Журмын өөрчлөлтийн төсөл

НИЙТИЙН ТЭЭВРИЙН ХЭРЭГСЛЭЭР ҮНЭ ТӨЛБӨРГҮЙ ЗОРЧИХ ЭРХ БҮХИЙ ИРГЭДИЙН НӨХӨН ОЛГОВРЫГ ХУВААРИЛАХ, САНХҮҮЖҮҮЛЭХ ЖУРАМ

Нэг. Нийтлэг үндэслэл

1.1.Монгол улсын Автотээврийн тухай хуулийн 12 дугаар зүйлийг 12.2 дахь заалт,  Цагдаагийн албаны тухай хуулийн 59 дүгээр зүйлийн 59.1.4 дэх заалт, Дотоодын цэргийн тухай хуулийн 33 дугаар зүйлийн 33.1.11 дэх заалт,  Боловсролын тухай хуулийн 43 дугаар зүйлийн 43.2.5 дахь заалт, Ахмад настны тухай хуулийн 8 дугаар зүйлийн 8.1.5 дахь заалт, Хөгжлийн бэрхшээлтэй хүний эрхийн тухай хуулийн 32 дугаар зүйлийн 32.8 дахь заалтыг хэрэгжүүлэх зорилгын хүрээнд төсвөөс санхүүжүүлж байгаа нөхөн олговрыг нийтийн тээврийн салбарын хууль, дүрэм, журам, стандартын шаардлагыг бүрэн хангасан, бүртгэл мэдээллийн төлбөрийн систем /GPS/ нэвтрүүлсэн зорчигч тээврийн аж ахуйн нэгж байгууллагад санхүүжилтийг хуваарилан олгоход талуудын хооронд үүсэх харилцааг зохицуулахад энэхүү журмын зорилго оршино.

1.2.Журмын хэрэгжилтийг аймгийн Засаг Даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэс, Санхүү төрийн сангийн хэлтэс болон Авто тээврийн төв хангаж ажиллана.

1.3.Энэхүү журамд хэрэглэсэн нэр томьёог дор дурдсанаар ойлгоно.

1.3.1.“Нийтийн тээврийн нөхөн олговор” гэж холбогдох хуульд заасан нийтийн тээврийн хэрэгслээр үнэ төлбөргүй зорчих эрх бүхий ахмад настан, хөгжлийн бэрхшээлтэй хүн, цагдаа, дотоодын цэргийн алба хаагч, нийтийн тээврийн хэрэгслээр хичээлдээ явах зайлшгүй шаардлагатай оюутан, сурагчдыг 50 хувийн хөнгөлөлттэй тээвэрлэсний зардалд тээвэрлэгч аж ахуйн нэгж, байгууллагуудад төсвөөс олгож байгаа дэмжлэгийг;

1.3.2.“Оюутан, сурагч” гэж Боловсролын тухай хуулийн 43 дугаар зүйлийн 43.2.5-д заасан нийтийн тээврийн хэрэгслээр хичээлдээ явах зайлшгүй шаардлагатай сурагч, оюутан;

            1.3.3.”Ахмад настан” гэж Ахмад настны тухай хуулийн 3 дугаар зүйлийн 3.1-т заасан 60, түүнээс дээш настай эрэгтэй, 55, түүнээс дээш настай эмэгтэй Монгол улсын иргэн хамаарна;

1.3.4.“Хөгжлийн бэрхшээлтэй хүн” гэдэгт Хөгжлийн бэрхшээлтэй хүний эрхийн тухай хуулийн 4.1.1-д заасан бие махбод, оюун санаа, сэтгэл мэдрэл, мэдрэхүйн байнгын согог нь орчны бусад саадтай нийлсний улмаас бусдын адил нийгмийн амьдралд бүрэн дүүрэн, үр дүнтэй оролцох чадвар нь хязгаарлагдсан хүнийг;

1.3.5.”Цагдаагийн алба хаагч” гэж Цагдаагийн албаны тухай хуулийн 59 дүгээр зүйлийн 59.1-т, 59.1.4-т зааснаар хот суурин дотор нийтийн тээврийн хэрэгсэл /таксинаас бусад/-ээр үнэ төлбөргүй зорчих;

1.3.6.“Дотоодын цэргийн албан хаагч” гэж Дотоодын цэргийн тухай хуулийн 4 дүгээр зүйлийн 4.1.1-т заасан цэргийн тангараг өргөж, дотоодын цэргийн анги, байгууллагад ажиллаж байгаа цэргийн жинхэнэ албан хаагчийг;

