аварга шалгаруулах тэмцээн” маргааш эхэлнэ

Энэ сарын 6-нд буюу маргааш  Монгол Улсын гавьяат тамирчин, Олимпын хүрэл медальт Д.Нармандахын  нэрэмжит “Өсвөр үе, залуучууд, насанд хүрэгчдийн олон хотын аварга шалгаруулах тэмцээн” эхэлнэ. Энэ жил түүний  1996 оны Атлантагийн олимпоос хүрэл медаль хүртэж,  Монгол Улсынхаа төрийн далбааг дэлхийн тавцанд  мандуулсаны 30 жилийн ой тохиож буй. Энэхүү түүхэн үйл явдалд хүндэтгэл үзүүлэн Эрдэнэт хотын 50 жилийн ойн хүрээнд тэмцээнийг зохион байгуулж байна. Монгол Улсын Гавьяат тамирчин, Олимпын хүрэл медальт Д.Нармандах Атланта 1996 олимпын их наадмаас хүрэл медаль, Ази тивийн аварга, мөнгө, хүрэл медальт, Дэлхийн аваргын тэмцээнд тавдугаар байрт шалгарч байсан,  “Зууны манлай жудоч” билээ.

Эрдэнэт хотын анхны дарга С.Цэвээн агсны нэрэмжит  самбын улсын аварга: Өнгөрсөн сарын 24-26-ны хооронд Эрдэнэт хотын анхны дарга, Монгол Улсад самбо бөхийг үүсгэн хөгжүүлэгчийн нэг С.Цэвээн агсны нэрэмжит “Самбо бөхийн өсвөр үеийн улсын аварга шалгаруулах тэмцээн”-ийг орон нутагтаа зохион байгуулсан.  С.Цэвээн агсан нь Эрдэнэт хотын хөгжил, бүтээн байгуулалтын эхэн үеийг удирдан чиглүүлсэн анхны дарга бөгөөд тухайн цаг үед аж үйлдвэр, нийгмийн дэд бүтцийг бүрдүүлэхэд чухал үүрэг гүйцэтгэсэн төр, нийгмийн зүтгэлтэн юм.  Тэрбээр зөвхөн хот байгуулалтын салбарт бус, нийтийн биеийн тамир, спортыг хөгжүүлэхэд онцгой анхаарч, ялангуяа самбо бөхийг Монголд дэлгэрүүлэхэд идэвх санаачилга гарган ажилласан түүхтэй.

Самбо бөх нь тухайн үед шинэ тутам хөгжиж байсан спортын төрөл байсан бөгөөд  С.Цэвээн агсны дэмжлэг, бодлогоор Орхон аймагт бэлтгэл сургуулилт хийх  орчин  бүрдүүлж, дасгалжуулагч, тамирчдыг бэлтгэх суурь тавигджээ. Мөн  түүний санаачилгаар олон тэмцээн уралдааныг орон нутагтаа зохион байгуулж, залуу үеийг энэхүү  спортоор хичээллэх хүсэл зорилгыг нь төрүүлснээр  самбо бөхийн анхны  тамирчид төрөн гарч, улс, тив, дэлхийд амжилт үзүүлж эхэлсэн гэдэг.

"Эрин зууны бахархал Эрдэнэт"  хотын  түүхт 50 жилийн ойн хүрээнд зохион байгуулсан   энэ удаагийн тэмцээн нь  үе үеийн самбо бөхөөр хичээллэж ирсэн тамирчдын  залгамж холбоог бэхжүүлэх, самбо бөхийн спортыг хөгжүүлэх чухал ач холбогдолтой үйл явдал болсон билээ.  Тэмцээнд 600 орчим өсвөрийн самбочид  18 жинд Азийн болон дэлхийн аварга шалгаруулах тэмцээнд эх орноо төлөөлөн оролцох эрхийн төлөө өрсөлдсөн.

Монгол Улсын хөдөлмөрийн баатар  Э.Содномпилжээгийн нэрэмжит Пауэрлифтингийн 20 дахь удаагийн улсын аварга

Монгол Улсын хөдөлмөрийн баатар, МУГТ, олимп, дэлхийн аварга Э.Содномпилжээгийн нэрэмжит “Пауэрлифтингийн 20 дахь удаагийн улсын аварга шалгаруулах тэмцээн” энэ сарын 2,3-ны өдрүүдэд болов. Э.Содномпэлжээ нь Монголын пауэрлифтингийн спортын түүхэн дэх хамгийн өндөр амжилт гаргасан, дэлхийн дээд амжилтыг эзэмшигч, "Рио-2016" олимпоос  хүрэл, "Токио-2020" олимпоос алт, "Парис-2024" олимпоос мөнгөн медаль хүртсэн  Монголын анхны тамирчин юм. Тэрээр,  14 насандаа их спортод хөл тавьж, дасгалжуулагч Ш.Энхсайханы удирдлага дор пауэрлифтингээр хичээллэж эхэлсэн бөгөөд 107 кг-ын жинд дэлхийн хамгийн хүчтэй тамирчдын нэгт  зүй ёсоор тооцогддог билээ. Тэмцээнд  10 аймаг, нийслэлийн 13 спорт клубын 200 гаруй тамирчин оролцсон.

Мэдээллийн төв