ЭРДЭНЭТ 50 ЗҮРХ ТӨСӨЛ: Нэгдүгээр ээлжийн үзлэгт 34 хүүхэд хамрагджээ

Эрдэнэт хотын 50 жилийн ойн хүрээнд "Бундан" ТББ-тай хамтран "Эрдэнэт 50 зүрх" төслийг хэрэгжүүлж байгаа билээ. "Зүрх мартахгүй" төслийн зүрх судас, цээжний хөндийн мэс заслын эмч, доктор Б.Хашчулуун тэргүүтэй 13 хүний бүрэлдэхүүн нэгдүгээр сарын 30, хоёрдугаар сарын 1-ний өдрүүдэд манай аймагт ажиллаж үзлэг, оношилгоо хийсэн.

Энэхүү төслийн зорилго нь ойн хүрээнд 50 бяцхан зүрхийг эрүүл энх болгох юм. Хамтын ажиллагааны хүрээнд зохион байгуулсан нэгдүгээр ээлжийн үзлэгт 34 хүүхэд хамрагдсан талаар мэдээллээ.
Хүүхдүүдийн мэдээллийг хүлээн авч, дэмжлэгт хяналт хийх үйл ажиллагааг зохион байгуулсан байна. Үүгээр, харьяаллын бус 1 хүүхэд, зүрхний хагалгаанд орох шаардлагагүй, зүрхний цоорхой нь битүүрсэн 2 хүүхэд, Сонгдо эмнэлэгт үзүүлсэн боловч онош батлагдаагүй буюу үгүйсгэгдсэн 1 хүүхэд, Зүрхний хагалгааны заалтгүй гэсэн дүгнэлтээр буцсан 1 хүүхэд байна.
Харин зүрхний мэс засалд орохоор хүлээгдэж буй 5 хүүхэд, өнөөдрийн байдлаар хагалгаанд орсон 2 хүүхэд байна.

Шинэ оны өмнө "Эрдэнэт 50 зүрх" төслийн хүрээнд анхны мэс засал амжилттай хийгдсэн билээ. Тодруулбал, 2 настай Г.Урин охины хагалгаа амжилттай болж, бүрэн эдгэрсэн гэх мэдээг эмч нь дуулгасан. Охины эмчилгээний төлбөр 10 сая төгрөгийг аймгийн ЗДТГ-ын ажилтан албан хаагчид нэг өдрийн цалингаа хандивлаж бүрдүүлсэн юм.

Мэдээллийн төв