1.3.7.“Цахим карт” гэж нийтийн тээврийн хэрэгслээр үйлчлүүлэхэд зориулагдсан төлбөрийн тусгайлсан карт, тухайн төхөөрөмжид таниулсан бүх төрлийн картыг;

1.3.8. “Бүртгэл, мэдээллийн төлбөрийн систем” гэж нийтийн тээврийн үйлчилгээний тээврийн хэрэгслүүдийн бүртгэл мэдээллийг байршил тогтоогч GPS төхөөрөмж ашиглан өдөр тутам бүртгэн ажлын хуваарь, түүний гүйцэтгэл, зөрчлийн мэдээ, зорчигч урсгал, орлого төвлөрүүлэлт, хуваарилалт гэх мэт холбогдох тайлан гаргах нэгдсэн системийг;

1.3.9.“Машин цагийн гүйцэтгэл” гэж авто тээврийн төвийн даргын баталсан ажлын даалгаврын дагуу GPS-ийн системээс гарсан тухайн сарын нэгтгэсэн нийтийн тээврийн үйлчилгээний тээврийн хэрэгслийн ажилласан цаг, рейсийг;

1.3.10.“Төсөл хэрэгжүүлэгч” гэж аймгийн хэмжээнд нийтийн тээврийн үйлчилгээнд бүртгэл мэдээлэл, төлбөрийн ухаалаг шийдлийг нэвтрүүлэхээр төсөл хэрэгжүүлж байгаа байгууллагыг;

1.3.11.”Багтаамж ашиглалтын коэффициент” гэж тухайн маршрутад тээвэрлэсэн нийт зорчигчийн тоог автобусны нэрлэсэн багтаамж, нийт гүйцэтгэсэн рейст харьцуулсан харьцааг;   Багтаамж ашиглалтыг “1.5” гэсэн коэффициентоор тооцно.

Хоёр. Нийтийн тээврийн хэрэгслээр зорчих эрх бүхий иргэдийг тээвэрлэх зохион байгуулалт

2.1.Авто тээврийн төв нь зорчих эрх бүхий иргэдийн тоо, судалгааг холбогдох байгууллагуудаас нэгтгэн авч аймгийн Засаг даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэст гаргаж өгнө.

2.2.Авто тээврийн төв нь GPS-ийн төхөөрөмж суурилуулсан, зорчигч тээвэрлэх гэрээ байгуулсан аж ахуй нэгж байгууллагаар тээвэрлэлтийг гүйцэтгүүлнэ.

2.3.Цахим Эрдэнэт-1 төслийн хүрээнд нийтийн тээврийг цахимжуулах ажлыг төсөл хэрэгжүүлэгч хийж хяналтыг Авто тээврийн төв хариуцна.

2.4.Нийтийн тээврийн үйлчилгээ цахим картад шилжсэнээр бүртгэл, мэдээллийн төлбөрийн системээс гарч байгаа  тооцооллоор нийтийн тээврийн нөхөн олговрыг бодно.

2.5.Тээвэрлэлтийг гүйцэтгэхдээ зогсоол, буудал бүрд цагийн хуваарийн дагуу зогсож үйлчилнэ.

Гурав. Нийтийн тээврийн нөхөн олговрыг санхүүжүүлэх, зардлыг тогтоох

3.1.Авто тээврийн төв нь шаардлагатай нийтийн тээврийн нөхөн олговрын тооцооллыг тухайн жилийн төсөвт тусгуулахаар төсвийн ерөнхийлөн захирагчид уг саналыг хүргүүлж тухайн жилийн улсын болон орон нутгийн төсөвт тусгуулан зохих санхүүжилтийг  Аймгийн Иргэдийн Төлөөлөгчдийн Хурлаар хэлэлцүүлэн шийдвэрлүүлнэ.

3.2.Нийтийн тээврийн үйлчилгээ эрхэлж байгаа аж ахуй нэгж байгууллагууд сар бүрийн 15-ний өдрөөр тасалбар болгон хөдөлгөөний мэдээ, цагийн гүйцэтгэлийг Авто тээврийн төвд хүргүүлнэ.    

3.3.Авто тээврийн төв нь тухайн сард бүртгэл, мэдээллийн төлбөрийн системээс үнэ төлбөргүй болон хөнгөлөлттэй зорчсон хүний тоо, цагийн гүйцэтгэлийг нийтийн тээврийн үйлчилгээ үзүүлсэн аж ахуйн нэгж, байгууллага тус бүрээр гаргаж, баталгаажуулсан тайланг сар  бүрийн 20-ний дотор багтаан аймгийн Засаг даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэст хүргүүлнэ.

