Өсвөрийн үндэсний бөхийн багийн улсын аварга болно
Эрдэнэт хотын 50 жилийн ойн хүрээнд Өсвөр үеийн үндэсний бөхийн багийн улсын аварга шалгаруулах анхдугаар тэмцээн энэ сарын 20-22-ны өдрүүдэд манай аймагт болно. Үндэсний бөхийн спортыг хүүхэд, залуучуудын дунд түгээн дэлгэрүүлэх, бие бялдар болон зан суртахууны төлөвшлийг дэмжих, өсвөр үеийн тамирчдын ур чадварыг нэмэгдүүлэх, ирээдүйн өндөр цолтой бөхчүүдийн залгамж халааг бэлтгэх нь энэхүү тэмцээний зорилго юм.
Тэмцээнд 2011 оны нэгдүгээр сарын 1-нээс арванхоёрдугаар сарын 31-ний хооронд төрсөн хөвгүүд оролцох боломжтой. Бүртгэл Хангарди спорт цогцолборт энэ сарын 19-ний өдөр 10:00-17:00 цагийн хооронд явагдана.
Тус тэмцээнийг аймгийн Засаг даргын Тамгын газар, Биеийн тамир, спортын газар, Монголын Үндэсний бөхийн холбоо, “Эрдэнэт Үйлдвэр” ТӨҮГ-ын Хангарди спорт цогцолбор, Орхон аймгийн Үндэсний бөхийн холбоо, Баян-Өндөрийн Хүчтэн дэвжээ хамтран зохион байгуулж байна.
Мэдээллийн төв
