Иргэдийн уулзалт: Иргэдээс гарсан санал, хүсэлтийн мөрөөр 125 ажлыг хэрэгжүүлнэ

Аймгийн Засаг дарга Б.Зоригтбаяр нэгдүгээр сарын 19-24-ний өдрүүдэд хэлтэс агентлагийн удирдлагуудын хамтаар 13 байршилд 29 багийн иргэдтэй уулзаж, 2025 оны үйл ажиллагааны тайлан, 2026 онд хийх хөрөнгө оруулалтын ажлаа танилцуулсан юм.

Уулзалтад Баян-Өндөр сумын 1902 иргэн, Жаргалант сумын 260 иргэн нийт 2162 иргэн оролцож, 612 санал, хүсэлтийг амаар, 280 санал, хүсэлтийг бичгээр, нийт 892 санал, хүсэлтийг гаргасан. Засаг дарга, холбогдох албаныхан иргэдээс гаргасан зарим асуулт, санал хүсэлтэд газар дээр нь хариулт өгсөн бол хугацаа шаардлагатай асуудлуудыг нэгтгэн төлөвлөгөө гарган ажиллаж байна.

Тодруулбал, иргэдийн уулзалтаас гаргасан санал, хүсэлтийн мөрөөр 125 ажлын төлөвлөгөө гарган хагас жилээр, бүтэн жилээр биелэлтийг танилцуулахыг байгууллагуудад үүрэг болгоод байна. Уулзалтын үеэр аймгийн Засаг даргын баг хамт олны хамтаар 2025 онд хийсэн хөрөнгө оруулалт бүтээн байгуулалтын ажил, ИШС, дэд бүтэц, гэрэлтүүлэг, цахилгаан эрчим хүчний хангамж, авто замын шинэчлэл, боловсролын салбарт оруулсан хөрөнгө оруулалтын ажлын үр дүнд иргэд талархал илэрхийлсэн юм.

Иргэдээс гаргасан санал,хүсэлтийг агуулгаар нь ангилж үзвэл:

1. Талархал-80

2. Нийтийн тээвэртэй холбогдолтой асуудлаар-57

3. ИШС-тэй холбогдолтой асуудлаар-50

4. Тохижилтийн асуудлаар-49

5. СӨХ-ны үйл ажиллагаатай холбогдолтой асуудлаар-47

6. Зам засварлах асуудлаар-45

7. Газрын асуудлаар-38

8. Барилгын асуудлаар-36

9. Бусад асуудлаар-490 санал, хүсэлтийг тус тус гаргасан байна.