Засаг даргын захирамжаар 2а хорооллын 4,8 га газрыг албадан чөлөөлж байна
Аймгийн Засаг даргын захирамжаар Оюут баг 2а хороололд орон сууцны зориулалтаар 4,8 га газар эзэмшиж байсан “Рапид харш” ХХК-ийн газар эзэмших гэрчилгийг цуцалж, газрыг албадан чөлөөлөх ажлыг эхлүүллээ.
Тус газрыг чөлөөлснөөр улсын төсвийн хөрөнгө оруулалтаар баригдах 960 хүүхдийн сургууль, орон нутгийн төсвөөр хийгдэх босоо тэнхлэгийн 430 метр хатуу хучилттай авто зам тавих боломжтой болж байна.
Газар эзэмшигч компанид газраа чөлөөлөх тухай мэдэгдлийг холбогдох байгууллагуудаас гурван удаа хүргүүлсэн. Хуулийн хугацаанд 14 хоногийн дотор хариу ирүүлээгүй учир ийн буулгаж байна.
Эхний ээлжинд босоо тэнхлэгийн 430 метр хатуу хучилттай авто зам тавих газрыг чөлөөлөх ажлыг Хот тохижуулах газраас гүйцэтгэж байна. Энэхүү компани нь хоёр жилийн өмнө газар эзэмшх эрхээ шилжүүлэн авсан байдаг. Энэ хугацаанд газраа ашиглаагүй бол Газрын тухай хуулийн дагуу Засаг даргын захирамжаар хүчингүй болгох заалт бий.
Аймгийн Газрын харилцаа, барилга хот байгуулалтын газраас газраа зөвшөөрөлгүй сунгаж татсан, том хэмжээний газар эзэмшиж буй 151 иргэн аж ахуйн нэгж байгууллагад мэдэгдэл хүргүүлжээ. Мэдэгдэх хугацаанд ямар нэгэн ажил зохион байгуулагүй бол цаашид хуулийн дагуу арга хэмжээ авна гэлээ.
Тухайлбал, “Номин” ХХК-д сургууль барихаар төлөвлөсөн газрыг чөлөөлж өгөх тухай мэдэгдлийг хүргүүлсэн. Тус компаниас газар чөлөөлнө гэх хариуг ирүүлжээ.
Мэдээллийн төв
