Монголын хүүхдийн спортын VIII наадамд оролцох баг тамирчдад амжилт хүслээ
Засгийн газрын тогтоолоор хоёр жилд нэг удаа зохион байгуулдаг Монголын хүүхдийн спортын зуны VIII наадмын нээлт энэ сарын 26 -нд Улаанбаатар хотод болно.
Өнөөдөр аймгийн ИТХ-ын дарга Д.Мөнхбат, Засаг дарга Б.Зоригтбаяр нар баг тамирчдад амжилт хүсэж, хувцас хэрэглэл гардууллаа.
“Мөрдөөдлийнхөө төлөө шударгаар өрсөлдье” уриан дор зохион байгуулж буй энэ удаагийн наадамд манай аймгаас 297 тамирчин, 57 багш дасгалжуулагчийн хамтаар чөлөөт бөх, жүдо, байт харваа, буудлага, бадминтон, волейбол, сагсан бөмбөг, гимнастик, даам, ширээний теннис, шатар, сагсан бөмбөгийн 3х3, самбо, усанд сэлэлт, таеквондо зэрэг 30 төрөлд хурд хүч авхаалж самбаагаа сорино.
Орхон аймаг, Эрдэнэт хотод спортын 16 төрлөөр өсвөрийн 196 тамирчин тогтмол хичээллэдэг. Тэдгээр, тамирчдынхаа амжилтыг ахиулах, шаардлагатай хэрэглэгдэхүүнээр хангахад орон нутгийн төсвөөс жил бүр санхүүжилт олгон дэмждэг. Тухайлбал, 2025 онд өсвөрийн шигшээ багийн тамирчдын зардалд 77,2 сая, энэ удаагийн VIII их наадамд оролцох нийт багт тамирчдын зардалд 167,5 сая төгрөгийн зардлыг тус тус шийдвэрлэсэн.
Монголын хүүхдийн спортын зуны наадамд манай аймгийн баг тамирчдын гаргасан амжилтыг дурьдвал...
-2015 онд зохион байгуулагдсан Монголын хүүхдийн спортын зуны V наадамд спортын 20 төрлөөр 200 тамирчин оролцож, 21 аймгийн дүнгээр 2-р байр;
-2019 онд зохион байгуулагдсан Монголын хүүхдийн спортын зуны VI наадамд спортын 18 төрөлд 243 тамирчин оролцож, 21 аймгийн дүнгээр 2-р байр;
-2023 онд зохион байгуулсан Монголын хүүхдийн спортын зуны VII наадамд спортын 20 төрөлд 217 тамирчин оролцож, 21 аймгийн дүнгээр 2-р байр эзэлсэн амжилтыг үзүүлсэн.
Мэдээллийн төв
