Хот тохижуулах газарт нийтийн тээврийн хэсэг байгуулсантай холбоотойгоор орон тоо, цалингийн нэмэгдлийг шинэчлэх тухай асуудлыг аймгийн ИТХ-ын ээлжит бус 18 дугаар хуралдаанаар хэлэлцэж, шийдвэрлэлээ.

Тодруулбал, Тээвэр аж ахуйн хэсэгт 40, авто зам засварын хэсэгт 6 орон тоо шинээр нэмэгдэж Хот тохижуулах газрын орон тоо 332 болж байна.  Тус газарт 2024 онд орон нутгийн болон Баян-Өндөр сумын хөрөнгө оруулалтаар 21 автобус, машин механизмыг нийлүүлсэн. Тодруулбал, энэ оны тавдугаар сард орон нутгийн төсвийн хөрөнгө оруулалтаар нийтийн тээвэрт парк шинэчлэлт хийж, эхний ээлжийн  10 автобусыг Хот тохижуулах газарт хүлээлгэн өгсөн. Ирэх аравдугаар сард үлдэгдэл  5 автобусыг хүлээн авна. 

Эдгээр автобуснуудыг хотын доторх  нийтийн тээврийн үйлчилгээнд явуулахаар шийдвэрлэсэн бөгөөд  инженер техникийн ажилчид болон мэргэжлийн хүмүүсийг авч ажиллуулах шаардлага үүссэн. 

Хэлэлцэж буй асуудалтай холбоотойгоор төлөөлөгчид асуулт асууж, санал хэллээ. 

Аймгийн Засаг дарга М.Түмэнжаргал: Засгийн газрын тогтоол, Төрийн  хэмнэлтийн тухай  хуультай холбоотойгоор  орон нутгийн өмчит  Нийтийн тээврийн авто баазыг тусад нь байгуулж болохгүй байгаа юм. Тиймээс Хот тохижуулах газрын Тээврийн хэсэг дээр Нийтийн тээврийн хэсэг байгуулсан. Нийтийн тээврийн парк шинэчлэлтийг үе шаттай хийж байна. Хот доторх нийтийн тээврийн үйлчилгээнд хоёр ээлжээр автобус явуулахаар бэлтгэж байна. Үүнтэй холбоотой орон тоо нэмэгдэж байгаа юм. 

Өнгөрсөн жилийн хөрөнгө оруулалтаар Хот тохижуулах газрын Авто зам засварын хэсэгт орон тоо, тоног төхөөрөмжийг шийдвэрлэж өгсөн.  Баян-Өндөр сумын хөрөнгө оруулалтаар мөн зарим нэр төрлийн авто техникийг шийдэж байгаа.  Тэдгээр техникүүдийг ажиллуулах хүний нөөц хэрэгтэй байгаа юм.  Иймд Хот тохижуулах газрын үйл ажиллагааны зардалд 1,9 тэрбум төгрөгийг  тусгасан.  Хэмнэлтийн тухай хууль цуцлагдвал орон нутгийн өмчит аж ахуйн нэгж байгуулах боломжтой. Нийтийн тээвэрт төр, хувийн хэвшил хамтран ажиллана. Шинэ Авто вокзал ашиглалтад орсонтой холбоотойгоор шинэ шугам нэмэгдэж байна. Мөн Говил багийн иргэдээс гарсан хүсэлтийн дагуу уг чиглэлд 3 шинэ автобус явж эхэлсэн. 

Хот тохижуулах газрын даргын үүрэг гүйцэтгэгч Н.Эрдэнэбаатар: Хот тохижуулах газрын ажилчдын цалингийн асуудал яригдаж байна. Нийтийн тээврийн автобусны жолоочийн цалингийн хэмжээг судалсан. Нийслэлд 3,5 сая төгрөгийн цалинтай байдаг юм  байна. Бид орон нутагтаа нийцүүлэн  нийтийн тээврийн автобусны жолоочийн үндсэн цалинг 1 сая 450 мянган төгрөгөөр тооцож,   гар дээрээ 2,4 сая төгрөгийн цалинтай байна гэж тооцоолсон.  2022 оноос 2024 онтой харьцуулахад Хот тохижуулах газрын цалин 1,5-2 дахин нэмэгдсэн.

Жишээлбэл, хог хаягдлын машины жолооч 2022  үндсэн цалин 641 мянган төгрөг авдаг байсан бол  2024 онд 1 сая 740 мянган төгрөг болсон байна.  Зам талбайн үйлчлэгч, авто замчны цалин 2022 онд 470 мянган төгрөг байсан бол 2024 онд 1 сая 274 мянган төгрөг болж нэмэгдсэн байна. Цалингийн нэмэгдэлтэйи холбоотойгоор хүний нөөцийн тогтвортой байдал бий болсон. 

Мэдээллийн төв