Аймгийн 2026 оны төсвийн төслийг ИТХ-ын ээлжит тавдугаар хуралдаанаар хэлэлцэж баталлаа. Санал хураалтад нийт 36 төлөөлөгч оролцож нийт төлөөлөгчдийн 92 хувь нь төсвийн төслийг дэмжлээ.    
           Төсвийн төслийг боловсруулахдаа “Монгол Улсын Засаг захиргаа, нутаг дэвсгэрийн нэгж, түүний удирдлагын тухай” хууль, “Төсвийн тухай” хууль болон Сангийн яамнаас ирүүлсэн “2026 оны төсвийн төсөл бэлтгэх удирдамж”-ийг үндэслэн аймгийн хөгжлийн зорилт, хэрэгжиж буй бодлогын баримт бичгүүдтэй уялдуулан төлөвлөлтийг хийсэн тухай аймгийн Засаг дарга төсвийн талаарх илтгэлийн эхэнд танилцууллаа. 
           Аймгийн төсвийн орлого 395,6 тэрбум,  төсвийн урсгал  зардал 49,0 тэрбум, хөрөнгийн зардал 223,3 тэрбум, гадаадын  зээл, тусламжаар хэрэгжүүлэх төслийн зээлийн эргэн төлөлт 2,7 тэрбум, улсын  төсөвт төвлөрүүлэх  орлого  92,6 тэрбум  төгрөг байхаар тусгажээ. 
          Мөн 2026 онд аймгийн төсвийн орлогыг 395.6 тэрбум төгрөг байхаар төлөвлөсөн бөгөөд татварын  орлого,   татварын  бус орлого, тусламжийн орлого, урд  оны шилжих үлдэгдэл гэсэн дөрвөн эх үүсвэрээс бүрдэж байна. 
            Ирэх онд нийт 223.3 тэрбум төгрөгийн хөрөнгө оруулалт, төсөл хөтөлбөрийн арга хэмжээг хэрэгжүүлнэ. 
Тодруулбал: 
Орон нутгийн хөрөнгө оруулалтаар – 202 төсөл, арга хэмжээнд 178.9 тэрбум төгрөг
Орон нутгийн хөгжлийн сангийн хөрөнгөөр – 37 төсөл, арга хэмжээнд 17.6 тэрбум төгрөг
Авто замын сангийн хөрөнгөөр – 4 төсөл, арга хэмжээнд 3.1 тэрбум төгрөг
Байгаль хамгаалах сангийн хөрөнгөөр – 28 төсөл, арга хэмжээнд 4.6 тэрбум төгрөгийг тус  тус тусгажээ. 

             Орон нутгийн 2026 оны төсвийн хөрөнгө оруулалтын онцлогоос дурдвал: 
         Монгол Улсын Засгийн газраас 2026 оныг “Боловсролыг дэмжих жил” болгон зарласантай уялдуулан, Мөн Засаг даргын 2024-2028 оны үйл ажиллагааны хөтөлбөрт тусгагсан “Нэг ээлж – Цөөн хүүхэдтэй анги” зорилтыг хангах хүрээнд аймгийн боловсролын салбарын нийт 19.4 тэрбум төгрөгийн хөрөнгө оруулалт хийнэ. 
           Мөн Орхон аймагт үйл ажиллагаа явуулдаг төрийн өмчийн 31 цэцэрлэгийн 310 гаруй бүлэгт нийт 8907 хүүхэд сурч хүмүүжиж байна. Эдгээр хүүхэд багачуудын эрүүл мэндэд анхаарч цэцэрлэгийн орчны болон хүнсний эрүүл ахуйн чанар стандартыг дээшлүүлэх хүрээнд бүх цэцэрлэгт автомат аяга таваг угаагч худалдан авахад 418,5 сая төгрөгийг тусгалаа. 
           Гэр хорооллын багууд дахь хөрсний элэгдэл, тоосжилтыг бууруулах, иргэдийн ая тухтай амьдрах орчныг бүрдүүлэх зорилгоор 13 багт 70.4 км гудамж хоорондын замыг сайжруулах, хотын төвийн гэрэлтүүлгийн хүртээмж, өнгө үзэмжийг нэмэгдүүлэх зорилгоор 6 байршилд 256 ширхэг гэрэлтүүлгийг шинээр хийнэ. Үүнд 4.8 тэрбум төгрөг зарцуулна. 
         Булагт дэд станцаас Оюут дэд станц хүртлэх цахилгаан дамжуулах агаарын шугамыг барих ажлыг 4,5 тэрбум төгрөгөөр, ашиглатад хүлээн аваад байгаа 35/10кВ-ын Чингэл дэд станцын хувиарлах байгууламжийг барих ажлыг орон нутгийн төсвийн 2,4 тэрбум төгрөгийн төсвөөр  хийж гүйцэтгэнэ. 
            Хотын төвийн 13.8 км авто замын хучилт, сайжруулалтыг  39.7 тэрбум төгрөг, Говил, Баянбулаг багуудад  ус дулаан дамжуулах төвийг барихаар 4.6 тэрбум төгрөг зарцуулна. 
Замын хөдөлгөөний ачааллыг бууруулах, нэвтрүүлэх чадварыг сайжруулах хүрээнд шинээр Кувейтын гудамжны аюулгүйн тойргийг гүүрэн байгууламж болон тунейлийн системээр шинэчлэх,  11-р хорооллын “Г” хэсгийг Уурхайчны гудамж буюу Баянбулаг багтай холбогдох авто замыг хийхээр тус тус төлөвлөжээ. 

Мэдээллийн төв