Улсын аварга тариаланч, малчдын шагналыг гардууллаа

Гал морин жилийн сар шинийн босгон дээр Орхон аймаг, Эрдэнэт хотоос зургаан улсын аварга тодорлоо. Өнөөдөр УИХ-ын гишүүн, Батлан хамгаалахын сайд Д.Батлут, аймгийн Засаг дарга Б.Зоригтбаяр нар улсын аварга малчин, тариаланчийн шагналыг гардуулав.

Буянт мал сүргээ 63 дахь жилдээ маллаж буй Жаргалант сумын Дулаан-Уул багийн малчин О.Баянцэрэн, С. Дуламжав нар Орхон аймгийн 18 дахь УЛСЫН АВАРГА МАЛЧИН-аар тодорсон юм. 10 гаруй настайгаасаа мал дагасан тэрээр, малдаа тарга хүч авахуулах, өвөлжилт, хаваржилтын бэлтгэлээ эртнээс базааж, зун намрын улиралд отор нүүдэл хийн малаа малладаг туршлагатай.

Сүүлийн гурван жилд малын хорогдол гаргаагүй, ялангуяа өнгөрсөн оны өвөл, хаврын цаг агаарын хүндрэлтэй нөхцөлд малаа бүтэн онд оруулсан цөөн малчдын нэг юм. Сүүлийн жилүүдэд үхэр, хонин сүргээ махны чиглэлээр өсгөн үржүүлж, мэргэжлийн байгууллагатай хамтран биотехнологийн ололтыг нэвтрүүлсэн түүний малч арга ухаанаас залуу малчид суралцаж байна.

Тухайлбал, адуун сүрэгт Монгол үүлдрийн шилмэл хээлтүүлэгч, үхэр сүрэгт Сэлэнгэ, Герефорд үүлдрийн бух, хонин сүрэгт Баяд үүлдрийн хуцыг үндсэн сайжруулагчаар ашиглаж байна.
О.Баянцэрэн гуай бэлчээрийн усан хангамжийг сайжруулж, Айргийн хөндийдөө шинээр гар худаг гарган өрхийн хэрэгцээнд болон ойр хавийн малчдын малыг усаар хангаж байна.

Түүнчлэн нийгмийн хариуцлагын хүрээнд 2015 онд сумын малжуулах хөтөлбөрт 3 тугалтай үнээ хандивлаж, 2016 оноос сумынхаа амжиргааны түвшин доогуур 1-2 өрхийг 100 гаруй бог, 20 бод малаар малжуулж, нийгмийн асуудлыг шийдвэрлэхэд бодит хувь нэмэр оруулж иржээ.

Газар тариалангийн салбарт 22 дахь жилдээ хөдөлмөрлөж буй удам дамжсан залуу тариаланч Батчулууны Жавхлангийн гэр бүл “Монгол Улсын аварга тариаланч” болсрн шагналыг мөн энэ өдөр гардууллаа. Б.Жавхлан нь 2003 оноос эхлэн өөрийн эзэмшлийн 3 га газарт төмс, хүнсний ногоо тариалж, өдгөө 7 га талбайд тариалалт эрхэлж байна.

Таримал бүрд тохирсон хөрс боловсруулалт, агротехникийг нягт баримтлан ажилладаг хөдөлмөрч тэргүүний тариаланчдын нэг юм. Жаргалант сумынхаа ногоочидтой хамтран 2017 онд “Шонхорын хүч” хоршоог үүсгэн байгуулж, түүгээрээ борлуулалтаа хийн ард иргэдээ эрүүл, аюулгүй хүнсээр хангаж байна. Тэрээр, сүүлийн гурван жилд өндөр ургац хурааж, 120 тоннын багтаамжтай зоорь байгуулан үйлдвэрлэлээ өргөжүүлж, 20–30 хүнийг ажлын байраар ханган ажиллуулж байна.

2008, 2015 онд “Тэргүүний тариаланч залуу” алтан медаль, 2018 онд “Аварга тариаланч”, 2021 онд “Аймгийн аварга тариаланч” цол, ХХААХҮЯ-ны “Тэргүүний ажилтан” тэмдэг, 2024 онд сумын 9 алдартны нэгээр шалгарч байсан юм.

Мэдээллийн төв