Орон сууцны хорооллын 5824 өрхийг хангаж буй инженерийн шугам сүлжээний нэвтрүүлэх чадварыг сайжруулав
Орон нутгийн төсвийн 28,4 тэрбум төгрөгийн хөрөнгө оруулалтаар 2025 онд 32 байршилд 12км 756м инженерийн шугам сүлжээг шинэчилж, орон сууцны хорооллын 5824 өрхийг хангаж буй инженерийн шугам сүлжээний нэвтрүүлэх чадварыг сайжрууллаа.
Тодруулбал, хамгийн өндөр эрсдэлтэй цэвэр усны 6.36 км, дулааны 5.8 км, ариутгах татуургын 0.596 метр шугамыг шинэчлэв. Энэ нь ашиглалтын хугацаа дууссан шинэчлэх шаардлагатай 163 км шугам сүлжээний 8 хувь юм. Эрдэнэт хотод цэвэр усны 119.5км шугам байдгаас 75.08 км буюу 64 хувийх нь эдэлгээний хугацаа дууссан. Жилд дунджаар 1.4 км шугам ашиглалтаас хасагдах хэмжээнд хүрсэн гэх мэргэжлийн байгууллагуудаас гаргасан судалгаа бий.
Ус хангамжийн чиглэлээр сүүлийн гурван жилд гарсан аваар, саатлыг авч үзвэл 2022 онд 19, 2023 онд 22, 2024 онд 29 удаагийн гэмтэл гарч байжээ.
Шугам сүлжээний шинэчлэл нь зөвхөн техник хангамжийг сайжруулж байгаа хэрэг биш юм. Иргэдийн эрүүл мэнд, айл өрх, хэрэглэгчдийн амьдралын чанар, шугам сүлжээний найдвартай байдал зэргээрээ нийгэмд чухал үр нөлөөтэй хөрөнгө оруулалт билээ.
Мэдээллийн төв
