МЭНДЧИЛГЭЭ
Эрхэм хүндэт эрдэмтэн багш, сурган хүмүүжүүлэгчид ээ!
ЮНЕСКО-гийн санаачилгаар дэлхийн багш нарын өдрийг 1996 оноос эхлэн дэлхийн 100 гаруй оронд жил бүрийн аравдугаар сарын 5-нд тэмдэглэсээр ирсэн бөгөөд манай улсын хувьд “Багш нарын баяр”-ын өдрийг 1967 оноос эхлэн жил бүрийн хоёрдугаар сарын эхний Ням гаригт тэмдэглэн өнгөрүүлдэг байсан билээ. 2014-2015 оны хичээлийн жилээс манай улсад дэлхийн багш нарын өдөр болох аравдугаар сарын 5-нд тэмдэглэх саналыг Монголын багш нарын холбоо, Монголын ахмад багш нарын холбооноос санал гаргасны дагуу багш нарын дунд судалгаа явуулахад оролцогчдын 74 хувь нь дэмжсэнээр 10 дугаар сарын 5-ны өдөр буюу буюу Дэлхийн багш нарын баярын өдрөөр хамтатган тэмдэглэх болсон билээ.
Эрдэнэтийн овооны орд газраас эрдэнэс ундарч, эх орны өнцөг булан бүрээс илгээлт өвөртлөн олон залуус ирж байхад тэдэнтэй зэррэгцэн анхны багш нар ирж, бяцхан шавь нараа хүлээн авч, анхны сургууль, цэцэрлэг нээгдэж нар туссан гэрэлт самбарт “А” үсгээ бичсэнээс хойш хойш Эрдэнэт хот, Орхон аймгийн боловсролын салбарын түүхэн он цагийн хуудас эргэж эхэлсэн билээ. Зууны манлай бүтээн байгуулалт Эрдэнэт хотын ололт амжилт бүхэн боловсролын салбартай салшгүй холбоотой. Эдгээр он жилүүдэд Орхон аймгийн эрдэмт багш та бүхний гар дээрээс улс, төр нийгэм, урлаг соёл, шинжлэх ухааны алдартнууд олон арваараа төрөн гарч, эх орондоо төдийгүй хүн төрлөхтний соёл иргэншлийн түүх, ололт амжилтыг бүтээлцэж яваад бахархахгүй байхын аргагүй.
Орхон аймгийн Засаг даргын мөрийн хөтөлбөр, 2020 он хүртэл хэрэгжүүлэх үйл ажиллагааны үндсэн чиглэлд багш нар болон боловсролын салбарт чиглэгдсэн олон ажил төлөвлөгдөн, хэрэгжүүлэн ажиллаж байна. Тухайлбал, тив, дэлхий, аймаг улсын чанартай уралдаан тэмцээнд шавь нараа чанартай бэлтгэж оролцуулсан багш нарыг урамшуулах, “багш солилцоо” хөтөлбөр хэрэгжүүлж гадаад, дотоодод туршлага судлуудах ажлыг зохион байгуулж байгаагаас гадна “Боловсролын салбарыг 2017-2020 онд хөгжүүлэх хөтөлбөр”, “Багш” дэд хөтөлбөрийг хэрэгжүүлэн, багш нарынхаа нийгмийн асуудлыг шийдвэрлэхийн төлөө ажиллаж байна. Түүнчлэн боловсролын салбарт чиглэгдсэн хөрөнгө оруулалтыг нэмэгдүүлэх, сургууль цэцэрлэгүүдийг шинээр барьж байгуулах ажлыг эрчимтэй хийж байна.
Орхон аймаг, Эрдэнэт хотынхоо хөгжил, цэцэглэлтийн төлөө хамтран ажиллаж байгаа эрхэм багш, сурган хүмүүжүүлэгч та бүхэндээ эрүүл энх, аз жаргал, ажлын амжилт, сайн сайхан бүхнийг хүсэн ерөөж, мэндчилье!
Орхон аймгийн Засаг даргын орлогч
Сэмжидийн БАТЖАРГАЛ
