Казах түмний Наурызын баярыг угтан мөн  орон нутагт  аялал жуулчлалыг  хөгжүүлэх зорилгоор “Бүргэдийн  баяр-2026” арга хэмжээг энэ сарын 15-нд зохион байгуулна. 2023 онд энэхүү үйл ажиллагааг орон нутагт анх удаа зохион байгуулж байсан бол Эрдэнэт хотын 50 жилийн ойн хүрээнд гурван жилийн дараа дахин зохион байгуулахаар бэлтгэл хангаж байна. 

Орхон аймаг, Эрдэнэт хотод 800 орчим Казах үндэстэн ажиллаж, хөдөлмөрлөн амьдарч буй.   Аймгийн ЗДТГ, Соёл урлаг, аялал жуулчлал, залуучуудын газар,  Баян-Өлгий аймгийн ЗДТГ, Орхон аймаг дахь нутгийн зөвлөл хамтран зохион байгуулж буй уг арга хэмжээнд иргэдийг өргөнөөр оролцож Казах түмний өвөрмөц соёл, ёс заншилтай танилцахыг урьж байна. 
Казах түмний “Наурызын баяр” тэмдэглэх уламжлал нь нүүдлийн мал аж ахуй эрхэлдэг нүүдэлчид, ялангуяа Казах малчдын ахуй амьдралд холбогдох ёс заншил, уламжлалыг шингээж, байгаль дэлхийгээ хайрлан хамгаалах, ахмад настнаа хүндэтгэн дээдлэх өвөрмөц уламжлалыг бий болгож, үеэс үед өвлөгдөн ирснээрээ онцлогтой юм.

Соёлын биет бус өвийн олон илэрхийллийг агуулдаг учир Казахын ард түмний ёс заншил, уламжлалт сэтгэлгээ, соёлын уламжлалыг хамгаалж, хойч үедээ өвлөн үлдээхэд нийгэм, соёлын чухал үүрэгтэй баяр билээ. 

Дэлхий дахинд Ойрхи Дорнод, Балканы хойг, Төв Ази, Кавказ зэрэг газар нутгийн 300 сая гаруй хүн Наурыз баярыг өргөн тэмдэглэн өнгөрүүлдэг байна. 2010 оноос эхлэн Тажикстан, Азербайжан, Афганистан, Казахстан, Кыргыз, Иран, Туркменистан, Турк зэрэг орны төлөөлөгчдийн өргөн барьсан хүсэлтийн дагуу НҮБ-ын Ерөнхий Ассамблейн 64 дэх хуралдааны үеэр Наурызыг Олон улсын баяр болгон баталжээ.  Казах түмний ёс заншил, өв уламжлал, дахин давтагдашгүй өвөрмөц соёлыг таниулах, хойч үедээ өвлүүлэн үлдээх зорилгоор энэ жил  нийслэл Улаанбаатар хотод 16 дахь жилдээ  зохион байгуулж буй. 

Эрдэнэт цэнгэлдэх хүрээлэнд зохион байгуулах энэхүү арга хэмжээний  Баян-Өлгий аймгийн М.Хурманханы нэрэмжит “Алтан гадас” одонт хөгжимт     драмын театрын уран бүтээглчдийн  урлагийн тоглолтоо толилуулна.

 Мөн Бүргэдийн үзүүлбэр,  Морьт барилдаан (Аударыспақ), Эмэгтэй, эрэгтэй хосын морин дээрх үзүүлбэр (Кыз куар), Тулам булаалдах (Көкпар) , Морин дээрээс зоос шүүрэх (Тенге илу) тэмцээн зэрэг олон сонирхолтой үзүүлбэр болно. Тухайлбал, Тулам булаалдах нь казах түмний эртнээс уламжилж ирсэн эр зориг, хурд хүч, авхаалж самбааг сорьдог үндэсний тоглоом юм. Ан агнуур, нүүдэлчин амьдралтай холбоотойгоор үүссэн гэж үздэг. Эрт цагт ангийн олз, ялангуяа арьс, тулам-ыг булаацалдах явц нь энэ тоглоомын эх үүсвэр болсон байна.  Энэхүү тоглоом нь   залуу эрчүүдийг бие бялдрын хувьд чийрэгжүүлэх, багийн эв нэгдэл, өрсөлдөх чадварыг хөгжүүлэх, ан агнуурт хэрэгтэй чадваруудыг дадал болгох зорилготой юм. 

Мэдээллийн төв