Ахмадын баярын хүндэтгэлийн арга хэмжээ боллоо
32 дахь удаагийн “Ахмадын баяр”-ын хүндэтгэлийн арга хэмжээ боллоо. Баярын арга хэмжээнд УИХ-ын гишүүн Д.Батлут, ИТХ-ын дарга Д.Мөнхбат, Засаг дарга С.Батжаргал нар оролцож, мэндчилгээ дэвшүүлэв. Орхон аймаг ахмад настнуудынхаа эрүүл мэнд, амралт чөлөөт цагийг нь ая тухтай өнгөрүүлэх, тэдний гавьяа зүтгэлийг мөнхжүүлэх, нийгмийн харилцаанд идэвхтэй оролцуулах гээд олон талт үйл ажиллагааг найм дахь жилдээ хэрэгжүүлж буй “Ач санах”, “Анхдагч” хөтөлбөрийнхөө хүрээнд авч хэрэгжүүлдэг билээ.
Тухайлбал, энэ жил Аймгийн ахмадын хороо орон нутгийн 35 сая төгрөгийн хөрөнгө оруулалтаар чийрэгжүүлэлтийн танхим, номын сан, амрах өрөө, хурлын танхим зэргээ тохижуулж, өнгө нэмсэн. Мөн энэ намраас ахмадуудад зориулсан эрх зүйч, сэтгэл зүйч нарыг ажиллуулж эхэлсэн.
Баяр наадмын өмнө аймгийн ИТХ-ын хуралдаанаар төсвийн тодотгол хэлэлцэх үед 26 багийн ахмадын зөвлөл болон Ахмадын хорооны ажилтан албан хаагчдын цалин, урамшууллыг нэмсэн билээ.
Ахмадын эрх ашгийг хамгаалах, тэдний нийгэмд оруулсан хувь нэмрийг нийтэд таниулах зорилгоор НҮБ-ын Ерөнхий ассамблейн 1990 оны арванхоёрдугаар сарын 4-ний өдрийн шийдвэрээр жил бүрийн аравдугаар сарын 1-ний өдрийг Олон улсын ахмадын өдөр болгон дэлхий даяар тэмдэглэж байхаар тунхагласан. Энэ шийдвэрийн дагуу манай улс 1992 оноос эхлэн “Ахмадын баярын өдөр”-ийг уламжлал болгон тэмдэглэж байна.
Мэдээллийн төв
