Өрхийн эмнэлгүүд уртасгасан цагаар ажиллаж байна
Томуугийн цар тахлын хүндрэлийн үнэлгээгээр аймгийн хэмжээнд томуу, томуу төст өвчин аймгийн хэмжээний дэгдэлтийн түвшинд байна. Иймд ажлын хэсэг хуралдаж томуу, томуу төст өвчний үед авч хэрэгжүүлэх хариу арга хэмжээг тодорхойлсон талаар аймгийн Эрүүл мэндийн газраас мэдээллээ.
Үүнд, албан байгууллагын сургалт болон хурлыг цахимаар болон ажлын байран дээр нь хийх, 5 хүртэлх насны хүүхэд, жирэмсэн эх, 65-аас дээш насны архаг хууч өвчтэй эрсдэлт бүлгийн хүн амын гэрийн эргэлтийг эрчимжүүлэх, Өрхийн эрүүл мэндийн төвүүд ажлын өдөр 17:00-19:00, амралтын өдөр 10:00-16:00 цаг хүртэл ажиллах хуваарийг хэвээр нь үргэлжлүүлэхээр шийдвэрлэсэн байна.
Түүнчлэн томуу, томуу төст өвчин аймгийн хэмжээний дэгдэлтийн түвшинд хүрсэн тул олон нийтийг хамарсан арга хэмжээг хязгаарлах, хүний тоог цөөрүүлэх, хурал, цуглаан, зөвлөгөөнийг цахим хэлбэрээр зохион байгуулахыг Эрүүл мэндийн газраас аж ахуйн нэгж, байгууллагуудад уриаллаа.
Тархвар судлалын 49 дүгээр долоо хоногийн мэдээгээр амбулаториор 14465 иргэн үйлчлүүлсний 2606 тохиолдол томуу, томуу төст өвчний шалтгаанаар үзүүлж, өнгөрсөн 7 хоногийн түвшинд байна. Томуу, томуу төст өвчний нийт тохиолдлын 84.1 хувь нь 15 хүртэл насны, үүний 42.3 хувь нь 4 хүртэлх, 57.7 хувь нь 5-15 насны хүүхдүүд эзэлж байна. 4 хүртэл насны хүүхдийн өвчлөлийн 37.8 хувь нь 0-1 нас, 62.2 хувь нь 2-4 насны хүүхэд эзэлж байна.
Мэдээллийн төв
