Оюутан залууст зориулсан “RISE” үндэсний хөтөлбөр маргааш нээлтээ хийнэ
Залуусыг хэрэгцээт мэдлэг, ур чадвар, мэргэжлийн хүрээлэл болон бодит боломжуудтай холбодог RISE хөтөлбөр энэ жил Эрдэнэт хотод хэрэгжих гэж байна.
“RISE” хөтөлбөр нь залуусын боловсрол, карьер, хувь хүний хөгжил болон санхүүгийн мэдлэгийг дэмжих, ирээдүйн боломжуудыг нээх зорилгоор олон жилийн турш тасралтгүй хэрэгжиж буй хөтөлбөр юм. Өмнөх жилүүдэд Улаанбаатар хот болон Дорнод аймагт амжилттай хэрэгжсэн бол энэ жил Эрдэнэт хотын залууст зориулан ХААН Банктай хамтран хүргэж байна.
ХААН Банк нийгмийн хариуцлагын хүрээнд залуусын хөгжлийг дэмжих, өөрийгөө нээх, амжилттай карьер эхлүүлэхэд нь дэмжлэг үзүүлэх зорилгоор 2018 оноос хэрэгжүүлж ирсэн бөгөөд хоёр дахь жилдээ “ЦойлогсоZ” залуусын нэгдэлтэй хамтран Эрдэнэт хотын залууст хүргэж байгаагаараа онцлогтой.
Өнөөдөр залуусын өмнө боломж олон байгаа ч тэдгээрээс өөрт тохирохыг олох, чиглүүлэг өгөх туршлагатай мэргэжилтэнтэй холбогдох, дараагийн алхмаа тодорхойлох нь хамгийн том сорилтуудын нэг хэвээр байна. “RISE” үндэсний хөтөлбөр нь оюутан залууст өөрт хэрэгтэй зүйлээ тодорхойлоход нь туслах, шаардлагатай хүнтэй нь холбох, бодит боломж руу ахихад нь дэмжлэг үзүүлэхэд гол анхаарлаа чиглүүлдгээрээ онцлог юм.
Хөтөлбөрт хамрагдсанаар оролцогчид дараах чиглэлүүдээр өөрийгөө хөгжүүлж, шинэ боломжуудтай танилцах боломжтой:
- Мэргэжлийн менторын чиглүүлэг: Туршлагатай мэргэжилтнүүдээс чиглүүлэг, зөвлөгөө авах
- Карьер, ажлын байр: Ажлын байр болон дадлагын саналтай танилцах
- Ур чадвар, санхүүгийн боловсрол: Хувь хүний санхүүгээ төлөвлөх, практик ур чадваруудыг эзэмших
- Хөгжлийн хүрээлэл: Бие биеэ дэмжих залуусын хүрээлэлд нэгдэх
Төслийн нээлт маргааш буюу энэ сарын 7-нд Соёл, урлагийн цогцолборт 15:00 цагт эхэлнэ.
Нээлтийн үеэр “RISE” хөтөлбөрийн зорилго, оролцооны боломж, залууст зориулсан хөгжлийн чиглэлүүдийг дэлгэрэнгүй танилцуулах гэж байна. Мөн оролцогчид өөрт хэрэгтэй боломжуудаа хэрхэн тодорхойлох, хөтөлбөрт хэрхэн нэгдэх, цаашид ямар хэлбэрээр оролцох талаар мэдээлэл авахаас гадна залуусын хөгжил, карьер, санхүүгийн боловсрол, менторын дэмжлэгийн талаар яриа, танилцуулга өрнөснөөрөө онцлог юм.
Уг арга хэмжээнд Эрдэнэт хотын оюутан, залуусаас гадна залуучуудын хөгжил, боловсрол, ажил эрхлэлтэд хувь нэмэр оруулах сонирхолтой байгууллага, мэргэжилтнүүдийг урьж байна. Өөрийн дараагийн алхмаа тодорхойлох, шинэ боломжуудтай танилцах, өөрийгөө хөгжүүлэх хүрээлэлтэй холбогдохыг хүссэн оюутан залуус joinrise.mn веб сайтаар нэвтрэн бүртгүүлэх боломжтой.
Мэдээллийн төв
