2022 оны үйл ажиллагааны үр дүнгээр тэргүүлсэн төрийн байгууллагуудад өнөөдөр Засаг дарга С.Батжаргал, Засаг даргын орлогч А.Түвшинжаргал нар шагналыг нь гардууллаа.  2022 оны ажлаараа орон нутагтаа тэргүүлсэн байгууллагуудаар Татварын хэлтэс, Статистикийн хэлтэс, Хүнс, хөдөө, аж ахуйн газар, Онцгой байдлын газар, Хөдөлмөр, халамж үйлчилгээний газрын хамт олон шалгарсан билээ. 

Дээрх байгууллагуудыг аймгийн Засаг даргын 2023 оны энэ сарын 17-ны өдрийн А/413 дугаар захирамжаар тус бүр өргөмжлөл, гурван  сая төгрөгөөр шагнахаар шийдвэрлэсэн бөгөөд өнөөдөр ийн шагналыг гардуулав. 

Мөн эдгээр байгууллагууд салбартаа улсын хэмжээнд 2022 оны ажлаараа тэргүүлсэн юм.  Засаг дарга С.Батжаргал үйл ажиллагааны эхэнд “Ирэх жилүүдэд энэхүү амжилтаа бататгаж ажилдаа илүү санаачилгатай, иргэддээ түргэн шуурхай үйлчилсэн иргэдийнхээ талархлыг хүлээсэн төрийн албан хаагчид байхын ерөөл өргөе.  Орхон аймаг энэ жил Засгийн газрын тогтоолоор баталсан хяналт шинжилгээ үнэлгээгээр улсдаа тэргүүлж 12 дахь удаа Монгол Улсын шилдэг аймгаар шалгарсан.  Энэ жил 12 оноогоор тэргүүлсэн өмнөх жилүүдээс илүү онцлог байлаа. Энэ бүхэн Орхон аймгийн нийт төрийн албан хаагчдын, ард иргэдийн, уурхайчдийн, баялаг бүтээгч үйлдвэрлэгчдийн хамтын хичээл зүтгэл, хөдөлмөрийн үр дүн юм. 
Та бүхэндээ эрүүл энхийг хүсэн ерөөе” гэсэн. 

Шалгарсан байгууллагуудын мэдээллээс онцлон хүргэе. 

Татварын үйлчилгээ 100 хувь цахимд шилжив 

2020 оноос Татварын хууль эрх зүйн орчны хоёр дахь шатны шинэчлэл хийгдснээр татварын алба нь татвар төлөгчдийн хэрэгцээ шаардлагад нийцүүлэн сегментэд суурилсан алба болж татвар төлөгчдөд тохирсон үйлчилгээг үзүүлж байна. 

Төрийн үйчилгээг цахимжуулах ажлын хүрээнд татварын алба нь бүх үйл ажиллагаагаа 100 хувь цахимд шилжүүлж, татвар төлөгчийн бүртгэл, тайлагнал, төлөлт хийхэд 20 секундээс 2 минутыг хаана байгаагаас үл хамаарч үйлчилгээ авдаг болж үйлчилгээнд суурилсан байгууллага болсон. 2021, 2022 оныг Татварын боловсролыг дээшлүүлэх жил болгон зарлаж татвар төлөгчийг төлөвшүүлэх ажлуудыг хийн, татвар төлөгчдийн хууль эрх зүйн мэдлэгийг дээшлүүлэхээс гадна, төрийн  үйлчилгээг цахимаар хэрхэн авах талаар чиглэсэн ажлуудыг зохион байгуулж  “ebarimt” болон “e-mongolia” системийн хэрэглээг дээшлүүлэх тал дээр анхаарч ирсэн. 

Тус хэлтэс нь, 2022 онд улсын төсөвт 12.9 тэрбум төгрөгийн орлого төвлөрүүлэхээс 14.1 тэрбум төгрөгийн орлого төвлөрүүлж төлөвлөгөөг 109.9 хувиар,  аймаг орон нутгийн төсөвт 163.1 тэрбум төгрөгийн орлого төвлөрүүлэхээс 203.4 тэрбум төгрөгийн орлого төвлөрүүлж төлөвлөгөөг 124.7 хувиар тус тус  биелүүлсэн амжилттай байна.

2022 онд үйл ажиллагаандаа  “CALL CENTER” үйлчилгээг нэвтрүүлсэн. Энэ үйлчилгээг нэвтрүүлснээр нэгэн зэрэг олон дуудлага хүлээн авах, давхар дуудлага ирэх үед дуудлагыг алдалгүй хүлээн авч зөвлөгөө, зааварчилгааг хүргэн ажиллаж,   нэг дуудлагаар асуудлыг шийдвэрлэх, төрийн үйлчилгээг цаг  тухайд нь авах боломжоор хангаад байгаа юм. 
Мөн Орхон аймгийн Татварын хэлтэс Чанарын менежментийн тогтолцоо ISO9001:2015 стандартыг татварын албаны системийн хэмжээнд анхлан хэрэгжүүлсэн байгууллага хамт олон билээ. 

