Орхон аймгийн 2025 оны салбарын тэргүүний ажилтнуудыг  тодруулж,  өнөөдөр шагналыг аймгийн Засаг дарга Б.Зоригтбаяр гардууллаа.  

Төр, захиргааны байгууллагын оны тэргүүний ажилтнаар Баян-Өндөр сумын ЗДТГ-ын мэргэжилтэн С.Сэрээтэрдорж:  

Тэрээр, Засаг захиргааны анхан шатны нэгж багийн хөгжлийг дэмжих замаар төрийн үйлчилгээг иргэдэд шуурхай, чанартай хүргэх, багийн үйл ажиллагааны чадавхийг бэхжүүлэх, баг, иргэдийн хоорондын харилцааг идэвхижүүлэх ажлыг амжилттай хэрэгжүүлж, орон нутгийн төр захиргааны байгууллагын шийдвэр, өгсөн үүрэг даалгаврын хэрэгжилтийг хангуулах, нутгийн захиргааны байгууллагыг хөгжүүлэх, төрийн албаны өөрчлөлт шинэчлэлийг орон нутагт хэрэгжүүлэхэд бодитой хувь нэмэр оруулж байна.

Хүчний байгууллагын оны тэргүүний ажилтнаар  Онцгой байдлын газрын орлогч, Урьдчилан сэргийлэх тасгийн дарга Г.Нэргүйбаатар:

Тэрээр, 2025 онд аймгийн хэмжээнд 124 удаагийн гамшиг, аюулт үзэгдэл, ослын дуудлагын бүртгэлээр ОБГ-ын алба хаагчид 36 хүний амь нас, ААН, иргэдийн эд хөрөнгийг авран хамгаалахад хамт олноо манлайлан удирдсан. Аймаг орон нутгаас зохион байгуулагддаг арга хэмжээнүүдэд тогтмол амжилттай оролцож, “Гамшгийн эрсдлийг бууруулах шинжлэх ухаанч санаачилга-3” бүтээлийн уралдааны дэд байранд шалгарсан.

Эдийн засаг, банк, санхүүгийн салбарын оны тэргүүний ажилтнаар  Иргэний хэргийн давж заалдах шатны шүүхийн шүүгч С.Уранчимэг: 

Тэрээр, Шүүх эрх мэдлийг хэрэгжүүлэхэд мэргэжлийн ёс зүйтэй, шүүхийн шинэтгэлд тодорхой хувь нэмрээ оруулан ажиллаж, иргэдийн эрх зүйн мэдлэгийг дээшлүүлэх зорилгоор 350 гаруй албан хаагч, иргэдэд сургалт, өдөрлөгийг зохион байгуулсан.

Эдийн засаг, банк, санхүүгийн салбарын оны тэргүүний ажилтнаар Татварын газрын татварын улсын байцаагч Д.Буяндэлгэр: 

 Тэрээр, Татварын хууль тогтоомжийг хэрэгжүүлж, орлого бүрдүүлэх, татварын өр хураах үйл ажиллагааг мэргэжил арга зүйн удирдлагаар ханган ажилласны үр дүнд орлогын төлөвлөгөөг давуулан биелүүлж, татварын хөнгөлөлт эдлүүлэх 113 ААН-ийн тайланг хүлээн авч 26.1 сая төгрөгийн чөлөөлөлтөнд хамруулсан байна.

Эрүүл мэндийн салбарын оны тэргүүний ажилтнаар Бүсийн оношлогоо, эмчилгээний төвийн Эрчимт эмчилгээ, мэдээгүйжүүлгийн тасгийн эрхлэгч, мэдээгүйжүүлгийн тасгийн эрхлэгч Д.Баярхүү: 

Тэрээр, хагалгааны үеийн мэдээгүйжүүлгийг мэргэжлийн өндөр түвшинд гүйцэтгэж, нойрсолтын гүнийн монитор хяналтад хийж хэвшсэн. Эрчимт эмчилгээ, мэдээгүйжүүлгийн тасагт эрсдэлд харьцуулсан нас баралтыг тодорхойлж, SOFA үнэлгээний хуудсыг боловсруулж нэвтрүүлснээр олон хоног эмчлэгдэх ор хоногийг багасгах, нас баралтын эрсдлийг бууруулсан. Орчин үеийн шинэ технологийг үйлчилгээндээ нэвтрүүлж ажиллахын зэрэгцээ эрдэм шинжилгээний судалгааны ажлуудыг хийж олны хүртээл болгожээ.

