5000 оюутны хотхоны эхний ээлжийн бүтээн байгуулалт 2025-2028 онд өрнөнө
Орхон аймаг, “Эрдэнэт үйлдвэр” ТӨҮГ хамтран “Эрдэнэт шинэ илгээлт” төслийг хэрэгжүүлж буй. Төслийн хүрээнд хэрэгжих 12 төслийн нэг нь “Сургалт, эрдэм шинжилгээ үйлдвэрлэлийн цогцолбор хотхон” байгуулах төсөл юм. Аймгийн Засаг даргын 2012 оны 102 дугаар захирамжаар оюутны хотхон байгуулах зориулалтаар 50 га газрыг Оюут багийн 2а хорооллын урд олгосон. Энэ дагуу Засгийн газрын 2021 оны 321 дүгээр тогтоолоор “Эрдэнэт цогцолбор” дээд сургуулийг түшиглэн оюутны цогцолбор хотхон байгуулах шийдвэр гарсан.
Урьдчилсан тооцооллоор 15 байгууламж бүхий 5000 оюутны хотхоныг байгуулна. Нийт өртөг нь 265 тэрбум төгрөг. “Эрдэнэт үйлдвэр” ТӨҮГ 2024 оны хөрөнгө оруулалтын төлөвлөгөөнд 400 сая төгрөг тусган, ТЭЗҮ болон ерөнхий төлөвлөгөөг хийх тендерийг нь өнгөрсөн дөрөвдүгээр сард зарласан ч шаардлага хангасан санал ирээгүй байна. Тиймээс хотхоны ерөнхий төлөвлөгөө, ТЭЗҮ-г ШУТИС-аар хийлгэхээр Сангийн яамнаас зөвшөөрөл авсан байгаа аж. Энэхүү бүтээн байгуулалтын ажил нь Засгийн газрын 2024-2028 оны үйл ажиллагааны хөтөлбөрт тусгагдсан.
Төслийн талаар “Эрдэнэт цогцолбор” дээд сургуулийн захирал Д. Зоригтхүү:
-“Эрдэнэт цогцолбор” дээд сургуулийг түшиглэн 5000 оюутны хотхон барих шийдвэр гарсан. Энэ хотхон яваандаа уул уурхай, технологийн төрөлжсөн хотхон байх ёстой. Улаанбаатарт сургадаг зарим нэг мэргэжлийг Эрдэнэт хотод төвлөрүүлэх, мөн төвлөрлийг сааруулах зорилготой. Нөгөө талаас “Эрдэнэт үйлдвэр”-ийн байгалийн нөөц хязгаарлагдмал. Хэзээ нэгэн цагт шавхагдана. Тэр үед оюуны үйлдвэрлэлийг хөгжүүлэх суурийг нь бий болгосон байна. Үйлдвэр ажиллаж байх хугацаанд гарсан мэдлэгийг аж үйлдвэрлэлд шингээнэ.
5000 оюутантай байх үед 417 багш, ажилтантай байна гэсэн урьдчилсан тооцоо гарсан. Одоогоор 159 багш, ажилчид манай сургуульд ажиллаж байна. Бодлогоор зарим нэг хөтөлбөрийг ШУТИС-иас “Эрдэнэт цогцолбор” дээд сургууль руу шилжүүлэх үйл ажиллагаа явагдах байх. Ингэж байж багшлах боловсон хүчнээ хангана гэж үзэж байна” гэв.
Төсөлд тусгаснаар нэгдүгээр ээлжийн барилга байгууламж 2025-2028 онд баригдах бол хоёрдугаар ээлж нь 2029-2031 онд баригдах юм байна.
Мэдээллийн төв