Дөрөв. Нийтийн тээврийн хөнгөлөлтийг хуваарилах, олгох,

4.1.Авто тээврийн төв нь нийтийн тээврийн аж ахуйн нэгжид олгох нийтийн тээврийн хөнгөлөлтийн хуваарилалтыг тухайн сард шугамын үйлчилгээнд ажилласан “машин цагийн гүйцэтгэл”, “багтаамж ашиглалтын коэффициент”, GPS-ийн хяналтын цагийн гүйцэтгэлтэй тулган нийтийн тээврийн нөхөн олговрын тооцооллыг үнэн зөв гаргаж баталгаажуулан, аймгийн Засаг даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэст хүргүүлнэ.

4.2.Тухайн жилийн нөхөн олговрын үлдэгдлээс нийтийн тээврийн үйлчилгээ эрхэлж байгаа аж ахуй нэгж байгууллагуудад жилийн ажлын гүйцэтгэлээр санхүүжилт олгож болно. 

4.4.Нийтийн зорчигч тээврийн үйлчилгээнд ажиллах тээврийн хэрэгсэл нь 100%  GPS-ийн  хяналтын төхөөрөмжөөр бүрэн хангагдсан нөхцөлд тээвэрлэгч аж ахуйн нэгжүүдэд нийтийн тээврийн нөхөн олговрыг олгоно.

4.5.Авто тээврийн төв нь хүн амын суурьшил, зорчигч урсгал багатай чиглэлд зорчигч урсгалын судалгаанд үндэслэн тээвэрлэлтийг гүйцэтгүүлэх ба шаардагдах нийтийн тээврийн нөхөн олговрын хуваарилалтад “нэмэгдүүлэх коэффициент”-г хэрэглэж болно. “Нэмэгдүүлэх коэффициент” нь “багтаамжийн ашиглалтын коэффициент”-ийн 50 хувиас хэтрэхгүй байна.

4.5. Аймгийн Засаг даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэс, Санхүү төрийн сангийн хэлтэс нь хамтран баталгаажуулснаар нийтийн тээврийн хөнгөлөлтийн санхүүжилтийг сар бүрийн 25-ний дотор аж ахуйн нэгж, байгууллагад олгоно.

4.8.Орон нутагт гамшгийн нөхцөл байдал үүссэн, хөл хорио тогтоосон, аймгийн онцгой комиссын шийдвэр гарсан тохиолдолд мөн улирлын чанартай 6-р сарын 15-ний өдрөөс 8-р сарын 15 хүртэл нийтийн тээврийн хөнгөлөлтийг амралтын өдрийн тогтоосон тээврийн хэрэгслээр тооцож олгоно. Бусад тохиолдолд цагийн гүйцэтгэлээр бодолт хийнэ.

Тав. Бусад

5.1.Авто тээврийн төв нь нийтийн тээврийн хөнгөлөлтийн гүйцэтгэл, GPS-ийн диспетчерийн цагийн гүйцэтгэлийн тайланг жил, хагас жилээр аймгийн Засаг даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэст хүргүүлж Аймгийн Иргэдийн Төлөөлөгчдийн Хуралд тайлагнана.

5.2.Төсвөөс санхүүжүүлж байгаа нийтийн тээврийн нөхөн олговрын хуваарилалтыг аж ахуйн нэгж, байгууллагуудад олгож буй үйл ажиллагаанд аймгийн Засаг даргын Тамгын газрын Хөгжлийн бодлого төлөвлөлт, хөрөнгө оруулалтын хэлтэс, Санхүү төрийн сангийн хэлтэст болон холбогдох төрийн бус байгууллага хяналт тавина.

5.3.Авто тээврийн төв нь зорчих эрх бүхий иргэдийн тээвэрлэлтийн явцад хяналт тавьж илэрсэн зөрчил дутагдалд зорчигч тээвэрлэлт гүйцэтгүүлэх гэрээний дагуу хариуцлага тооцно.

5.4.Энэхүү журмаар хүлээсэн эрх үүргээ хангалтгүй биелүүлснээс үүсэх үр дагаврыг гэм буруутай этгээд холбогдох хууль тогтоомжийн дагуу хариуцлага хүлээнэ.

---ОО---

ИРГЭН ТА САНАЛАА СЭТГЭГДЭЛ ХЭСЭГТ БИЧИЖ ҮЛДЭЭНЭ ҮҮ. БАЯРЛАЛАА