Аймгийн хэмжээнд 351 сонгогч зөөврийн битүүмжилсэн саналын хайрцгаар саналаа өгнө
![](https://mail.erdenet.mn/images/news/3f7db7726c66bc54208c7e08b1a7685b.jpg)
Монгол Улсын Их Хурлын 2024 оны ээлжит Сонгуулийн тухай хуульд хүндэтгэх шалтгааны улмаас санал авах байранд очиж чадахгүй сонгогчдын саналыг зөөврийн битүүмжилсэн хайрцгаар авахаар хуульчилсан.
Энэ дагуу хэсгийн хороод 40 чиглэлд зөөврийн битүүмжилсэн хайрцгаар санал авах ажлыг өнөөдрийн /2024.06.27/-ны 09:00-20:00 цагийн хооронд зохион байгуулж байна.
Манай аймагт нийт 351 сонгогч зөөврийн битүүмжилсэн хайрцгаар санал өгөхөөс 16:00 цагийн байдлаар 277 нь буюу 78,9 хувь нь саналаа өгөөд байна.
Хуульд зааснаар....
- Эрүүл мэндийн байдлын улмаас санал авах байранд өөрийн биеэр очиж чадахгүй сонгогч;
- Дайчилгааны тухай хуульд заасны дагуу нийтийн дайчилгаанд хамрагдан ажиллаж байгаа сонгогч;
- Зөрчлийн улмаас баривчлагдсан сонгогч;
- Эрүүгийн хэрэг хянан шийдвэрлэх тухай хуульд заасны дагуу баривчлагдсан, цагдан хоригдсон сонгогч зөөврийн битүүмжилсэн хайрцгаар саналаа өгнө.
Сонгогчийн хүсэлт, эмнэлгийн магадлагаа эсвэл холбогдох байгууллагын тодорхойлолтыг үндэслэн зөөврийн битүүмжилсэн саналын хайрцгаар санал авдаг.
УИХ-ын 2024 оны ээлжит сонгуульд Орхон аймгийн хэмжээнд нийт 66 мянга 600 сонгогч саналаа өгнө. Аймгийн хэмжээнд нийт 48 хэсгийн хороод ажиллаж байгаагийн 3 нь Жаргалант суманд байна. Энэ удаагийн УИХ-ын сонгуулийн санал хураалтын бэлтгэл ажил, зохион байгуулалтад 1000 гаруй төрийн албан хаагч ажиллаж байна.
Мэдээллийн төв