Дулааны станцын Техникийн усны нөөц шугамыг шинэчилнэ
"ЭДЦС”-ын Техникийн усны нөөц шугамын ашиглалтын хугацаа хоёр жилийн дараа дуусна. Техникийн усны нөөцийн шугам гэдэг нь “ЭДЦС” ТӨХК-ийн технологийн хэрэгцээний усыг хангадаг ф325 мм-ийн голчтой 5.4 км урттай шугам юм. Анхны техникийн усны шугам 1986 онд ашиглалтад орж 1997,1998 оны үед хоёр шугам актлагдсан байдаг.
Үүнээс хойш ашиглаж ирсэн шугамыг 2002 онд шинэчилж ашиглалтад оруулснаар нөөц шугамгүйгээр дангаараа 23 дахь жилдээ ажиллаж буй. Эрчим хүчний зохицуулах хорооны 53 дугаар тогтоолоор халаалтын болон хэрэглээний усны шугам, хоолойн ашиглах журмыг 25 жилээр тогтоосон байдаг.
Мэргэжлийнхний хэлж буйгаар дахин нэг шугам нөөцөд зайлшгүй байх ёстой ч 20 гаруй жилийн хугацаанд нэг шугам дангаараа ажиллаж иржээ. Сүүлийн жилүүдэд техникийн усны нөөцийн шугамд 6,7 удаагийн гэмтэл гарч, хүндрэл үүсэж байв.
Дулааны хэрэглээ жилээс жилд нэмэгдэж байгаа энэ үед шугамд гэмтэл гарвал станцын найдвартай ажиллагаа алдагдаж, Эрдэнэт хотыг дулаанаар хангаж чадахгүй байх эрсдэлтэй юм. Иймд уг асуудалд аймгийн удирдлагууд онцгой анхаарч 2025 оны орон нутгийн төсөвт шинэ шугам барихад шаардлагатай 5,3 тэрбум төгрөгийн санхүүжилтийг тусгасан.
Техникийн усны нөөц шугамыг шинээр суурилуулснаар Орхон аймаг, Эрдэнэт хотын усан хангамжийн найдвартай байдал бүрэн хангагдаж, одоо ашиглаж байгаа шугамдаа засвар хийж, шинэчлэн нөөц шугамд бэлтгэнэ.
2021 онд зураг төсвийг хийлгэж, 2022 онд магадлангаар оруулсан зураг төсөв нь бэлэн хөрөнгө оруулалтын ажил юм.
Мэдээллийн төв
