Эрдэнэт хотын 50 жилийн ойн баяр наадмын ерөнхий найруулагч тодорлоо
Эрдэнэт хотын түүхт 50 жилийн ойн баяр наадмын ерөнхий найруулагчаар “Эм Эм Ди Эм” ХХК-ийн захирал, продюсер Б.Лхагвасүрэн, зөвлөх найруулагчаар МУУГЗ, найруулагч Д.Баярбаатар, ерөнхий продюссераар Марийнский театрын гоцлол дуучин Д.Дагвадорж нар ажиллана.
Ойн бэлтгэл хангах ажлын хэсгийн зүгээс баяр наадмын нээлт хаалтын үйл ажиллагааг зохион байгуулах найруулагчийн багийн нээлттэй сонгон шалгаруулалтыг өнгөрсөн нэгдүгээр сард зарлаж нэг сарын хугацаанд материал хүлээж авсан. Нийт 9 найруулагчийн баг сонгон шалгаруулалтад оролцохоор материалаа ирүүлж эхний даваанд найман баг танилцуулга хийсэн. Эдгээрээс сонгон шалгаруулалтад хоёр баг тэнцээд байсан бөгөөд өнөөдөр эцсийн дүн гарч “Эм Эм Ди Эм” ХХК шалгарлаа.
Эрдэнэт хотын онцлогийг харуулж өнгөрсөн, одоо, ирээдүй гэсэн гурван цагийн хэлхээсийг илтгэж, уламжлал шинэчлэлийг хослуулсан шинэлэг шийдэл, тайз засал, хөгжим, найруулга бүхий баяр наадам хийнэ гэдгийг найруулагчдын баг танилцууллаа.
“Эм Эм Ди Эм” ХХК нь энтертаймент, эвент арга хэмжээний чиглэлээр 20 шахам жил үйл ажиллагаа явуулж байгаа туршлагатай ажээ. Энэ удаад Эрдэнэт хотын 50 жилийн баяр наадмыг найруулах багтаа Эрдэнэт хотын анхны зохиолч, яруу найрагч МУСГЗ Д.Дашдондов, МУГЖ ардын дууч Л.Чулуунчимэг, МУГЖ бүжиг дэглээч Ганчимэг зэрэг анхдагч уран бүтээлчдийг багтаажээ. Мөн зохиолын зөвлөхөөр яруу найрагч Ш.Гүрбазар ажиллах юм байна.
Тус компани нь нийт 1,5 тэрбум төгрөгийн төсөв танилцуулсан бөгөөд төвийн болон орон нутгийн урлагийн байгууллагууд, шилдэг гэсэн уран бүтээлчдийг оролцуулахаар төлөвлөжээ. Найруулагчийн багийн хувьд баяр наадамд зориулан хийсэн дуу хөгжим, бүжгийн бүтээлүүдийг Эрдэнэтдээ үлдээж урын санг нь нэмэгдүүлэх оюуны олон бүтээлийг шинээр хийж өгөх болно гэдгийг зөвлөх найруулагч Д.Баярбаатар онцоллоо. Түүнчлэн оролцогчдыг орон нутгаасаа бүрдүүлж урлагийн сургууль болон урлагийн байгууллагуудаа өргөн хүрээнд хамарч оролцуулах тал дээр ажиллана гэв.
Мэдээллийн төв
