Аймгийн ИТХ-ын ээлжит бус 12 дугаар хуралдаанаар 2026 оны төсвийн тодотголыг төлөөлөгчдийн 61 хувийн саналаар хэлэлцэж баталлаа. Аймгийн 2026 оны тодотгосон төсвийн нийт орлогыг 445.1 тэрбум төгрөгөөр тооцож, анх батлагдсан төсвөөс 23  тэрбум төгрөгөөр нэмэгдүүллээ.

Төсвийн орлогын энэхүү өөрчлөлтөд орлогын эх үүсвэрийн бодит гүйцэтгэл, орон нутгийн төсөв хоорондын шилжүүлэг болон өмнөх оны мөнгөн хөрөнгийн үлдэгдлийг ашиглах боломжийг харгалзан үзжээ.

Тухайлбал, Баян-Өндөр сумын төсвөөс аймгийн төсөвт төвлөрүүлэх орлогыг 7.2 тэрбум төгрөгөөр, Орон нутгийн хөгжлийн сангийн орлогын шилжүүлгийг 8.6 тэрбум төгрөгөөр, өмнөх оны мөнгөн хөрөнгийн үлдэгдлээс санхүүжүүлэх эх үүсвэрийг 10.4 тэрбум төгрөгөөр,  Аж ахуйн нэгжийн орлогын албан татварын орлогыг 2.9 тэрбум төгрөгөөр,  Эрдэнэт үйлдвэрийн хамтын ажиллагааны санхүүжилтийн орлогыг 1.1 тэрбум төгрөгөөр тус тус бууруулан тооцжээ.

ХАВДРЫН ДЭД ТӨВИЙН 177 АЖИЛТАН, АЛБАН ХААГЧДАД ОРОН НУТГИЙН НЭМЭГДЭЛ ОЛГОНО

Төрийн үйлчилгээний албан хаагчдын цалингийн нэмэгдэл болон Хойд бүсийн хавдрын төвийн 177 ажилтан, албан хаагчдад орон нутгийн нэмэгдэл олгохоор боллоо. Энэ нь эрүүл мэндийн болон төрийн үйлчилгээний байгууллагуудын хүний нөөцийн тогтвортой байдлыг дэмжих, ажилтан, албан хаагчдын хөдөлмөрийн нөхцөл, нийгмийн баталгааг хангахад чиглэсэн арга хэмжээ болж байна.

ХӨРӨНГӨ ОРУУЛАЛТЫН АЖЛЫГ БҮРЭН ДУУСГАХ ТӨСВИЙГ ШИЙДЭВ

Мөн орон нутагт хэрэгжиж буй хөрөнгө оруулалт, бүтээн байгуулалтын ажлын явц, санхүүжилтийн хэрэгцээ болон гүйцэтгэлийн нөхцөл байдалд үнэлэлт дүгнэлт хийж, зайлшгүй шаардлагатай нэмэлт зардлуудыг төсвийн тодотголд тусгажээ.

Тухайлбал, батлагдсан зураг төсөв, төсөвт анхнаасаа тусгагдаагүй боловч барилга угсралт, бүтээн байгуулалтын ажлын явцад зайлшгүй гүйцэтгэх шаардлага үүссэн нэмэлт ажлуудын санхүүжилтийг холбогдох тооцоо, үндэслэлд тулгуурлан шийдвэрлэхээр төлөвлөсөн. Энэ нь нэгэнт эхэлсэн хөрөнгө оруулалтын ажлыг бүрэн дуусгах, ашиглалтад оруулах нөхцөлийг бүрдүүлэх, өмнө зарцуулсан хөрөнгийн үр өгөөжийг нэмэгдүүлэхэд чиглэж байна.

Хөрөнгө оруулалтын төлөвлөлтөд орсон томоохон өөрчлөлтүүдээс дурьдвал: 2025 оны хөрөнгө оруулалтын 93 ажлын зохиогчийн болон техник хяналтын зардал, баталгааны 5 хувийн зардлыг олгохоор 2,3 тэрбум төгрөгийг шилжих хөрөнгө оруулалт дээр  нэмж тусгалаа.

Авто замын 1 ажил, спорт заал барих 3 ажил, Төрийн үйлчилгээний нэгдсэн төв барих 1 ажил нийт 5 ажлын санхүүжилтийг гүйцэтгэлд үндэслэн олгохоор 9,5 тэрбум төгрөгөөр нэмэгдүүлэн төлөвлөжээ. сөн.  23 ажилд нэмэлт ажил гүйцэтгүүлэх  зардалд 9 тэрбум төгрөгийг тус тус тусган хэрэгжүүлэхээр боллоо. 2026 оны улсын  төсвийн тодотголтой уялдуулан аймгийн төсвөөс улсын төсөвт төвлөрүүлэх орлогын хэмжээг 2.3 тэрбум төгрөгөөр буурснаар орон нутгийн төсөвт үлдэх санхүүгийн эх үүсвэр нэмэгдэх таатай нөхцөл бүрдэж байна.

ИРЭХ ХАВРЫН НӨӨЦИЙН МАХ БЭЛТГЭЛД  4 ТЭРБУМ ТӨГРӨГ ЗАРЦУУЛНА

Засгийн газрын холбогдох тогтоол, албан даалгаврын хэрэгжилтийг хангах, хаврын улиралд махны нийлүүлэлтийн тогтвортой байдлыг дэмжих, үнийн хэт өсөлтөөс урьдчилан сэргийлэх зорилгоор нөөцийн мах бэлтгэх арга хэмжээг хэрэгжүүлэхээр төлөвлөлөө.

Тус арга хэмжээний санхүүжилтийг сангийн мөнгөн хөрөнгийн чөлөөт үлдэгдлээс 2,8 тэрбум төгрөгийг,  газрын  дуудлага худалдааны орлогоос 1,2 тэрбум төгрөгийн орлогыг төвлөрүүлэн нийт  4 тэрбум төгрөгөөр хэрэгжүүлнэ.

Мэдээллийн төв