Дулааны цахилгаан станцыг өргөтгөж хүчин чадлыг нь нэмэгдүүлэв
1987 онд 7 зуух, 3 турбингенератортой суурилагдсан “Эрдэнэтийн дулааны цахилгаан станц” ТӨХК-д 34 жилийн дараа хүчин чадлыг нь нэмэгдүүлэх томоохон төслийг хэрэгжүүлж, 2021 онд ашиглалтад хүлээн авсан билээ.
Тодруулбал, Монгол Улс, БНХАУ-ын Засгийн газар хоорондын хэлэлцээрийн дагуу БНХАУ-ын Засгийн газрын 51.8 сая ам.долларын хөнгөлөлттэй зээлээр “Эрдэнэтийн дулааны цахилгаан станцын цахилгаан эрчим хүчний үйлдвэрлэлийг нэмэгдүүлэх СС-50 35МВт-ын турбингенератороор өргөтгөх” төслийг цар тахлын хүнд цаг үед амжилттай хэрэгжүүлж дуусгасан.
Станцыг өргөтгөснөөр жилд үйлдвэрлэх цахилгааны хэмжээ 2.5 дахин нэмэгдсэн юм.
Төслийн хүрээнд насос станц бүхий хөргөх цамхаг, хими ус цэвэрлэгээг бүрэн хэмжээнд шинэчлэн эсрэг осмосын технологид шилжүүлэх 1800 тонн/цагийн хүчин чадалтай дулааны эрчим хүчээр хангах сүлжээний халаагч бүхий иж бүрэн тоноглол, 5-8 вагон нүүрс татаж түлхэх зориулалтын цахилгаан толкатель, 110кв-ын цахилгаан дамжуулах агаарын шугам, дэд станцын барилга угсралтын ажлуудыг гүйцэтгэсэн. Ингэснээр станц 71МВт-ын суурилагдсан хүчин чадалтай, 67МВт хүртэл ачаалал авах, 3-4 МВт нөөцтэй болсон.
Монгол Улсын эрчим хүчний хэрэглээ жилд 60-80МВт-аар өсч байгаа цаг үед Эрдэнэтийн дулааны цахилгаан станцын өртгөтгөл 35МВт-ын трубингенераторыг ашиглалтад оруулснаар 100 гаруй мянган хүн амтай хотын дулааны хэрэгцээг найдвартай хангах нөхцөл бүрдсэн томоохон бүтээн байгуулалт болсон билээ.
Мэдээллийн төв
