Орхон аймагт гемодиализийн эмчилгээнд тогтмол ордог 32,  хүлээлтэд 35 иргэн  байдаг. Харин аймгийн харьяалалтай хэрнээ Булган аймагт эмчилгээнд ордог 3, Улаанбаатарт эмчилгээнд ордог 7 иргэн бий. Эдгээр иргэддээ болон хойд бүсийн хэмжээнд гемодиализ, хэвлийн диализийн эмчилгээ үйлчилгээг хүлээгдэлгүй үзүүлэх  боломжтой боллоо.  

Тодруулбал, төр, хувийн хэвшлийн түншлэлээр БОЭТ-ийн нэг давхарт  “Медвик диализийн төв” -ийг байгуулж, өнөөдөр албан ёсоор үйл ажиллагаа нь эхлэв. 

Гемодиализ эмчилгээ гэдэг нь бөөрний үйл ажиллагаа алдагдсан үед цусыг аппаратаар шүүн цэвэрлэж, биеэс хорт бодис, илүүдэл ус, давсыг зайлуулах эмчилгээ юм.  2009 онд БОЭТ энэ төрлийн эмчилгээ үйлчилгээг орон нутгаас анхлан нэвтрүүлж байсан бол  Эрдэнэт хотын 50 жилийн ойг тохиолдуулан төв болгон үйл ажиллагааг нь өргөжүүлсэн  анхны аймаг болж байна. 

Төр, хувийн хэшлийн түншлэлийн хүрээнд гемодиализ, хэвлийн диализийн тусламж үйлчилгээ үзүүлэх ажил гүйцэтгэх тендер зарласны дагуу “Их шүүдэргэнэ импорт” ХХК шалгарсан.  Тус компанийн  “Медвик диализийн 1,2 дугаар төв улсын нэг болон гуравдугаар эмнэлгийн дэргэд үйл ажиллагаагаа явуулдаг. Орон нутагт анхны төвөө Орхон аймагт байгуулж буйгаараа онцлог юм.   

Сүүлийн таван жилийн хугацаанд орон нутгийн хөрөнгө оруулалтаар эрүүл мэндийн салбарт нийт 20 тэрбум төгрөгийн хөрөнгө оруулалт  хийсэн. Үр дүнд анхан болон лавлагаа шатлалын эрүүл мэндийн байгууллагуудын тоног төхөөрөмжийн хангалт 95 хувьд хүрсэн нь салбарын хөгжилд гарсан бодит ахиц дэвшил гэдгийг аймгийн Засаг дарга Б.Зоригтбаяр онцолсон. Мөн тэрээр, төр хувийн  хэвшлийн түншлэлээр эрүүл мэндийн салбарт томоохон үйл ажиллагааг эхлүүлж байгааг тодотгосон юм. 

Улсын клиникийн нэгдүгээр төв эмнэлгийн бөөрний их эмч, клиникийн профессор,бөөрний зөвлөх зэргийн эмч Д.Хурцбаяр энэ үеэр “Миний хувьд ихээхэн бэлгэшээж байна. 21 аймгаас хамгийн анх Орхон аймаг гемодиализийн эмчилгээг нэврүүлж байлаа. 2018 онд хэвлийн диализ эмчилгээг мөн анхлан хийж эхэлсэн. 2026 онд эмнэлгийнхээ тасгийг төв болгож үйл ажиллагааг нь өргөжүүлж байна. Мөн л орон нутгуудаас ахных нь байна. Эрүүл мэндийн салбартаа нэлээдгүй анхаарч, шинэ эмчилгээ, үйлчилгээг нэвтрүүлж, нутагшуулдаг аймаг. Орон нутагтаа энэ төрлийн эмчилгээ үйлчилгээг хийнэ гэдэг асар их боломжийг иргэддээ олгож байгаа ажил юм” хэмээв. 

“Медвик диализийн төв” -ийн үйл ажиллагааг “Их шүүдэргэнэ импорт” ХХК цаашид хариуцаж иргэдэд эрүүл мэндийн тусламж, үйлчилгээг үзүүлнэ. Тус төв нь  гемодилиз эмчилгээний 5 өрөө, хэвлийн диализийн нэг өрөөтэй,  техник тоног төхөөрөмжийн тухайд европын стандартын шаардлага хангасан 2025 онд үйлдвэрлэгдсэн хамгийн сүүлийн үеийн 13 аппаратыг суурилуулжээ. 

Мөн эмчлүүлэгч тус бүр дээр өвчтөний түүхийг сувилагч гараар  нээх шаардлагагүй аппаратанд тухайн иргэний дата мэдээллийг үүсгэдэг гэдгээрээ давуу талтай. Цаашид аппаратынхаа тоог нэмнэ гэх мэдээллийг компанийн зүгээс өглөө. 

Мэдээллийн төв