Энэ жил Орхон аймагт 100 гаруй багш шилжин ирж суурьшжээ
Орхон аймаг багшлах боловсон хүчний дутагдлаас сэргийлж хэд хэдэн арга хэмжээнүүдийг авч хэрэгжүүлсэн. Үүний үр дүнд 100 гаруй багш Орхон аймагт шилжиж ирж суурьшжээ. Эдгээрээс нийслэл хотоос 18, орон нутгаас 44, шинээр төгсөн ажиллаж буй 44 багш байна. Гэсэн ч ирэх жилүүдэд манай аймагт төдийгүй улсын хэмжээнд багшлах боловсон хүчний дутагдалд орох эрсдэлтэй байгаа.
Тодруулбал, ирэх хичээлийн жилд Орхон аймагт 50 гаруй багш шаардлагатай гэсэн судалгааг аймгийн БШУГ-аас гаргажээ. Үүнд, бага анги, математик, байгалийн ухаан, дуу хөгжим, эрэгтэй технологийн багш шаардлагатай байна. Тиймээс эдгээр өдрүүдэд Архангайн багшийн сургуулийн оюутнуудыг урьж авч ирэн сургуулиудад дадлага хийлгэхийн зэрэгцээ аймаг орон нутагтаа суурьшуулах, орон нутгийн болон салбарын онцлог давуу талаа сурталчилж байна гэж БШУГ-ын дарга О.Ариунгэрэлт мэдээлэл өглөө.
Мэдээллийн төв
