Есдүгээр сарын 23,24-нд Улаан Үд хотын эдийн засаг, соёлын өдрүүд болно
Ирэх сарын 23,24-нд Улаан Үд хотын эдийн засаг, соёлын өдрүүдийг Орхон аймагт зохион байгуулахаар бэлтгэл хангаж байна. Орхон аймаг 2002 оноос Улаан Үд хоттой ах дүү хотын харилцаа тогтоон 2006, 2007 онд харилцан эдийн засаг, соёлын өдрүүдийг зохион байгуулж байжээ. Хамгийн сүүлд 2013 онд Орхон аймгийн эдийн засаг, соёлын өдрүүдийг Улан Үд хотод зохион байгуулсан.
Энэ оны зургаадугаар сард хоёр хотын удирдлагууд эдийн засаг, соёлын өдрүүд арга хэмжээг сэргээн зохион байгуулах санамж бичгийг үзэглэснээр 12 жилийн дараа Улан Үд хотын эдийн засаг, соёлын өдрүүд манай аймагт болох гэж буйгаараа онцлогтой.
Хил орчмын хотуудын хамтын ажиллагааг хөгжүүлэх, соёл болон бизнесийн салбарын хамтын ажиллагааг өргөжүүлэх нь энэхүү үйл ажиллагааны зорилго юм.
ОХУ-ын Буриад улсын нийслэл Улаан Үд хотоос 105 хүний бүрэлдэхүүнтэй баг ирэх бөгөөд албаны 10, зохион байгуулалтын 10, бизнесийн 10, уран бүтээлчдийн 75-80 хүн оролцохоо илэрхийлээд байна.
Мөн ОХУ-ын цаг үеийн нөхцөл байдалтай холбоотойгоор энэ удаад тус улсын бараа бүтээгдэхүүний үзэсгэлэн гарах боломжгүй, салбар салбарын бизнес эрхлэгчдийн төлөөллийг оролцуулах юм.
Ирэх жил Улаан Үд хотод зохион байгуулах Орхон аймгийн эдийн засаг, соёлын өдрүүдээр манай аймгийн бизнес эрхлэгчдийн бараа бүтээгдэхүүний үзэсгэлэнг гаргах боломжтой. Улаан-Үд хотын эдийн засаг, соёлын өдрүүдээр албан уулзалт, хоёр хотын хамтарсан гэрэл зурэг, маркийн үзэсгэлэн, уран бүтээлчдийн хамтарсан тоглолтыг зохион байгуулахаар бэлтгэл хангаж байна. Ажлын хэсгийг аймгийн Хамтын ажиллагаа, гадаад, дотоодын төсөл хөтөлбөр хариуцсан удирдагч Б.Оюун-Эрдэнэ ахалж байна.
Энэ сарын 3-нд Улан Үд хотын захирагчийн орлогч ахалсан баг бүрэлдэхүүн манай аймагт ажиллаж, урьдчилсан бэлтгэл ажилтай танилцах юм.
Мэдээллийн төв