Боловсрол, шинжлэх ухааны салбарын оны тэргүүний ажилтнаар “Эрдмийн сан” сургуулийн математикийн багш М.Бямбадорж:

Тэрээр, аймгийн Иргэдийн Төлөөлөгчдийн хурлаас зарласан математикийн хичээлийн масс чанарын уралдаанд шалгарсан ба Эрдмийн сан сургуулийн нэрэмжит “Өсвөрийн математикчид XXI” олимпиадад дундын багш төрөлд алтан медаль авсан. 12-р ангийн төгсөгчдийн 2025 оны элсэлтийн ерөнхий шалгалтын математикийн судлагдахууны дундаж оноо 710 хүрсэн байна.

Соёл, урлагийн салбарын оны тэргүүний ажилтнаар Нийтийн номын сангийн уншлага, үйлчилгээний албаны дарга, фондоч Н.Отгонцагаан: 

Тэрээр, Номын сангийн фондыг жилд 6.0 төгрөгийн 1000 гаруй номоор баяжуулахын зэрэгцээ Үндэсний бичиг соёл, номын өдрүүдийг жил бүр тогтмол зохион байгуулж хэвшсэн. 

Биеийн тамир, спортын салбарын оны тэргүүний ажилтнаар Биеийн тамир, спортын газрын Спортын хэлтсийн дарга Э.Лхамсүрэнбаатар:  

Тэрээр, Орон нутагт биеийн тамир, спортыг хөгжүүлэх талаар идэвх санаачлагатай ажиллаж, 2025 онд Монголын бүх ард түмний зуны спортын 16-р наадамд 26 төрөлд 257 тамирчин дасгалжуулагчдыг оролцуулж, нийт 72 медаль, Монголын хүүхдийн спортын өвлийн 8-р наадамд 7 төрөлд 81 тамирчид бэлтгэн оролцуулж 32 медалийн болзол хангасан амжилт үзүүлжээ.

Шуудан, харилцаа холбооны салбарын оны тэргүүний ажилтнаар Холбооны газрын ахлах инженер Б.Наранчулуун: 

Тэрээр, 2025 онд Wifi технологоор Монголд анх удаа TV, интернет, суурин утасны гурвалсан үйлчилгээг алслагдсан дэд бүтэц хүрээгүй айл өрхүүдэд анх удаа нэвтрүүлэх ажлыг зохион байгуулан ажилласны үр дүнд Жаргалант суманд баригдаж буй 30 айлын орон сууцыг шилэн кабелаар хангаж, интернэтийн үйлчилгээг нэвтрүүлсэн. Говил багт 100 айлын хэсэгт өргөтгөл хийж 41 хэрэглэгчийг TV ROOM үйлчилгээнд холбосноор физик кабелын ашиглалтыг 80%-иар бууруулж, алслагдсан багийн иргэд интернет болон гурвалсан үйлчилгээг авч эхэлсэн.

Уул уурхайн салбарын оны тэргүүний ажилтнаар “Эрдэнэт үйлдвэр” ТӨҮГ-ын Хөгжлийн хэлтсийн ерөнхий геологич Ю.Алтанхуяг: 

Тэрээр, Эрдэнэтийн стратегийн ордын талбайд хиймэл оюун ухаан ашиглан ордыг илрүүлэн судлах санаачлага гарган, үйл ажиллагааг эхлүүлсэн ба “Хариуцлагатай хайгуул” кодексийг үйлдвэрийн газарт хэрэгжүүлэхээр санаачлан ажиллаж байна. Тэрээр хайгуулын чиглэлээр томоохон бүтээл, эрдэм шинжилгээний өгүүлэл туурвин олны хүртээл болгожээ.

