БНЧУ-аас Монгол Улсад суугаа Элчин сайд Ян Вытопил тэргүүтэй албаны хүмүүсийг хүлээн авч уулзлаа
Чех улсаас Монгол улсад суугаа Элчин сайд Ян Вытопил, тус улсын Байгаль орчны асуудал эрхэлсэн секцийн захирал Давид Сурый тэргүүтэй албаны хүмүүс манай аймагт зочиллоо. /2025.06.12/ Аймгийн Засаг дарга Б.Зоригтбаяр холбогдох албаныхны хамтаар төлөөлөгчдийг хүлээн авч уулзав.
Уулзалтын эхэнд Засаг дарга Б.Зоригтбаяр "Монгол, Чех хоёр улс геологи, ашигт малтмал, байгаль орчин, соёл боловсрол гээд олон салбарт хамтран ажиллаж ирсэн, хамтын ажиллагааны арвин их түүхтэй. Энэ жил хоёр улсын хооронд дипломат харилцаа тогтоосны 75 жилийн ой тохиож байна. Эрдэнэт хотын 50 жилийн ой ирэх онд тохионо. Чех /Чехословак/ улс Монгол Улс тэр дундаа Эрдэнэтэд хотын геологи, уул уурхайн салбарт онцгой хувь нэмэр оруулсан түүхтэй. Тэртээ 1960 онд хоёр улсын хамтарсан геологийн багийг Чех геологич Моймир Краутер ахалж, хоёр жилийн дотор Эрдэнэтийн зэсийн ордыг илрүүлснээр өнөөгийн бидний Эрдэнэт хот, Эрдэнэт үйлдвэр сүндэрлэсэн юм" хэмээн онцлов.
Элчин сайд Ян Вытопил мэндчилгээ дэвшүүлж, цаашдын хамтын ажиллагаанд амжилт хүслээ.
Мөн Эрдэнэт хотын захирагчийн орлогч Б.Мөнхдалай аймаг орон нутгийн хог хаягдлын менежментийн танилцуулгыг хийж, хог хаягдлын менежментийг сайжруулах хамтын ажиллагааны талаар санал солилцов. Тэр дундаа биологийн гаралтай хог хаягдлын асуудлыг шийдэх боломжийн талаар хэлэлцлээ.
Тус улсын Байгаль орчны дэд сайд Павель Янда уул уурхай түшиглэсэн хотод олборлолтын дараах нөхөн сэргээлт тулгамдсан асуудал болдог. Энэ чиглэлээр болон хог хаягдлын менежментийг сайжруулахад төр, хувийн хэвшлийн аль ч шатан д хамтран ажиллахад бэлэн буйгаа илэрхийлэв.
Аймгийн Засаг дарга Б.Зоригтбаяр 2026 онд тохиох Эрдэнэт хотын 50 жилийн ойн хүндэтгэлийн урилгыг Чех геологич Моймир Краутер гуайд албаны хүмүүсээр дайж, Эрдэнэтчүүдийн мэндийг уламжлахыг хүслээ.
Мэдээллийн төв
