Орхон аймаг хүлэмжийн хийгээ тоолж, үр дүнгийн тайланг хүлээн авлаа
Орхон аймаг уур амьсгалын өөрчлөлтийг сааруулах, хүлэмжийн хийн ялгарлыг бууруулах, байгаль орчинд ээлтэй, тогтвортой хөгжлийн бодлогыг хэрэгжүүлэх хүрээнд улсын хэмжээнд хүлэмжийн хийн тооллогыг анх удаа зохион байгууллаа.
Хүлэмжийн хийн тооллого нь тухайн нутаг дэвсгэрийн хэмжээнд эрчим хүч, аж үйлдвэрлэл, хог хаягдал, хөдөө аж ахуй болон бусад холбогдох салбарын үйл ажиллагаанаас үүсэж буй хүлэмжийн хийн ялгарлыг тооцож, эх үүсвэр, хэмжээ, бүтцийн талаарх нэгдсэн мэдээллийн сан бүрдүүлэхэд чиглэсэн чухал ач холбогдолтой ажил юм.
Энэхүү тооллогын үр дүн нь Орхон аймгийн уур амьсгалын өөрчлөлтийн эсрэг авах арга хэмжээ, хүлэмжийн хийн ялгарлыг бууруулах бодлого, хөтөлбөрийг шинжлэх ухааны үндэслэлтэй төлөвлөх, хөрөнгө оруулалт болон төсөл, арга хэмжээг оновчтой тодорхойлох, хэрэгжилтийн үр дүнг цаашид хэмжих, үнэлэх чухал суурь мэдээлэл болно. Өөрөөр хэлбэл, хүлэмжийн хийн тооллогын мэдээлэлд үндэслэн эрчим хүчний үр ашигтай хэрэглээг нэмэгдүүлэх, сэргээгдэх эрчим хүчний хэрэглээг дэмжих, нийтийн болон байгальд ээлтэй тээврийн шийдлийг нэмэгдүүлэх, хог хаягдлын менежментийг боловсронгуй болгох, дахин ашиглалт, дахин боловсруулалтыг өргөжүүлэх зэрэг хүлэмжийн хийн ялгарлыг бууруулах чиглэлээр цаашид хэрэгжүүлэх арга хэмжээний бодит хэрэгцээ, тэргүүлэх чиглэлийг тодорхойлох боломж бүрдэнэ.
Үйлдвэрлэл, хотжилт өндөр хөгжсөн бүс нутгийн хувьд хүлэмжийн хийн ялгарлыг бууруулах, ногоон хөгжлийн шилжилтийг эрчимжүүлэхэд онцгой анхаарч байгаа бөгөөд энэхүү тооллогыг хийж гүйцэтгэсэн нь аймгийн хэмжээнд уур амьсгалын өөрчлөлтийн бодлогыг тоон мэдээлэл, шинжлэх ухааны үндэслэлд тулгуурлан хэрэгжүүлэх чухал алхам болж байгааг албаныхан онцоллоо.
Цаашид тооллогын үр дүнг аймгийн хөгжлийн бодлого, төлөвлөлттэй уялдуулан ашиглаж, хүлэмжийн хийн ялгарлыг бууруулах зорилтот арга хэмжээ, төсөл хөтөлбөрийг үе шаттай хэрэгжүүлэх, үр дүнг тогтмол тооцож, хянах чиглэлээр ажиллах юм. Монгол Улсын хэмжээнд аймгийн нутаг дэвсгэрийн нийт хүлэмжийн хийн ялгарлыг олон улсын аргачлалд нийцүүлэн тооцож, тооллогын нэгдсэн тайланг анх удаа боловсруулсан нь “Ногоон хот”-ыг бий болгох, уур амьсгалын өөрчлөлтийн эсрэг бодитой арга хэмжээ хэрэгжүүлэхэд чухал ач холбогдолтой ажил боллоо.
Тооллогыг аймгийн Засаг даргын 2025-2028 оны үйл ажиллагааны хөтөлбөрт тусгагдсан “Хүрээлэн буй орчинд ээлтэй ‘Ногоон хот’-ыг бий болгох” зорилтын хүрээнд хэрэгжүүлж, Шинжлэх Ухаан, Технологийн Их Сургуультай хамтран олон улс болон Монгол Улсад мөрдөж буй IPCC 2006 удирдамж, холбогдох олон улсын арга зүй, аргачлал, стандартын шаардлагад нийцүүлэн гүйцэтгэжээ.
Мэдээллийн төв
