Аймгийн Биеийн тамир спортын газрын дарга Д.Дэлгэрбаяртай 2025 оны спортын салбарт өрнөсөн  үйл явдлын талаар ярилцлаа. 

-2025 онд Орхон аймгийн  спортын салбар ямар онцлогтой жил болж байна вэ.  Хамгийн сүүлийн амжилтын мэдээллээсээ хуваалцвал? 
-Амжилт, ялалтын мэдээ их байна аа. Хамгийн сүүлийн ялалт гэвэл аравдугаар сарын 25,26-нд Улаанбаатар хотод зохион байгуулсан гар дээр суниалтын улсын аварга  шалгаруулах анхдугаар тэмцээнд манай аймгаас 30  тамирчин оролцож 5 алт, 2 мөнгө, 2 хүрэл хүртсэн амжилтыг үзүүллээ. 

2025  он Орхон аймгийн спортын салбар амжилт арвинтай жил болж байна. Улс, бүс, тив дэлхийн олон тэмцээн уралдаанд баг тамирчид маань амжилттай оролцож, эх орон, аймаг орон нутгийнхаа нэрийг өндөрт дуурсгалаа.  2025 онд 378 медалийг баг тамирчид маань  хүртсэнээс 117 алт, 97 мөнгө, 164 хүрэл медалийг эх орон,  орон нутагтаа авч ирсэн  байна. 
Мөн Засгийн газрын тогтоолоор зохион байгуулдаг спортын гурван том наадам  энэ жил боллоо. 
 Монголын хүүхдийн спортын өвлийн VIII наадам,  Монголын хүүхдийн спортын зуны VIII  наадам, Монголын бүх ард түмний 16-р их наадамд оролцсон баг тамирчид бахдам амжилтыг үзүүллээ. 

-Эдгээр томоохон тэмцээнүүдээс  Монголын хүүхдийн спортын өвлийн VIII наадмыг онцолж асуумаар байна. Өвлийн спортын түүхэнд анх удаа  Орхон аймгийн тамирчид нэгдсэн дүнгээрээ дэд байрт шалгарсан шүү дээ? 

-Тэгэлгүй яах вэ.  Өвлийн спортын 5 төрөлд  73 тамирчин 10 дасгалжуулагч багшийн хамтаар оролцож 10 алт, 13 мөнгө, 9 хүрэл медаль хүртсэн.  

Өвлийн спортын түүхэнд анх удаа  манай аймгийн баг тамирчид хоёрдугаар байрт орж, мөнгөн медаль хүртлээ. 

 2023 онд Монголын хүүхдийн спортын өвлийн VII наадмыг манай аймаг орон нутагтаа зохион байгуулахад бид багийн нэгдсэн дүнгээрээ 4-р байранд шалгарч байлаа. Хоёр жилийн дараа хоёрдугаар байранд шалгарна гэдэг өвлийн спортын хөгжил, тамирчдын ур чадвар хэр сайжирсныг харуулж байна. 

Өвлийн спортыг орон нутагтаа хөгжүүлэхэд үе үеийн аймгийн удирдлагууд  онцгой анхаарч ирснийг энд дурдах нь зүйтэй. 

Хөвсгөл  аймаг тэшүүр, Булган аймаг  цана, Төв аймаг цана, тэшүүр нь жигд хөгжсөн. Олон арван жилийн хөгжлийн түүх, олон арван шилдэг  тамирчид төрөн гарсан аймгууд. Өвлийн спортыг 5 дахь жилдээ хөгжүүлж буй манай аймгийн тамирчид эн тэнцүү өрсөлдөж багийн дүнгээрээ мөнгөн медаль хүртэнэ гэдэг маш том амжилт, бахархал юм. 

2021 оноос “Өвлийн спортыг хөгжүүлэх дэд хөтөлбөр”-ийг хэрэгжүүлж эхэлсэн. Энэхүү хөтөлбөрийг дөрвөн жил хэрэгжүүлээд төсөл хөтөлбөр болон үргэлжилж байна. Улсын аваргын тэмцээнтэй дүйцэхүйц “Мөнгөн өвөл” спортын тэмцээнийг жил бүр манай аймаг  уламжлал болгон зохион байгуулж байна.   Нийслэл, 21 аймгаас чансаа өндөртэй  тамирчид оролцдог, тамирчдын хүсэн хүлээдэг тэмцээн болсон. “Мөнгөн өвөл”-өө өргөжүүлж мөсний шагайн харваа, сур харваагаар хүрээг нь тэлсэн. 

Монголын хүүхдийн спортын зуны наадамд спортын 30 төрөлд 297 тамирчин, 51 дасгалжуулагчтай баг тамирчид оролцсон. 15 алт 15 мөнгө, 25 хүрэл медаль хүртэж аймгуудаа тэргүүлсэн. Монголын бүх ард түмний зуны спортын наадам энэ жил Баянхонгор аймагт болсон. Манай аймгаас 26 спортын төрөлд 256 тамирчин оролцож, 23 алт, 14 мөнгө, 35 хүрэл медаль хүртсэн амжилтыг үзүүлсэн. Баг тамирчид маань амжилт гаргаж байгаа нь аймгийн  ИТХ, ЗДТГ-аас аливаа нэг спортын төрлийг орон нутагтаа хөгжүүлэх, спортыг дэмжиж буй хөрөнгө оруулалт, бодлого үйл ажиллагаатай салшгүй холбоотой юм. 