Түлш, эрчим хүчний салбарын оны тэргүүний ажилттнаар “Эрдэнэтийн дулааны цахилгаан станц” ТӨХК-ийн ашиглалтын инженер Түгээмэлийн Чулуунхүү: 

Вагон хөмрөгчийн роторын хаалга шинээр хийж, туузан тэжээгч ЛП 1600 мм-ийн ременьд тохирсон бункерыг олдоц сайтай 1400 мм-ийн ременд тохируулж шинэчилсэн. Дамжлагуудад хазайлтыг тохируулан барих чиглүүлэх роликуудыг боломжтой газруудад санаачлан хийлгэснээр дамжлагуудын хазайлтын гэмтлийг 90% багасгасан.
Нүүрс хуваарилан буулгах гоожуур хоолойд нэмэлт уртасгах хоолой хийж нүүрсний алдагдлыг бууруулсан.  

Барилга, хот байгуулалтын салбарын оны тэргүүний ажилтнаар Хот байгуулалт, барилга захиалагчийн албаны Хот дахин хөгжүүлэх орон сууцны хэлтсийн дарга Ө.Должинжав:

Тэрээр, 2025 онд 280 ш гэрэлтүүлгийн загвар, гэрэлт гудамж байгуулах, 2026 оны хөрөнгө оруулалтаар хийгдэх 256 гэрэлтүүлгийн зураг төсөв боловсруулсан. Цагаанчулуут багийн 49-53-р гудамжны хөгжлийн ерөнхий төлөвлөгөөг боловсруулах ажилд хяналт тавин ажиллаж, аймгийн ИТХ-аар батлуулсан. 69 барилгын архитектор төлөвлөлтийн даалгавар, 45 барилгын байршлын схем, барилгын ажлын зураг хянан баталгаажуулсан ба хот байгуулалтын системийн хөгжүүлэлтэнд саналуудаа хүргүүлж шинэчлэлтэнд тусгуулжээ.

Зам, тээврийн салбарын оны тэргүүний ажилтнаар Авто тээврийн төвийн техник хяналтын инженер Б.Золбоо: 

 Тэрээр, 2025 онд 26792 буюу нийт тээврийн хэрэгслийн 70 хувьд техникийн хяналтын үзлэг оношлогоо хийсний зэрэгцээ Замын цагдаагийн тасагтай хамтран сард 1-2 удаа тогтмол хяналт шалгалт хийж давхардсан тоогоор 852 тээврийн хэрэгслээс 151 зөрчил илрүүлэн арга хэмжээ авч техникийн бүрэн бүтэн байдлыг хангуулах, иргэдийн аюулгүй зорчих нөхцөлийг бүрдүүлэн ажиллаж байна.

Хөнгөн аж  үйлдвэрийн салбарын оны тэргүүний ажилтнаар “Эрдэнэт хивс”  ХХК-ийн бригадын дарга, сантехникч Б.Бямба-Очир: 

Тэрээр, үйлдвэрийн цех, хэсгүүдийн ашиглалтыг хариуцахаас гадна  халуун, хүйтэн ус, агааржуулалт, угсралтын ажлуудыг гүйцэтгэж, уур, ус, дулааны тоног төхөөрөмжийн найдвартай ажиллагааг ханган, үйлдвэрлэлийн үр ашгийг сайжруулахад бодитой хувь нэмрээ оруулж ирсэн үйлдвэрийн шилдэг ажилтнуудын нэг юм. 

Үйлчилгээний салбарын оны тэргүүний ажилтнаар “Анунгоо”  салоны үсчин  А.Хүрэлбаяр: 

Тэрээр, олон улсын стандартад нийцсэн үйлчилгээг шинээр нэвтрүүлж, жилд 8000 гаруй иргэдэд үйлчилсэн ба олон улсын болон бүсийн чанартай уралдаан тэмцээнүүдэд амжилттай оролцож, 2025 онд улсын аварга шалгаруулах тэмцээнээс Тусгай байрын, Францын Парис хотод зохион байгуулагдсан Европ тивийн аварга шалгаруулах онлайн тэмцээний 2 төрөлд оролцон 4-р байрын шагналыг тус тус хүртжээ. 

