ДДБОС /Даян дэлхийн байгаль орчны сан/-ийн буцалтгүй 6,9 сая ам.долларын санхүүжилтээр “Монголын хүртээмжтэй ногоон хотууд болох” төсөл Монгол Улсын гурван хотод хэрэгжихийн нэг нь Орхон аймаг, Эрдэнэт хот юм.  Уг төслийн баримт бичгийг боловсруулах НҮБ-ын Хөгжлийн хөтөлбөрийн  баг, бүрэлдэхүүн өнөөдөр  манай аймагт ажиллаж, аймгийн удирдлагуудтай уулзан санал солилцлоо. 

ДДБОС нь 10 чиглэлээр хөтөлбөр хэрэгжүүлдэг бөгөөд үүний гуравт нь “Тогтвортой хотуудын нэгдсэн хөтөлбөр” багтдаг.  Уг хөтөлбөрийн хүрээнд “Монголын хүртээмжтэй ногоон хотууд болох” төсөл  нийслэл Улаанбаатар, Дархан, Эрдэнэт хотод  2026 оноос таван жилийн хугацаатай хэрэгжинэ.  Өдгөө дэлхийн 13 орны 34 хотод Даян дэлхийн байгаль орчны сангийн санхүүжилтээр  хотын байгаль орчин, экосистемийг сайжруулах, байгальд суурилсан шийдлүүдийг дэмжих, Тойрог хотын эдийн засгийг хөгжүүлэх, шинэ санал санаачилгыг дэмжих төсөл хэрэгжиж буй аж. 

Өнөөдрийн уулзалт төслийн баримт бичиг боловсруулах хоёр дахь шатны уулзалт юм. Эхний удаа Орхон аймгийн дата мэдээллүүдийг төслийн баримт бичиг боловсруулах багийнхан цуглуулсан бол энэ удаа баримт бичигт тусгах санал, хамтын ажиллагааны талаар хэлэлцэхийн зэрэгцээ  байгальд ээлтэй технологиор халаалт, дулааны шийдсэн албан байгууллага, айл өрхийн шийдлүүдтэй биечлэн танилцаж байна. 

Аймгийн Засаг дарга Б.Зоригтбаяр  уг төслийг  2024-2028 оны Засаг даргын үйл ажиллагааны мөрийн хөтөлбөрт тусгасан “Ногоон хот”, “Төлөвлөлттэй хот”, “Ухаалаг хот”  төсөлтэй нягт уялдаж байгаа учир үр дүнтэй, амжилттай хэрэгжинэ гэдэгт итгэлтэй байгаагаа онцлов.  НҮБ-ын  Олон улсын төслийн удирдагч Жош Бран   энэхүү төслийг амжилттэй хэрэгжүүлэхэд иргэдийн оролцоо чухал болохыг мөн тодотгосон. 

Төсөл хэрэгжих таван жилийн хугацаанд 300 мянган га газрыг нөхөн сэргээн, мөн тооны талбайг ногоон бүс болгож, найман сая тонн нүүрс хүчлийн ялгаралтыг бууруулсан байна гэж үзэж байна. Цаашлаад төсөл хэрэгжсэн бүсэд 60 мянга гаруй хүн төслийн үр өгөөжийг шууд хүртсэн байна гэхчлэн үр дүнг хүлээж байна.  

Төслийн зорилго нь...

• Хотын оролцогч талуудын хамтын ажиллагааг эрчимжүүлж, хотын хөгжлийн нэгдсэн төлөвлөлт, тогтвортой санхүүжилт, хөрөнгө оруулалтыг нэмэгдүүлэх, 
• Тогтвортой ногоон шийдэл, сайн туршлагын талаар хотууд харилцан өөр хоорондоо суралцах, мэдлэг солилцоход дэмжлэг үзүүлэх, 
• Харилцан уялдаа, холбоо бүхий тогтвортой, инновацлаг шийдлүүдийн багцыг олон улсад сурталчлах, 
• Өндөр үр дүн хурдацтай хөгжлийн төлөө бүх оролцогч талуудын хамтын ажиллагаа бэхжүүлэх юм. 

Төсөл хэрэгжих хотуудад санхүүжилтыг олгохдоо хаана асуудал шийдэх хэрэгцээ шаардлага хамгийн өндөр байгааг нь авч үзэхийн зэрэгцээ  ногоон хот болох чиглэлээр хэр идэвх санаачилгатай, үр дүнтэй ажиллаж байгааг нь харгалзан харилцан адилгүй байна гэдгийг НҮБ-ын төслийн багийнхан хэллээ. 

Мэдээллийн төв