Зургадугаар сарын 1-нд авто замын хөдөлгөөнд дараах байдлаар зохицуулалт хийнэ

Олон улсын хүүхдийн эрхийг хамгаалах өдөр буюу 6 сарын 1-нд Холбооны уулзвараас Баян худалдааны төвийн уулзвар хүртэлх авто замыг 10:00-20:00 цаг хүртэл хязгаарлаж, АВТО МАШИНГҮЙ  өдөр байх зохицуулалтыг хийнэ.   Орхон аймгийн Цагдаагийн газрын Замын цагдаагийг тасгийн дарга,хошууч Х.Одбаяр өнөөдөр зургадугаар сарын 1-ний өдрийн замын хөдөлгөөний зохицуулалт, хамгаалалт зохион байгуулалтын талаар олон нийтэд мэдээлэл өглөө. 

-Авто замын хөдөлгөөн хязгаарласан Холбооны уулзвараас Баян худалдааны төвийн уулзвар хүртэлх хэсэгт  онцгой, эмнэлэг, цагдаагийн машин иргэдийн эрүүл аюулгүй байдлыг хангаж хөдөлгөөнд оролцоно. Иргэний хувийн авто машин хөдөлгөөнд оролцохгүй. Тиймээс төв замтай ойр орон сууцны хорооллын иргэд зургадугаар сарын 1-нд авто машинтай хөдөлгөөнд оролцох бол хязгаарлалтын бүсээс ангид газар  машинаа байрлуулахыг сануулья. 

    Хүүхдийн паркийг хариуцаж байгаа ААНБ-аас энэ жил хүүхдийн баяраар  ажиллуулна гэсэн мэдээллийг бидэнд өгсөн. Үүнтэй холбоотойгоор парк чиглэлийн авто замын хөдөлгөөнд зохицуулалт хийнэ. Хүүхдийн парк орчимд авто машины зогсоол байхгүй. Ойролцоох   7 дугаар цэцэрлэг,  Наадмын талбай, Хангайн бүсийн худалдааны төвийн урд талын талбайн авто машины зогсоолыг ашиглах боломжтой. Түүнээс биш тээврийн хэрэгслийн зорчих хэсгийн нэгдүгээр эгнээнд тавьж замын хөдөлгөөнд саад учруулахгүй байхыг жолооч нараасаа хүсье. 
Өнгөрсөн жил “Эрдэнэт цэцэрлэгт хүрээлэн” рүү чиглэсэн хөдөлгөөн эрчимтэй байсан. Үүнтэй холбоотойгоор иргэдээс гомдол санал их ирсэн. Энэ байдлыг энэ жил дахин гаргахгүй байх үүднээс цагдаагийн  байгууллагаас тодорхой зохион байгуулалтыг хийхээр төлөвлөсөн. 

Ингэхдээ А1002  авто зам буюу VI-10 дугаар байрны уулзвараас бүх тээврийн хэрэгслийн хөдөлгөөнийг баруун гар тал руугаа гэр хороолол  чиглэл рүү задална.  Гэхдээ тухайн өдрийн нөхцөл байдлаас шалтгаалж энэ зохицуулалтыг хийнэ. Өөрөөр хэлбэл, өнгөрсөн жилийнх шиг замын хөдөлгөөнд ачаалал үүссэн тохиолдолд гэсэн үг. 

      “Эрдэнэт цэцэрлэгт хүрээлэн”-гийн гадна талбайн тээврийн хэрэгслийн зогсоолын багтаамж 250 авто машиных.  Ойр орчимд нь Танил, Хиймор, Залуучуудын ордон зэрэг байгууллагуудын гадна талбайг иргэд  ашиглах боломжтой. Өнгөрсөн жил иргэдээс гаргасан нийтлэг дүр төрх нь ногоон байгууламж дээр авто машинаа байршуулсан. Үүнээс болж шороо тоос их босох, авто машин шүргэлцэх, ногоон байгууламж устах зэрэг сөрөг үр дагавар гарсан. Хэдий баярын өдөр боловч нийтийн эрх ашгийн төлөө цагдаагийн байгууллага ажиллаж байгаа гэдгийг нийт иргэд маань ойлгож цагдаагийн алба хаагчдын тавьсан шаардлагыг биелүүлж  замын хөдөлгөөндөө соёлтой оролцохыг уриалж байна гэлээ. 

Эцэг эхчүүдэд  бага насны хүүхэддээ тавих хараа хяналтаа сайжруулахыг сануулав 

Замын хөдөлгөөний дүрэм дээр 10 хүртэлх насны хүүхдийг унадаг дугуйтай заавал харгалзах хүнтэйгээр замын хөдөлгөөнд оролцно гэж заасан байдаг. 10-16 насны хүүхэд харгалзах хүнгүйгээр унадаг дугуй унаж болно. Гэхдээ зөвхөн зориулалтын зам талбай дээр  унах ёстой.

Гэтэл өнөөдөр 11,12 настай хүүхдүүд унадаг дугуйтайгаа автомашинтай зэрэгцээд замын хөдөлгөөнд оролцож байна. Тээврийн хэрэгсэл дунду унадаг дугуй унах нь өөрийн амь нас, эрүүл мэндэд эрсдэл учруулж байгаа юм шүү дээ.  Тиймээс бага насны хүүхэд унадаг дугуй унаж байгаа бол авто замын зорчих хэсэг рүү оруулахгүй байх хэрэгтэй.  Мөн бага насны хүүхэд баярын өдөр төөрөх тохиолдол гардаг. Цагдаагийн  байгууллагын хөдөлгөөнт эргүүл мөн хүүхдийн байгууллага хамтран ажиллана. Тиймээс эцэг, эхчүүдэд хүүхэддээ тавих хараа хяналтаа сулруулахгүй байхыг хүсье. 

Мэдээллийн төв