Спортын бүх төрлөөр тэмцээн уралдаанд орно гэдэг орон нутагта аспортын шинэ  төрлийг хөгжүүлж, нутагшуулсны үр дүн гэж хэлмээр байна. 

- Орхон аймгийг спортын дэд бүтэц сайтай гэдэг. Энэ дэд бүтцээ Орхон аймаг, Эрдэнэт хотын  хүүхэд, залуус яаж бүрэн дүүрэн ашиглах боломжтой вэ. Биеийн тамирын хичээл яагаад заавал зааланд ордог байх ёстой гэж? 

-Яг зөв. Биеийн тамирын хичээл яагаад заавал  зааланд ордог байх ёстой гэж. Өвлийн спортоор жишээлж ярья.  Өвлийн өлчир цагт гадаа талбайд  цас, мөсөн дээр цана чаргаар хичээл орж болно. Өнөөгийн нөхцөлд Орхон аймагт ингэж хичээллэх дэд бүтэц, боломж нь бүрдсэн. Боловсролын байгууллагатай хамтарч ажиллахаар санал дэвшүүлээд явж байна.  

Өвлийн спортыг хөгжүүлэх дэд хөтөлбөрийг хэрэгжүүлсний үр дүнд бид бурантай боллоо, цасны буутай боллоо. Сарьхиа цанын бааз дээрээ уралдааны цанын замаа өөрсдөө тавьж байна. Цэнгэлдэх хүрээлэндээ жил бүр мөсөө тавьдаг боллоо.  Эхлээд хүүхдүүд сонирхож цас, мөсөн дээр  тоглоно. Дараа нь  спортын аль нэг төрлөөр  хичээллэх сонирхол  төрнө.  Цаашлаад тэмцээн уралдаанд оролцох хүсэл, зорилготой болно. 

Аймгийн ИТХ, ЗДТГ бодлогоо зөв тодорхойлж, түүнрүүгээ чиглэсэн хөрөнгө оруулалтыг оновчтой хийсний үр дүнд бид өнөөдөр цаашдын хөгжлөө ярих боломжтой болсон. 

Гэсэн хэдий ч бидэнд шийдвэрлэх, анхаарах ёстой асуудлууд байна. Спортын барилга байгууламжынхаа хүртээмжийг нэмэгдүүлэхэд анхаарч байна. Манай аймгийн хэмжээнд 38 спорт заал бий. Нэг хүнд ногдох спорт заалны хүртээмж маш багад тооцогддог. Манай газрын заал  зарим өглөө 6 цагт онгойж оройн 22 цагт үйл ажиллагаа дуусдаг. Энэ  хооронд тасралтгүй секц дугуйлан хичээллэж байна. 

Аймгийн Засаг дарга үүнд анхаарч үйл ажиллагааныхаа мөрийн хөтөлбөрт, спорт заалны хүртээмжийг сайжруулж, нэмэгдүүлэх зорилгоор “Эрдэнэт аренаг”  барьж байгуулахаар тусгасан.

-Ирэх жил Эрдэнэт хот байгуулагдсаны 50 жлийн ой тохионо. Ойн хүрээнд төлөвлөсөн ажлаасаа сонирхуулбал. 

-Эрдэнэт хотынхоо 50 жилийг ойг угтан спортын 50 арга хэмжээг зохион байгуулахаар төлөвлөсөн. Ирэх арваннэгдүгээр сард “Мөнгөн өвөл” тэмцээн болно. Он гараад  Монгол Улсын хөдөлмөрийн баатар, гавьяат тамирчин, паралимпын аварга Э.Содномпилжээгийн нэрэмжит  Фаурлифтингийн улсын аварга шалгаруулах тэмцээн, шатрын дэлхийн аварга Б.Мөнгөнзулын нэрэмжит шатрын улсын аварга шалгаруулах тэмцээн, Самбо бөхийн холбооны анхны ерөнхийлөгч, Эрдэнэт хотын анхны дарга Цэвээн гуайн нэрэмжит самбо бөхийн тэмцээнийг тус тус зохион байгуулахаар төлөвлөөд байна.  Монгол Улсад самба бөхийг хөгжүүлэхэд энэ хүн үнэтэй хувь нэмэр оруулсан. Энэ мэт тив дэлхий, олон улсад эх орныхоо нэрийг өндөрт өргөсөн эрхмүүд, залуу тамирчдынхаа алдар гавяаг  залуу үедээ сурталчлан таниулах, тэднээр дамжуулан спортоор хичээллэх хүсэл, зорилгыг нь бадраах олон ажлыг төлөвлөөд байна. 

Мэдээллийн төв