2024 оны 04-р сарын 18

Байт харвааны заалны 2023 оны улсын аваргаар “Хангарди”  клубийн баг тамирчид  шалгарлаа 

Байт харвааны заалны улсын аварга шалгаруулах 15 дахь удаагийн тэмцээн энэ сарын 23-нд Орхон аймаг, Эрдэнэт хотод эхэлж  өнөөдөр амжилттай өндөрлөлөө. 15 дахь удаагийн  Байт харвааны заалны улсын аварга шалгаруулах тэмцээн анх удаа орон нутагт зохион байгуулагдсан нь Орхон аймаг, Эрдэнэт хот  байлаа. Ингэхдээ улс орон даяар шууд дамжуулж, олон улсын стандартад нийцүүлсэн, урьд жилүүдийнхээс хамгийн олон тамирчин цэц мэргэнээ сорьсон  гээд олон шинэлэг санал санаачилгыг нэвтрүүлсэн онцлогтой болов.

Монгол орны өнцөг булан бүрээс ирсэн 307  тамирчин рекувр болон компаунд төрлөөр U14, U18, U21, насанд хүрэгчид гэсэн ангилалд өрсөлдсөн юм. Рекувр төрөлд ангилал тус бүрд эрэгтэй, эмэгтэй хувийн харваа, багийн харваа, холимог багийн харваагаар өрсөлдсөн бол бол компаунд төрөлд эрэгтэй, эмэгтэй хувийн харваа, эрэгтэй багийн харваа ангиллаар  цэц мэргэнээ сорьж, шинээр спортын  цолтнууд олноор төрөн гарсан  чансаа өндөртэй тэмцээн боллоо гэж багш, дасгалжуулагчид, зохион байгуулагчид дүгнэлээ. 

Тамирчдын шагналыг аймгийн Засаг даргын орлогч, ажлын хэсгийн ахлагч А.Түвшинжаргал, Монголын байт харвааны холбооны ерөнхийлөгч С.Эрдэнэболд, дэд ерөнхийлөгч Т.Номинчулуун, Эрдэнэт үйлдвэр ТӨҮГ-ын Спорт цогцолборын дарга МУГТ Ш.Даваахүү, аймгийн Биеийн тамир спортын газрын дарга Д.Дэлгэрбаяр нарын хүмүүс гардуулав. 
15 дахь удаагийн улсын аваргад Орхон аймаг, Эрдэнэт хотын “Хангарди” клубын баг, тамирчид багийн дүнгээрээ тэргүүлж нэгдүгээр байранд орсон бахдам амжилтыг үзүүллээ. 

Орхон аймаг, Эрдэнэт хотын удирдлагууд  2022 онд байт харвааны тамирчиддаа  20 сая төгрөгийн тоног төхөөрөмжийг шийдвэрлэсэн нь тамирчдад ихээхэн дэмжлэг болсон гэдгийг тамирчид хэлж байсан юм. Тухайлбал,  байт харвааны заалны улсын аварга шалгаруулах тэмцээнд “Хангарди клуб”, “Ирээдүйн Одод” сургуулийн баг тамирчид 2013 оноос хойш тасралтгүй найман удаа тэргүүлсэн амжилтыг  үзүүлээд байсан бол 2023 онд ес болж амжилтаа зузаатгав. 


Мөн спортын төрөлжсөн сургалттай “Ирээдүй Одод” сургуулийн тамирчид энэ удаагийн улсын аваргаар бахдам амжилтыг үзүүллээ. U14 насны эрэгтэй багийн ангилалд нэгдүгээр байр, U18 насны эрэгтэй багийн ангилалд нэгдүгээр байр, U21 насны эрэгтэй багийн төрөлд хоёрдугаар байр гэхчлэн амжилт үзүүлсэн юм.
    Мөн байгууллагын дүнгээр хоёрдугаар  байранд Батлан хамгаалах яамны харьяа “Алдар спорт хороо”, гуравдугаар байранд нийслэлийн “Галт сум” спорт клубийн баг тамирчид шалгарлаа. 

Тэмцээнийг зохион байгуулахад Монгол Улсын “Баатар” Эрдэнэт үйлдвэр ТӨҮГ, Монголын байт харвааны холбоо, аймгийн Биеийн тамир, спортын газар, “Юнител” ХХК-ны Орхон аймгийн салбар ихээхэн дэмжлэг үзүүлж, хамтран ажиллав.  Бусад төрөл ангилалд амжилттай оролцсон баг, тамирчдын эргэн мэдээлэх болно. 

Мэдээллийн төв 

 

Санал асуулга

Манай вэб сайт таны санаанд хэр нийцэж байна?

Нийт саналын тоо:  64246

Facebook

Цаг агаар

Вебийн статистик

Таны IP хаяг: 3.235.172.123
  • 4 Онлайн
  • 415 Өнөөдөр
  • 327 Өчигдөр
  • 1545 Долоо хоногт
  • 15206 Сүүлийн сард
  • 6930418 Нийт хандалт