Эрдэнэт хотын түүхт 50 жилийн ой, Орхон аймгийн баяр наадмыг Засгийн газрын тогтоолын дагуу “Хангайн бүсийн хурд” морины уралдаантай хамтатган долдугаар сарын 23-25-ны өдрүүдэд хамтатган  тэмдэглэлээ.  Баяр наадам зохион  байгуулах хороон даргаар Хамтын ажиллагаа, гадаад дотоодын төсөл хөтөлбөр хариуцсан удирдагч Б.Оюун-Эрдэнэ ажиллалаа. Баяр наадмын зохион байгуулалтад 1000 гаруй төрийн албан хаагч, урлаг соёлын арга хэмжээнд 800 орчим уран бүтээлч оролцлоо.

Тавин жилийн өмнө эх орны дөрвөн зүг, найман зовхисоос 6000 гаруй Ардын армийн барилгачин дайчид, илгээлтийн эзэд төр нийгмийн байгууллагын ажилтан, инженерүүд, ЗХУ-ын бүрэлдэхүүнд байсан 15 Бүгд найрамдах улсын 172 хотоос ирсэн 43 үндэстэн ястныг төлөөлсөн 15 мянга гаруй, инженер, мэргэжилтнүүд, барилгачид, их бүтээн байгуулалтын уриагаар тал талаас цуглан, Эрдэнэтийг гар, сэтгэл нийлэн бүтээн босгосон хөдөлмөр, зүтгэл, эв найрамдлыг  бахдаж, бахархан дурсав. 

Баяр наадмын эхний өдөр  “Эрин зууны бахархал-Эрдэнэт” 50 жилийн ойд зориулан бүтээсэн ном, баримтат кино, пянз, уран зургийн нээлтийн үйл ажиллагаа болов.  Түүхийг мөнхөлж хойч үедээ үлдээв. Хагас зууны турш Эрдэнэтчүүдийн бүтээсэн баялаг түүх, бялхам их амжилтаас сорчлож, тоймлон ном, баримтат кино, уран зураг, пянзад мөнхөллөө. 

Эрин зууны бахархал-Эрдэнэт хотын түүхт 50 жилийн ойн баярт Монгол Улсын Ерөнхийлөгч У.Хүрэлсүх хүрэлцэн ирж, төрийн өндөр шагналуудаар амжилт бүтээл гаргасан хүмүүсийг шагнаж урамшуулсан нь баяр дээр баяр нэмлээ. Ерөнхийлөгчийн айлчлалын хүрээнд Төрийн хүндэт харуул Эрдэнэт хотын төв талбайд ёслол төгөлдөр жагслаа.

Түүнчлэн өдөр бүр урлагийн тоглолт, үдшийн цэнгүүн болж, хол, ойроос ирсэн зочин, гийчид үзэх харах юм ихтэй наадам  боллоо гэлцэж байна. 

Баяр наадмын нээлтийн зөвлөх найруулагчаар Урлагийн гавьяат зүтгэлтэн Д.Баярбаатар, Ерөнхий найруулагчаар Б.Лхагвасүрэн /Сүнс хамтлаг/ ажилласан.  

“Хот үүссэн түүх”, “Бүтээн байгуулалт”, “Эвтэй найрсаг Эрдэнэтчүүд”, “Шинэ цагийн Эрдэнэт” агуулгаар байгаль эхийн хишиг, Эрдэнэтийн овооны гүнд нуугдсэн баялаг, хүний хөдөлмөр, бүтээн байгуулалт, хөдөлмөрийн үнэ цэн, найрамдал, эв нэгдлийн хүчээр Эрдэнэт хот хөгжил дэвшлийн замд хэрхэн хөл тавьсан түүхийг гурван цаг үеэр уран сайхнаар, яруу тунгалгаар өгүүллээ. Эрдэнэт хотын 50 жилийн ойн баяр наадам нь зөвхөн нэгэн ойг тэмдэглэсэн арга хэмжээ бус, бүтээн байгуулалт, хөдөлмөрч зон олны бахархал, эв нэгдлийг илэрхийлсэн нь наадамчин олонд  мартагдашгүй дурсамж үлдээсэн биз ээ. 