Статистикийн бүтээгдэхүүний нэгдсэн QR  кодтой болов 

Статистикийн  хэлтэс нь 2022 онд албан ёсны болон захиргааны 112 төрлийн мэдээ тайланг давхардсан тоогоор 13178 мэдээлэгчээс сар, улирал, хагас жил, жилийн давтамжтайгаар гаргуулан авч боловсруулалт хийв. Мөн Статистикийн тухай хуульд заасан Хөдөө аж ахуйн улсын ээлжит тооллого, жилийн эцсийн мал, тэжээвэр амьтдын тооллого болон 7 төрлийн түүвэр судалгааг аймгийн төвшинд амжилттай зохион байгуулж,  11702  өрх, иргэн, аж ахуйн нэгжийг бүрэн хамруулсан. Үүний зэрэгцээ Орхон аймагт хэрэгжиж буй “Цахим-Эрдэнэт-1” хөтөлбөрийн хүрээнд тус хэлтсээс бэлтгэн гаргадаг статистикийн бүтээгдэхүүний нэгдсэн QR кодтой болж, уг кодод 12 цэс бүхий 224 мэдээллийг оруулсанаар  иргэд гар утсаараа болон  цахимаар мэдээллийг шууд үзэх боломжийг бүрдүүлсэн. Тус хэлтсийн хамт олон нь улсын хэмжээнд салбартаа 2022 оны ажлаараа тэргүүн байранд шалгараад байна. 

Хүнснийн ногооны нийт ургацат эзлэх хүлэмжийн ургац 0,4 хувиар өсөв 

Аймгийн Хүнс хөдөө аж ахуйн газар 2022 ажлын үр дүнгийн үзүүлэлтээр салбарын хэмжээнд улсад гуравдугаар байр эзэлж, мөн орон нутагтаа манлайллаа. 2022 онд хүнсний ногооны нийт ургацат хүлэмжийн ургац 4,7 хувийг эзэлж өмнөс оноос 0,4 хувиар өссөн. Мөн малын тоо толгойн өсөлтөөр 166,1 мянган толгой мал өсгөн байжуулж, өмнөх оноос 11,6 мянган толгойгоор илүү байна.

Хүнсний сабларт малын махын 61,5 хувь, сүүний 2 хувь, цагаан идээний 2,8 хувь, гурил 0,02 хувь, гурилан бүтээгдэхүүний 36,8 хувь, төмсний 82,5 хувь хүнсний ногооны 90,9 хувийг орон нутгийн дотоодын үйлдвэрлэлээр хангажээ. 

Онцгой байдлын газрын алба хаагчид 99 түймрийн дуудлагаар 2,1 тэрбум төгрөгийн эд хөрөнгийг авран хамгаалав 

Аймгийн Онцгой байдлын газар Монгол Улсын Засгийн газрын 2016 оны 66 дугаар тогтоолоор 2016 оноос Хойд бүсийн төв болон өргөжин ажиллаж байна.  Бүс нутгийн онцлог, гамшиг осол, аюулт үзэгдэл, аж ахуйн нэгж байгууллагын өмч хөрөнгө, иргэдийн амь насыг авран хамгаалах, тэдгээрт учрах хохиролыг бууруулах, урьдчилан сэргийлэх арга хэмжээг зохион байгуулж   буй.  
2022 онд...

