Эрдэнэтийн 50 жилийн түүхийг өгүүлсэн бүтээлүүдийг соёлын байгууллагуудад гардууллаа
Эрдэнэт хотын 50 жилийн ойн хүрээнд бүтээсэн түүх, соёлын бүтээлүүдийг аймгийн Соёлын байгууллагууд, ерөнхий боловсролын сургуулиудын номын сан, аймгийн Музей болон Нийтийн номын сан, хэвлэл мэдээллийн байгууллагуудын редакцид өргөн барилаа.
Эрдэнэт хотын 50 жилийн ойн хүрээнд бүтээсэн түүхэн боть ном, “Эрин зууны бахархал Эрдэнэт” уран зураг, гавьяат уран бүтээлчдийн дуулсан Эрдэнэт хотын сүлд 12 дуунаас бүрдсэн пянз, мөн Эрдэнэт хотын зохиолч, яруу найрагчдын бүтээлийн дээжис байв.
50 жилийн ойн ажлын хэсгийн дарга Б.Оюун-Эрдэнэ энэ үеэр “50 жилийн тэртээ эх орны өнцөг булан бүрээс ирсэн залуусын сэтгэл, хүч, хөдөлмөрөөр бүтсэн хотынхоо түүхийг ном, баримтат кино, уран зураг, пянз зэрэгт мөнхөлсөн нь ирээдүй хойч үед өвлөгдөх соёлын үнэт өв юм. Эрдэнэтийн түүх үргэлжлэх ёстой, энэ түүхийг түгээн дэлгэрүүлэх ёстой. Тэр түүхээр иргэд, хүүхэд, залуус бахархдаг байх учиртай ” гэлээ.
Аймгийн ИТХ-ын Нарийн бичгийн дарга Ш.Ганболд “Эрдэнэт хотын 50 жилийн түүхийн боть ном нь баримт, эх сурвалжид тулгуурласан болохыг онцлов. Тэрбээр, энэ бүтээл цаашид судлаачид, багш, сурагчид болон нийт иргэдэд үнэ цэнтэй эх сурвалж болно гэлээ.
Мөн энэ үеэр дэлхийн шатрын 44 дүгээр олимпиадын аварга, ОУХМ Б.Мөнгөнзулын гарын үсэгтэй шатрыг аймгийн Музейд хадгалууллаа.
Эрдэнэт хотын түүх, соёл, урлагийн өвийг нэг дор хадгалсан эдгээр бүтээлийг Номын сан, Музей, Соёлын байгууллага болон Хэвлэл мэдээллийн байгууллагуудад хүргэснээр иргэд, хүүхэд, залуус хотынхоо түүх, бүтээн байгуулалт, соёлын өвтэй танилцах, судлан мэдэх боломжтой юм.
Мэдээллийн төв
