Монгол Улсын хөдөлмөрийн баатар, МУГТ, олимп, дэлхийн аварга Э.Содномпилжээгийн нэрэмжит “Пауэрлифтингийн 20 дахь удаагийн улсын аварга шалгаруулах тэмцээн” өнөөдөр эхэллээ. Тэмцээнийг "Эрин зууны бахархал Эрдэнэт"  хотын 50 жилийн ойн хүрээнд зохион  байгуулж буйгаараа онцлогтой.

Нээлтийн үйл ажиллагаанд УИХ-ын гишүүн, Засгийн газрын гишүүн Д.Батлут, аймгийн ИТХ-ын дарга Д.Мөнхбат,  Засаг дарга Б.Зоригтбаяр, Монголын пауэрлифтингийн нэгдсэн холбооны ерөнхийлөгч, Үндэсний шигшээ багийн дасгалжуулагч, Олон улсын нэгдүгээр зэрэгтэй шүүгч Д.Баттулга, Олимпын алт, мөнгө, хүрэл медальт,  Монгол Улсын хөдөлмөрийн баатар,  МУГТ  Э.Содномпилжээ болон бусад албаны хүмүүс оролцлоо.

Аймгийн ИТХ-ын дарга Д.Мөнхбат  "Эрдэнэт хотын унаган хүү, паралимпын алт, мөнгө, хүрэл медальт, Дэлхийн аварга, Монгол Улсын Хөдөлмөрийн баатар, Эрдэнэт хотын хүндэт иргэн Э.Содномпилжээгийн нэрэмжит пауэрлифтингийн улсын аварга шалгаруулах тэмцээнийг Эрдэнэт хотдоо зохион байгуулж байна. Түүний гаргасан амжилт зөвхөн спортын ялалт төдийгүй хүний хүсэл, зориг, хөдөлмөр, итгэл үнэмшил ямар их хүчтэйг харуулсан Монгол хүний бахархал юм" хэмээв. 

Мөн тэрээр, дэлхийд данстай, Монгол тамирчин төрүүлсэн багш, дасгалжуулач, Монголын пауэрлифтингийн холбооны ерөнхийлөгч Д.Баттулга танд гүн талархал илэрхийлж, Монгол түмэн, Эрдэнэтчүүдийнхээ нэрийн өмнөөс халуун баяр хүргэлээ.

Аймгийн удирдлагууд энэ үеэр Монгол Улсын хөдөлмөрийн баатар, Монгол Улсын Гавьяат тамирчин, олимп, дэлхийн аварга Э.Содномпилжээд хүндэтгэл үзүүлж, 50 сая төгрөгийн урамшуулал олголоо.

Э.Содномпэлжээ нь Монголын пауэрлифтингийн спортын түүхэн дэх хамгийн өндөр амжилт гаргасан, дэлхийн дээд амжилтыг эзэмшигч, "Рио-2016" олимпоос  хүрэл, "Токио-2020" олимпоос алт, "Парис-2024" олимпоос мөнгөн медаль хүртсэн  Монголын анхны тамирчин юм. Тэрээр,  14 насандаа их спортод хөл тавьж, дасгалжуулагч Ш.Энхсайханы удирдлага дор пауэрлифтингээр хичээллэж эхэлсэн бөгөөд 107 кг-ын жинд дэлхийн хамгийн хүчтэй тамирчдын нэгт  зүй ёсоор тооцогддог билээ.

“Пауэрлифтингийн 20 дахь удаагийн улсын аварга шалгаруулах тэмцээн” олон улсын пауэрлифтингийн тэмцээний /IPF/ дүрмээр эрэгтэй, өсвөрийн, залуучууд, насанд хүрэгчид болон мастер 1, 2, 3 ангиллаар, эмэгтэй өсвөрийн, насанд хүрэгчдийн, мастер 1 ангилал хэвтээ босоо түлхэлттэй 3 төрлөөр явагдана.

Пауэрлифтингийг хүч чадлын спорт гэдэг. Штангтай суулт, цээжнээс шахалт, үндсэн таталт гэсэн  өргөлтөөр тус тус гурван удаагын оролдлогоор хамгийн хүнд жинг өргөх тэмцээн юм.

Энэ удаагийн улсын аваргад Мастер ангиллын дэлхийн аварга, МУГТ, ОУХМ С.Энхбат, ОУХМ насанд хүрэгчдийн эмэгтэйчүүдийн ДАШТ-ний нийлбэр дүнгийн алт, мөнгөн медальт ОУХМ С.Мөнхзул, дэлхийн аваргын мөнгөн медальт ОУХМ Сайфоло, насанд хүрэгчдийн дэлхийн аваргын хүрэл медальт ОУХМ, Ази номхон далайн аварга н.Галсайхан, мастер ангиллын ДАШТ-ний мөнгөн медальт ОУХМ Х.Баттөмөр, мастер 3 ангиллын тамирчдын ДАШТ-ийн алт, Ази тивийн аварга, ОУХМ Жаргалсайхан тэргүүтэй 10 аймаг, нийслэлийн 13 спорт клубын 200 гаруй тамирчин оролцож байна.  

Тэмцээний ерөнхий шүүгчээр Монгол Улсын хөдөлмөрийн баатар,  Монгол Улсын Гавьяат тамирчин, олимпын алт, мөнгө, хүрэл медальт улсын шүүгч Э.Содномпэлжээ, Хяналтын шүүгчээр Олон улсын шүүгч Б.Энхбаяр, шүүгчээр ОУХМ насанд хүрэгчдийн эмэгтэйчүүдийн ДАШТ-ний нийлбэр дүнгийн алт, мөнгөн медальт ОУХМ С.Мөнхзул, Мастер ангиллын дэлхийн аварга, МУГТ, ОУХМ С.Энхбат, Монголын пауэрлифтингийн нэгдсэн холбооны дэд ерөнхийлөгч, Олон улсын шүүгч Н.Отгонбаяр тэргүүтэй 10 шүүгч ажиллаж байна.

20 дахь удаагийн улсын аваргын тэмцээнийг аймгийн Засаг Даргын Тамгын газар, Монголын Пауэрлифтингийн нэгдсэн холбоо, Орхон аймгийн Пауэрлифтингийн салбар холбоо хамтран зохион байгуулж байна.

Мэдээллийн төв