Наадам:Бөхийн бүртгэлийг энэ сарын 9-нд зохион байгуулна
Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Орхон аймгийн баяр наадмыг зохион байгуулах комиссоос баяр наадмын бэлтгэл ажлын талаар мэдээлэл хийлээ.
Баяр наадмыг зохион байгуулах хороон дараа аймгийн Засаг даргын орлогч Б.Мөнхдалай, нарийн бичгийн даргаар ЗДТГ-ын Хууль эрх зүйн хэлтсийн дарга Б.Мөнхбаяр ажиллаж байна.
Үндэсний бөхийн барилдааныг зохион байгуулах салбар комиссын мэдээллийг хүргэе.
Үндэсний бөхийн барилдааныг зохион байгуулах салбар комиссын даргаар Баян-Өндөр сумын ИТХ-ын дарга Э.Эрдэнэбат, нарийн бичгийн даргаар Орхон аймаг дахь Үндэсний бөхийн холбооны тэргүүн аймгийн арслан Лхагвасүрэн ажиллаж байна.
Үндэсний их баяр наадмын тухай хуулийн 9.5-д заасны дагуу аймгийн баяр наадамд 128 бөх зодоглоно. Өсвөрийн барилдаанд 64 бөх барилдана. Бүртгэлийг энэ сарын 9-ний 10:00-18:00 цаг хүртэл Биеийн тамир, спорт хорооны Б зааланд зохион байгуулна. Бөхчүүд цолны үнэмлэх, өсвөрийн бөхчүүд төрсний гэрчилгээ болон иргэний үнэмлэх, гадаад пасспортоо авч ирэн бүртгүүлэх боломжтой. Долоодугаар сарын 10-нд хүчит бөхийн 1,2-ын даваа, 11-ний өдөр 3,4,5,6,7-ийн даваа үргэлжилнэ.
Энэ жил Үндэсний их баяр наадмын тухай хуулиар аймаг болон түүнтэй адилтгах наадмын үндэсний бөхийн шөвгийн дөрвөн бөхөөс допингийн шинжилгээ авахаар хуульчилсан. Тодруулбал, Үндэсний их баяр наадмын тухай хуулийн шинэчилсэн найруулгыг 2022 онд баталсан. Хуулийн 21.5 заалтад "Аймгийн баяр наадам, түүнтэй адилтгах баяр наадмын бөхийн барилдаанд шөвгийн дөрөвт үлдсэн бөхөөс допингийн шинжилгээг 2025 оны баяр наадмаас эхлэн авна" гэж заасан байдаг.
Хэрэв шинжилгээ авахгүй бол тухайн аймаг дахь үндэсний бөхийн барилдаанд амжилт үзүүлсэн бөхийн цол чимэг баталгаажихгүй гэж заасан. Шинжилгээ авах ажлыг Монголын үндэсний допингийн эсрэг байгууллагаас зохион байгуулна.
Мэдээллийн төв
