Төрийн жинхэнэ албан хаагчийн тангараг өргөх ёслол боллоо
![](https://mail.erdenet.mn/images/news/63f0722cefe048f382f32940a57599a2.jpg)
Өнөөдөр Төрийн албаны өдөр тохиож байна. Энэ өдөр аймгийн 12 төрийн захиргааны байгууллагын 19 албан хаагч төрийн жинхэнэ албан хаагчийн тангараг өргөлөө.
Төрийн жинхэнэ албан хаагчийн тангараг өргөх журмыг анх 1995 онд баталж, 29 жилийн дараа Ерөнхийлөгчийн зарлигаар шинэчилсэн. Тодруулбал, Монгол Улсын Засгийн газрын энэ оны тавдугаар сарын 15-ны өдрийн 205 дугаар тогтоолоор түүхэн үйл явдлын ой, тэмдэглэлт өдрийн жагсаалтад “Төрийн албаны өдөр”-ийг жил бүрийн долдугаар сарын 3-нд байхаар тогтоосон билээ.
Ёслолд аймгийн Засаг дарга М.Түмэнжаргал, ЗДТГ-ын дарга Ш.Ганболд болон агентлагын удирдлагууд оролцов. Засаг дарга М.Түмэнжаргал “Аймгийн хэмжээнд төрийн захиргааны болон төрийн үйлчилгээний 95 байгууллага, орон нутгийн өмчит 11 байгууллага, төрийн тусгай чиг үүргийн 9 байгууллагад нийт 6173 албан хаагч ажиллаж байна. Үүнээс 5007 төрийн жинхэнэ албан хаагч төрийн чиг үүргийг хүргэн ажиллаж байна. 449 төрийн жинхэнэ албан хаагчийн эгнээнд шилжиж буй Та бүхэнд ажлын амжилт хүсье. Та бүхэн өргөсөн тангарагтаа үнэнч, амжилт бүтээл дүүрэн ажиллахыг хүсье” гэлээ.
Төрийн алба нь дотор төрийн захиргааны, төрийн тусгай, төрийн үйлчилгээний гэсэн ангилалтай. Төрийн захиргааны албан хаагч нь ерөнхий болон тусгай шалгалт өгч тухайн албан тушаалдаа тодорхой туршилтын журмаар ажиллан төрийн захиргааны албыг нэр төртэй хааж чадахаа төрийнхөө өмнө харуулсан байх журамтай байдаг билээ. Энэ шаардлагыг хангасан төрийн захиргааны албан хаагч төрийнхөө өмнө тангараг өргөх ёстой.
Үүний дагуу өнөөдөр Аймгийн Засаг даргын Тамгын газар, аймгийн Газрын харилцаа барилга хот байгуулалтын газар, Соёл урлагийн газар, Хотын Захирагчийн алба, Эрүүл мэндийн газар, Боловсрол, шинжлэх ухааны газар, Жаргалант сум ЗДТГ,Нийгмийн даатгалын газар, Орон нутгийн өмчийн газар, Хөдөлмөр халамж үйлчилгээний газар, Стандарт, хэмжил зүйн хэлтэс, Татварын газар нийт 12 төрийн захиргааны байгууллагын 19 төрийн албан хаагч тангараг өргөлөө.
Мэдээллийн төв