• Алба хаагчдын мэргэжлийн ур чадвар, сургалтын чанарыг дээшлүүлж, албанд хандах хандлагыг нэмэгдүүлэх, 
• Гамшгийн эрсдэлийн үнэлгээнд суурилсан төлөвлөлтийг сайжруулж, ангиллын сургалт, сурталчилгааг хүртээмжтэй зохион байгуулах гэсэн 2 зорилт дэвшүүлэн 59 арга хэмжээг төлөвлөж, 98 хувьтай хэрэгжүүлэн ажилласан байна. Энэ онд аврах ажиллагааны дуудлагын тоо 77.7 хувь буурч, объектын гал түймрийн 99 удаагийн гал түймрийн дуудлагаагаар гарч 2,1 тэрбум төгрөгийн эд хөрөнгө авран хамгаалсан, гал түймэр, гамшиг ослын улмаас учирсан хохирлын хэмжээ 21.3 хувь буурсан. 
• Аймгийн Засаг дарга, Монгол Улсын Шадар сайдтай байгуулсан гэрээний хэрэгжилтийг хангах ажлын хүрээнд Гамшгаас хамгаалах иж бүрэн сургуулийг 2022 онд 10 жил тутамд зохион байгуулагддаг онцлогтой энэхүү сургуулийг Иргэд, олон нийтийн танхимын сургалт, Удирдах бүрэлдэхүүний сургалт, Команд штабын сургууль, Дуурайлган үзүүлэх дадлага сургууль гэсэн үндсэн 4 хэсэгтэйгээр  зохион байгуулж Орхон аймаг дүүрэн хангалттай “ОНЦ” үнэлгээтэй дүгнэгдсэн.  
• Онцгой байдлын албаны техник, тоног төхөөрөмжийн хүчин чадал, алба хаагчдын ая тухтай орчинд ажиллах нөхцөлийг бүрдүүлж  Орон нутгийн 98 сая төгрөгийн хөрөнгө оруулалтаар Гал түймэр унтраах, аврах 56 дугаар ангийн тавиулангийн өргөтгөл, 118,0 сая төгрөгийн аймгийн гамшгаас хамгаалах алба, мэргэжлийн анги, иргэд, алба хаагчдад зориулсан дадлага сургууль хийх сургалтын цамхаг,  215 сая төгрөгийн уснаас эрэн хайх аврах завь, 32,0 сая төгрөгийн усны мотоцикль, Гал унтраах шуурхай албаны автомашинуудаар парк шинэчлэл хийсэн. 

Нийгмийн халамжийн үйлчилгээ 100 хувь цахимд шилжлээ 

Монгол Улсын Засгийн газраас хэрэгжүүлж буй “Цахим Монгол” хөтөлбөрийн хүрээнд 2020 оны 08 дугаар сараас эхлэн нийгмийн халамжийн үйлчилгээ нь ehalamj.mn цахим системд үе шаттайгаар шилжиж эхэлсэн. 2020 онд 6, 2021 онд 26 төрлийн үйлчилгээ дээрх системд шилжсэн. 2022 онд 40 үйлчилгээг цахимд шилжүүлснээр нийгмийн халамжийн үйлчилгээ 100 хувь цахимжсан. 

Хөдөлмөр эрхлэлтийг нэмэгдүүлэх, ажлын байр бий болгох, хөдөлмөрийн насны ажилгүй иргэдийг сургах, чадавхжуулах чиглэлээр хөдөлмөр эрхлэлтийг дэмжих санд 1 тэрбум 403.1 сая төгрөгийг улсын төсөвт суулган хөдөлмөр эрхлэлтийг дэмжих 7 хөтөлбөрийн 28 арга хэмжээнд 900 сая төгрөгийг  зарцуулсан. 

Монгол Улсын Засгийн газар, Дэлхийн банкны Олон улсын хөгжлийн ассоциацийн хооронд байгуулсан “Санамж бичиг”-ийн хүрээнд “Хөдөлмөр эрхлэлтийг дэмжих төсөл”-ийг санхүүжүүлэн Хөдөлмөрийн нэгдсэн систем “EJOB” платформыг хөгжүүлэх, туршилт тестийн ажлуудыг шат дараатайгаар хийж гүйцэтгэсэн. Энэхүү программ нь ажил олгогч болон ажил хайгчийн зүгээс нэвтрэх, мэдээллээ тогтмол шинэчлэх, солилцох боломжийг олгосноороо давуу талтай болсон байна. 

Үзүүлж байгаа үйлчилгээний арга, хэлбэрийг боловсронгуй болгох зохион байгуулалтын арга хэмжээ авч хэрэгжүүлэх чиглэлээр Тус газрын дэргэд Дэлхийн банкны 110 сая төгрөгийн санхүүжилтээр “Хөдөлмөр эрхлэлтийн ажил мэргэжлийн төв, Швейцарын хөгжлийн агентлагийн 24.6 сая төгрөгийн санхүүжилтээр “Залуучуудын хөдөлмөр эрхлэлтийн загвар төв”-ийг байгуулж  үйл ажиллагаагаа явуулж байна. Хөдөлмөрийн зах зээлийн болон ажил, мэргэжлийн чиглэлээр ажил хайгч нарт мэдээлэл, зөвлөгөө өгөх, ажлын байрны зарыг олон нийтэд түгээх, ажилд зуучлах зэрэг хөдөлмөр эрхлэлтийн үйлчилгээг үр дүнтэй хүргэх орчин нөхцөлийг сайжруулан, үйлчилгээний шинэлэг өнгө төрхийг бүрдүүлж, гадаадын хөрөнгө оруулалтыг орон нутагтаа татаж 134,6 сая төгрөг хөрөнгө оруулалтыг хийжээ. 

Мэдээллийн төв