Аймгийн Засаг дарга Б.Зоригтбаяр холбогдох албаныхны хамтаар /2025.06.4/  авто замын ажлын 10 байршил дээр ажлын явцтай нь танилцаж, тулгамдаж буй асуудал  юу байгаа талаар зөвлөлдлөө. Төрийн байгууллагын зүгээс гүйцэтгэгч компанид тулгамдаж буй асуудлыг газар дээр нь мэргэжлийн байгууллагуудтай хамтран шийдвэрлэж байгаа билээ.  

2025 онд Орон нутгийн хөгжлийн сангийн хөрөнгө оруулалтаар 43 байршилд авто замын ажлыг 10 компани гүйцэтгэнэ. 
Засаг дарга Б.Зоригтбаяр  замын ажил гүйцэтгэж буй компаниудад ажлаа чанартай гүйцэтгэж  гэрээний хугацаанд   дуусгахыг сануулав. Мөн долоо хоног бүр ажлын явцын гүйцэтгэлтэй танилцахаа илэрхийлсэн. 

Чандманийн уулзварт хийгдэж буй хөрөнгө оруулалтын ажилтай холбоотойгоор зарим байршилд эхлэх ёстой байсан авто замын ажлыг түр хойшлуулсан. Тус хөрөнгө оруулалтын ажил 7 сарын эхээр дуусна. Үүний дараа гурван хэсэг газарт авто зам зайлшгүй хааж ажил хийгдэхээр байна. 

Зарим байршилд хийгдэж буй авто замын хөрөнгө оруулалтын ажлаас онцолъё. 

2А хорооллын авто замыг А1001 замтай холбох 0,423км авто зам шинээр тавих ажлын гүйцэтгэгчээр "Хүчит зам" ХХК ажиллаж байна 

2а хороололд 12.8м урт, 5.2м өндөртэй гүүрэн байгууламж, 423м авто замын ажлыг “Хүчит зам”  ХХК гүйцэтгэж байна  Гэрээний дагуу тавдугаар сарын 25-нд ажил эхлэх ёстой байсан ч гурван  байршилд Эрдэнэт хотыг тэжээдэг 6000кВт-ын цахилгааны кабель замын трасстай огтлолцсон учир ажил эхлэлгүй хэд хоног удааширсан.  Мэргэжлийн байгууллагууд цахилгааны кабелийг  илрүүлснээр өчигдөр гүүрэн  байгууламжийн ажил эхэлсэн. Өнгөрсөн долоо хоногт Засаг дарга уг асуудалтай холбоотойгоор газар дээр нь ажилласан. Энэ талаар Засаг дарга Б.Зоригтбаяр "Гүйцэтгэгч компани ажилдаа хариуцлагагүй хандаж,хугацаа алдаж байна. Компаниуд өөрсдөөс шалтгаалах зүйлсээ төр ажлаа хийхгүй байгаа мэтээр харагдуулах хандлага байна. Төрийн зүгээс ажил гүйцэтгэхэд тулгарч буй асуудал, бэрхшээлийг хугацаа алдалгүй шийдвэрлээд явж байгаа" хэмээв

13м өргөнтэй авто болон явган, дугуйн зам, ус зайлуулах хоолойны ажлыг гүйцэтгэж 8-р сарын 23-нд гэрээний хугацаагаар дуусгах ёстой.

Говилын 48 айлын орон сууцны авто замын ажил энэ сард дуусна 

200м-ын урттай тус хэсгийн авто замыг “Энх-Алтаргана” ХХК гүйцэтгэж байна. Явган зам, замын хашлагын ажил дууссан. Энэ сарын 15-наас асфальтбетон хучилт авна. Гэрээний хугацаа ирэх наймдугаар сарын 5-нд дуусна.  Тус компани зургаадугаар сардаа багтаан дуусгахаа мэдэгдэв. 

Оросын Элчин, Татвар, Нийгмийн даатгал орчмын  4 хэсэг 1,3 км авто замыг шинэчилнэ

Оросын Элчингээс 19-р цэцэрлэгийн уулзвар хүртэл авто замын засвар шинэчлэлийн ажлын гүйцэтгэгчээр “Жи пи экспресс финанс” ХХК ажиллаж байна. Тус хэсэгт нийт 1,3 км 4 хэсэг авто замын ажлыг гүйцэтгэнэ.  Татварын хэлтэс,  Нийгмийн даатгалын урдуур хойш өгссөн авто зам, 19 дүгээр цэцэрлэгээс хойш өгссөн зам, 11 дүгээр хороолол буюу Мажээ эмнэлэг рүү өгссөн авто зам, Оросын Элчингээс 19-р цэцэрлэгийн уулзвар хүртэлх авто зам юм. 

19-р цэцэрлэгийн тойрог уулзварыг дөрвөн замын уулзвар болгон шинэчилнэ. Өнөөдрийн байдлаар тус хэсгийн замын хашлагыг хуулсан, ажлыг түр зогсоосон нөхцөл байдалтай байна. 
Учир нь Чандманийн уулзварт хийгдэж буй хөрөнгө оруулалтын ажилтай холбоотойгоор тус хэсгийн авто зам хаахыг түр хойшлуулсан. Харин энэ сарын 12-ноос 5 хоногийн хугацаанд Оросын Элчингээс 19-р цэцэрлэгийн уулзвар хүртэл авто замыг хааж, дөрвөн замын уулзварын ажлыг гүйцэтгэсний дараа хөдөлгөөнийг нээхээр төлөвлөж байна.  

• Говил багийн Эрхбүжин цэцэрлэг Ээж төв хүртэлх 279м авто замын ажлыг "Хүчит зам" ХХК гүйцэтгэж байна. Ирэх сарын 27-нд ашиглалтад оруулна. 

Мэдээллийн төв