Хүнс, хөдөө аж ахуйн салбарын оны тэргүүний ажилтаар Үхрийн эрчимжсэн аж ахуй эрхлэгч Д.Ядамсүрэн: 

Тэрээр, сүүний чиглэлийн хар тарлан үүлдрийн үхэр дагнан үржүүлж, иргэдийн хүнсний хэрэгцээг хангаж байгаагийн зэрэгцээ ОХУ-ын Буриадаас гойд ашиг шим бүхий үхэр худалдан авч  малын чанарыг сайжруулах, жижиг аж ахуй болгох зорилт тавин ажиллаж байна.

Нийтийн аж ахуйн үйлчилгээний салбарын оны тэргүүний ажилтнаар Хот тохижуулах газрын жолооч Р.Бадамбат: 

Тэрээр, жилд дунджаар 4224 м3 хог хаягдлыг ачиж тээвэрлэдэг бөгөөд хариуцсан техникийн бүрэн бүтэн байдлыг хангаж ажилласан.

Байгаль орчин, аялал жуулчлалын салбарын оны тэргүүний ажилтнаар Байгаль орчны газрын байгаль хамгаалагч Ц.Чинбат:

Тэрээр, байгаль орчны багц хуулийг хэрэгжүүлэх зорилгоор холбогдох төрийн байгууллагууд, зэргэлдээх аймаг, сумдын байгаль хамгаалагч нартай хамтран хууль бус мод бэлтгэн тээвэрлэсэн 60 тээврийн хэрэгслийг шалгаж зөрчлийг арилгуулсан.  Ойн сан бүхий газар болон суурьшлын бүс орчимд тарьсан модны ургалтын хувь тогтоох, мод тариулах ажлыг зохион байгуулж, Тэрбум мод үндэсний хөдөлгөөн, Ногоон Эрдэнэт хөтөлбөрийн хүрээнд нийтдээ 5.270 гаруй мод тарьсныг арчлан хамгаалж бүртгэлжүүлэн ажиллаж байна. Тэрээр ховор ан амьтдын байршил, ажиглалт судалгаа хийх, булаг шандын мониторингийн ажил, гүний худгийн  усны чанар найрлага, шинжилгээнд хамруулах зэрэг ажлуудад хяналт тавьж салбартаа үнэтэй хувь нэмрээ оруулсан.

Хэвлэл, мэдээллийн салбарын оны тэргүүний ажилтнаар “Frame media”  студын зураглаач, эвлүүлэгч А.Даваасүрэн: 
Тэрээр, хэвлэл, мэдээллийн салбарт тасралтгүй 13 жил үр бүтээлтэй ажиллаж байна.

Иргэний нийгмийн байгууллагын оны тэргүүний ажилтнаар “Эрдэнэтийн ээжүүдийн чадавхижуулах”  холбооны тэргүүн Н.Баярмаа: 

Тэрээр, Эрдэнэтийн ээжүүдийг чадавхижуулах холбоо нь 2025 онд үйл ажиллагаагаараа дамжуулан гэртээ хүүхдээ асардаг ээжүүдэд чадавхижуулах сургалтыг зохион байгуулж 30 эмэгтэйг хамруулж, 5 ээжийг байнгын ажлын байраар хангасан бөгөөд холбооныхоо ээжүүдийн бүтээлүүдийг улсын хэмжээнд зохион байгуулагддаг үзэсгэлэн худалдаанд оролцуулж ирсэн. Орхон аймаг, Эрдэнэт хотын бэлэг тэмдэг арслан “Маскот”-ын загварыг гаргаж 2000 арслангийн баярын арга хэмжээг зохион байгуулсан зэрэг амжилт гаргасан байна.

Мэдээллийн төв