Монгол төрийн сүр хүч, тусгаар тогтнолын дархлаа болсон Зэвсэгт хүчнийхээ түүхэн гавьяаг хүндэтгэн дурсаж, төрт ёсны бэлгэ тэмдэг Төрийн далбаандаа хүндэтгэл үзүүлж, Эрдэнэт цэргийн хүрээ ёслол төгөлдөр жагслаа.  Хагас зуун жилийн өмнө Эрдэнэтийн бүтээн босголтод Монгол, Оросын 6000 орчим барилгачин-дайчид оролцож, Эрдэнэтийг босгосон түүхтэй.  Тэдгээр барилгачин-дайчдын эрмүүн алхааны эрчим, эрэлхэг дайчин зориг, хөдөлмөрөөр богино хугацаанд бүтээн байгуулалт өрнөж, Эрдэнэт хот маань өнөөдөр Монгол Улсын аж үйлдвэр, шинжлэх ухаан, боловсрол, соёл, инновацын тэргүүлэгч төв болон цэцэглэн хөгжсөн юм. 

Эрдэнэтчүүдийн хайртай хүү, бөхөд хайртай Монгол түмний бахархал, Монгол Улсын начин агсан Ө.Батзулын хүү Б.Дуулалын ирээдүйд зориулан аймгийн Иргэдийн төлөөлөгчдийн хурал, Засаг даргын Тамгын газар 50 сая төгрөгийн хадгаламж нээж өглөө. Хүн ардаа баярлуулж, нутаг орныхоо нэрийг өндөрт өргөсөн сайхан хүний үйл хэрэг, үлдээсэн өвийг  мартах учиргүй билээ. 

Газар газрын зургаан насны хурдан хүлгүүдээс түрүүлж, айрагдсан түмэн эхийн манлай болсон хүлгүүдийг Эрдэнэт хотын аж ахуйн нэгж, байгууллагууд автомашинаар байллаа.  Улс аймгийн цолтой хүчин 256 бөхийн барилдаанд Монгол Улсын Харцага О.Мөнх-Эрдэнэ 8 даван түрүүлж, Монгол Улсын үнэн зоригт харцага Б.Зоригтбаатар 7 давж үзүүрлэлээ.Түрүү бөхийг БОСА ХХК тэргүүтэй Эрдэнэтийн унаган залуус Toyota Land Cruiser 300 автомашин, үзүүр бөхийг “Баянмараат” ХХК хоёр өрөө орон сууцаар мялаалаа.Үндэснй нум сум, шагайн харваа зэрэг төрлүүдэд 1000 гаруй  харваачид онч мэргэнээ үзэн уралдлаа. Тэдний амжилтыг орон нутгийн аж ахуйн нэгж байгууллагууд автомашин, 155 сая төгрөгөөр байлсан билээ. 

Эрдэнэт  50 жилийн хугацаанд  Монголын аж үйлдвэржилтийн түүх, ах дүү найрамдлын бэлгэ тэмдгийн хамгийн тод илэрхийлэл, монгол хүний соёл, боловсролын түүх, Монгол Улсын эдийн засгийн тулах багана болон батжин бэхжиж “Эрин зууны бахархал” болон дуурсагдаж, хагас зуун жилийн түүхээ ийн  өргөн дэлгэр тэмдэглэн өнгөрүүллээ. 

Эрдэнэт хотын 50 жилийн түүх бол Монголын аж үйлдвэржилтийн түүх, ах дүү найрамдлын бэлгэ тэмдгийн хамгийн тод илэрхийлэл, монгол хүний соёл, боловсролын түүх, Монгол Улсын эдийн засгийн тулах багана болон батжин бэхжиж “Эрин зууны бахархал” болон дуурсагдаж байна.

Монгол төрийн мэргэн бодлогын биелэл, эв нэгдэл, найрамдлын бэлгэдэл, эх орны дөрвөн зүг-найман зовхисоос ирсэн эрдэнэт хүмүүсийн нэгдэл болсон Эрдэнэт хот ирэх бүрт өнгөө засаж, үүдээ нээн угтана аа. 

Мэдээллийн төв