Монгол Улсын Ерөнхийлөгч У.Хүрэлсүх Орхон аймагт ажиллаж байна. Түүнийг А.Амарын талбайд аймаг, орон нутгийн удирдлагууд болон “Эрдэнэт цэргийн хүрээ”-ний хүндэт харуул хүндэтгэн угтан авлаа. Ерөнхийлөгч У.Хүрэлсүх ажлын айлчлалаа Орхон аймгийн иргэд, төрийн албан хаагчидтай хийх уулзалтаар эхлүүлэв. Уулзалт "Эрдэнэт үйлдвэр" ТӨҮГ-ын CuMo аренад боллоо. Уулзалтын эхэнд Орхон аймаг, Эрдэнэт хотын хөгжил дэвшилд үнэтэй хувь нэмэр оруулсан төрийн албан хаагчид, иргэд хөдөлмөрчдийг төрийн одон, медалиар шагнаж урамшууллаа. 

Ерөнхийлөгчийн зарлигаар Орхон аймгийн хоёр иргэн гавьяат цол хүртлээ
          Орхон аймаг, Эрдэнэт хотын анхдагч илгээлтийн эзэн, барилга үйлдвэрлэлийн салбарт 35 жил ажилласан ахмад барилгачин Ш.Хишигсүрэн Монгол Улсын гавьяат барилгачин цолоор шагнууллаа. Тэрээр Эрдэнэт хотын бүтээн байгуулалтад гар бие оролцож, Хүнсний үйлдвэр, Хивсний үйлдвэр, Үйлдвэр сургалтын төв зэрэг олон арван барилга байгууламжийг барьж байгуулахад үнэтэй хувь нэмэр оруулсан байна.
Мөн орон нутгийн нийгэм, эдийн засгийн хөгжил, хүний эрх, эрх чөлөө, төр, хуулийн этгээдийн хууль ёсны ашиг сонирхлыг хамгаалах, орон нутгийг хөгжүүлэх үйл хэрэгт хувь нэмрээ оруулж, төрийн албанд тасралтгүй 36 жил ажилласан Ш.Ганболдод Монгол Улсын үйлчилгээний гавьяат ажилтан цол хүртээлээ.
Энэ үеэр Эзэн Богд Чингис хааны эш хөргийг Орхон аймгийн ИТХ-ын дарга Д.Мөнхбатад гардуулан өглөө.

“Эрдэнэтчүүддээ талархлаа”... 
           Монгол Улсын Ерөнхийлөгч У.Хүрэлсүх уулзалтын үеэр ахмад үеийнхний байгуулсан гавьяа, зүтгэлийг үргэлж санаж явах ёстойг онцлон тэмдэглэв.
Тэрээр Эрдэнэт хотыг бүтээн босгосон анхдагчид, илгээлтийн эздээрээ бахархаж явдгаа илэрхийлээд, цар тахлын хүнд цаг үеийг улс орон даяараа даван туулахад Эрдэнэтчүүд, тэр дундаа “Эрдэнэт үйлдвэр”-ийн уурхайчдын хүч хөдөлмөр ихээхэн хувь нэмэр оруулсныг онцоллоо. Мөн нийт Эрдэнэтчүүдэд талархал илэрхийлэв.

“Хөрс эрүүл бол хүнс эрүүл, хүнс эрүүл бол хүн эрүүл”
           Ерөнхийлөгч үндэсний хэмжээнд санаачлан хэрэгжүүлж буй “Тэрбум мод”, “Хүнсний хувьсгал”, “Цагаан алт”, “Эрүүл монгол хүн” хөдөлгөөн, хөтөлбөрийн хэрэгжилт, үр дүнгийн талаар танилцууллаа.
Эдгээр хөдөлгөөн, хөтөлбөр нь хөдөө аж ахуйн салбарыг дэмжихийн зэрэгцээ хүн амыг шим тэжээлтэй, химийн бордоо, хорт бодисын үлдэгдэлгүй эрүүл хүнсээр хангах, эрүүл монгол хүнийг төлөвшүүлэхэд чиглэсэн цогц арга хэмжээ болохыг онцлов.
Тэрээр “Хөрс эрүүл бол хүнс эрүүл, хүнс эрүүл бол хүн эрүүл” хэмээн тэмдэглэж, хөрс, хүнсний эрүүл ахуйг хамгаалах нь хүн амын эрүүл мэндтэй шууд холбоотойг онцоллоо.
Цаашид Монгол Улс үйлдвэрлэгч орон болж, нэн тэргүүнд эрчим хүч, нефтийн бүтээгдэхүүн, хүнс, цемент, гангийн үйлдвэрлэлийг хөгжүүлэн дотоодын хэрэгцээгээ дотоодоос хангаж, улмаар экспортлогч орон болох нь чухал байгааг Ерөнхийлөгч тэмдэглэв.
Мөн төрийн бодлого, үйл ажиллагаа, гадаад харилцаа, улс орны нийгэм, эдийн засгийн өнөөгийн нөхцөл байдлын талаар мэдээлэл өглөө. Монгол Улсын жилийн төсөв 32 их наяд төгрөгт хүрч, нэг хүнд ногдох дотоодын нийт бүтээгдэхүүн 7000 ам.доллар давсан. Мөн Монгол Улс дэлхийн 192 улстай дипломат харилцаа тогтоосноос 161 улстай гадаад худалдаа, хамтын ажиллагааг хөгжүүлж байгааг онцоллоо.

Үндэсний хөдөлгөөн, хөтөлбөрийн хэрэгжилт Орхон аймагт... 
            Орхон аймаг “Тэрбум мод” үндэсний хөдөлгөөний хүрээнд “Ногоон Эрдэнэт” дунд хугацааны хөтөлбөрийг хоёр үе шаттай хэрэгжүүлж байна. Хөтөлбөрийн хүрээнд нийт 5.9 сая мод тарьсан бөгөөд энэ онд 297 га талбайд мод тарьж, 229.1 га талбайг эзэмшүүлэн, усалгааны систем болон хашаажуулалтын ажлыг хийжээ.
Мөн Ерөнхийлөгчийн санаачилсан “Илгээлт-2100” хөтөлбөрт Орхон аймгаас нийт долоон сурагч хамрагдаж, АНУ, БНХАУ, Герман, Австрали, Польш, Чех зэрэг улсад мэдээллийн технологи, компьютерын шинжлэх ухаан, механик инженер, биотехнологийн чиглэлээр суралцаж байна.
Хүн амын урьдчилан сэргийлэх болон эрт илрүүлгийн үзлэгийг эрчимжүүлсний үр дүнд Монгол Улсын дундаж наслалт 74 жил болжээ. Орхон аймгийн хувьд 2025 онд 73.6 жил байсан бол энэ оны эхний найман сарын байдлаар 73.9 жил болж өссөн байна.

Төрийн бүх шатанд сахилга, хариуцлага, ёс зүйг сахин ажиллахыг уриалав
             Монгол төрийн хариуцлагатай байдлыг нэмэгдүүлж, хариуцлагын механизмыг сайжруулах асуудал төрийн эрх барих дээд байгууллага, Монгол Улсын парламентаас эхлэх ёстойг Ерөнхийлөгч онцлов. Мөн эв нэгдэл бол тусгаар тогтнол, аюулгүй байдлын баталгаа гэдгийг тэмдэглээд, төрийн бүх шатны байгууллага сахилга, хариуцлага, ёс зүйг чанд сахин ажиллахыг уриаллаа.

Мэдээллийн төв